Tirhkohte Thiltih Zirlai 22-na. Tirhkohte 4:15-22

TIRHKOHTE 4:15-22 MIZCLBSI

Tichuan, Sanhedrin ata an chhuahtîr hnu chuan an inrâwn a, [16] “Hêng mite hi engtin nge kan tih tâk ang? An thil mak tih hi Jerusalem-a awm zawng zawngin an hriat tâk hi; keini pawhin kan hnial thei si lo. [17] Amaherawhchu, miin an hriat darh lehzual loh nân tu hnênah mah he hminga thu sawi leh tawh lo tûrin i vau ang u,” an ti a. [18] Tichuan, anni chu an ko leh a, Isua hminga thu sawi lo tûr leh zirtîr tawh tawp lo tûrin thu an pe a. [19] Nimahsela, Petera leh Johana chuan an hnênah, “Pathian mit hmuhah Pathian thu zawm aiin mihring thu zawm chu a dik zâwk dâwn emaw chu, ngaihtuah teh u. [20] Keini zawng thil kan hmuh leh kan hriat hi sawi lovin kan awm thei lo,” an ti a. [21] Tin, anni chuan nasa takin an vau va, an chhuah ta a. An thiltih avânga mi zawng zawngin Pathian an chawimawi ṭheuh si avângin hremna remchâng an hmu lo va ni. [22] Mak taka an tihdam chu kum sawmli aia upa zâwk mah a ni.

Sawi Zauna: Roreltute hian eng dang zawng aiin an dinhmun leh thuneihna vawn him reng hi an duh ber chu niin a lang. Petera-te thil tih kha Pathian atanga chhuak a ni tih an hre rengin a rinawm. Eng mihring mahin kum 40 chhung kebai ke in thawklehkhatah an kal tir thei ngai lo tih pawh an hre reng ang. Pathian kut an hmu a, an pawm duh lo a ni. An dinhmun a nghing dawna an hriat vangin. “Amaherawhchu, miin an hriat darh lehzual loh nân tu hnênah mah he hminga thu sawi leh tawh lo tûrin i vau ang u,” tiin Isua chanchin a darh zel loh kha an duh chu a ni. Khawvelin ropuina, nawmna a pekah zung an kai thuk tawh lutuk a Pathian hnathawh an hriat chian ngei pawh an pawm duh tawh lo a ni.

Nimahsela, Petera leh Johana chuan an hnênah, “Pathian mit hmuhah Pathian thu zawm aiin mihring thu zawm chu a dik zâwk dâwn emaw chu, ngaihtuah teh u,” an ti a ni. A nihna takah chuan Petera leh Johana ni lovin Sanhedrin roreltute kha a ni rorelsaka awm mek chu tih a chiang hle mai. Lalpan Baptistu Johanan thu kha Pathian thu nge mihring thu ti a zawh ang deuh chiah khan roreltute hi Petera leh Johana hian an dang chep a ni.

Ngaihtuah Atan:

36. Zirtirte hi an nihnaah an chiang khawp mai. Tu emaw chuan ti hian a sawi: mi chaklo, mi weak chuan a fellohna a hre ber thin a, chu chuan a nun a hruai a a thleng sang ngai lo, mi chapo chuan midang chaklohna a hre ran a a hmusit mai thin a, mi chak chuan a ma chakna a hre chiang a a hlawhtlinpui thin.

Petera leh Johana hian sangha mantu mi hnuaihnung an nihna hi an nun hruaitu atan an hmang lo. An chak lohna, duhthu an sam lohna an thlir lo. Midang fel lohna emaw, an mahni tlinna emaw pawh an en ber a ni lo. Isua an en ber a, chu chu an nun leh thusawi kaihruaitu ber a ni ta a ni. Pathiana an nihna, an identity-ah an chiang a ni. Chu chuan anmahni a ti chak a, an huaisen a, Lalpa ang maiin chhan theih loh, chhan ngam loh zawhna an chunga roreltute hnenah an zawt thei ta a ni.

Enge i nunkaihruaitu ni ve thin, i nihna, i hnathawh, i hlawhtlinna, hlawhchhamna, mite hriat dan che, nge Pathian Thuin i nihna a sawi i pawm a i che chhuak thin?