KUM THAR THUCHAH (Part 2)- Lalchuangliana

(Thawhtanni, 12th Jan., ’26 ami chhunzawmna)

2. Pathian ropuina tur hlirin i khawsa ang u

Kum 400 dawn kal ta (25 November 1647) khan Saprama Pathian thu thiam rualin Westminster Catechism (thu in chhang) an ti chhuak a. Chuta zawhna hmasa ber leh pawimawh tak mai chu, “What is the chief aim of man?” (Mihring tum ber tur chu enge ni? Mihring damchhan enge ni, pawh kan ti thei ang chu) tih a ni. A channa chu, “To glorify God,” (Pathian chawimawi / Pathian ropuina lantir) tih a ni ngawt mai a ni. 1 Kor.10:31 a kan hmuh kha a ni. Kan thalaite pawhin thupuiah an neih kha.

Pathian ropuina chu enge ni? tih kha zawhna a awm nghal a. Sawi dan lar ber pakhat chu “The sum total of the worth of God” tih hi a ni. Pathian hlutna leh a rihna zawng zawng belhkhawm, i ti mai ang. Pathian a nihna (attributes) – engkimtithei, danglam ngai lo, hmangaihna leh khawngaihnaa khat, engkim hre vek, khawihmunah pawh awm – heng zawng zawng inbelhkhawm hi a ni. ‘Pathian ropui nan’ kan tih chuan, Pathian nihna ropui hi kan lantir tur tihna a ni. Keini misual leh bawlhhlawh hian chutiang Pathian ropuina chu engtinnge kan lantir theih ang, kan ti ngei ang. Mahse Pathian thu chuan “A ruat lawkate chu ama Fapa ang taka awm turin a ruat lawk si a,” a ti tlat mai a ni (Rom 8:29) Hei hi Pathian kan chawimawina tur chu a ni – amah an hi.

Lal Isua kan an zawh poh leh Pathian ropuina hi kan lantir a, Pathian chu kan chawimawi a ni. Vawi leh khata Lal Isua ang ta thut ni lovin, nitina amah kan hriata a nungchang kan phawh chhoh zel hian amah chu kan ang chho zel a, nakinah amah chu a awm ang leh a nihna ang taka a famkima kan hmuh hunah keini pawh hi Lal Isua angin kan awm dawn a ni. (1 Jn.3:2)

Tichuan kum thara kan tum tur chu – ka thusawi hian Lalpa ka chawimawi ang, ka chetzia leh nung chang hian Lal Isua mizia ka lantir ang, ka tawngkam chhuak hi chia al, khawngaihna tel niin Lalpa ka chawimawi ang. Ka hnathawh leh ka hmaa tihtur hi –eng hna pawh ni si – Pathian ropui nan tha takin, dik takin, rinawm takin ka ti zel ang. Ka nunah hian miten Lal Isua mawina an hmu zel ang. Chutiang tur chuan kan rilru siam ila. Chu chu Pathian duhzawng a ni a, engtinnge kan tihtheih ang ? “Ama lawmzawng atana tih tum tur leh bei tura nangmahnia thawktu chu Pathian a ni si a.” (Phil 2:13) Mahni intum chawp zel hi kan Pathian a ni. Chu ropuina chu kan ta tur a ni, “Krista kan nunna chu alo inlar hunah chuan nangni pawh ama hnenah ropui zingah in inlar ve ang.” (Kol.3:4)

Kumin chu engkim Pathian ropui nan aw…