KUM THAR THUCHAH (Part 1)- Lalchuangliana

Chhiar tur: Phil 2:9-11; 1 Kor.10:31; Ps 90:12

Tun kum tharah hian mi tam takin an tih thin chu ‘New Year Resolution’ siam a ni. A tha khawp mai. Kum khat chhunga thil tum bik neih chu hmalakna tur atana thil pawimawh tak a ni. Tum chiang mang lo va, a tla chawpa tih ngawt hi a sawt duh lo hle a ni. Vawiinah hian tun kum atan thil pathum ‘tum bik’ nei turin ka han inchah duh a ni:

1. Lal Isua hi i chawisang ang u. (Phil 2:9-11)
2. Pathian ropuina tur hlirin i khawsa ang u. (1 Kor.10:31)
3. Hun chhiar dan i zir thar ang u (Ps 90:12)

1. Lal Isua hi i chawisang ang u. Isua chu tunge maw a nih a kan chawisan ang le? Mafela & Mamate Youtube Channel ‘Rhyme & Reason’ ah hian Isua Series-ah vawi hnih Isua hi tunge a nih chiang takin an rawn sawi a, in lo ngaithla emaw. Lal Isua nihna tam tak kan sawi zung zung thei ang –

• Thu tisaa lo chang a ni
• Engkim siamtu leh amah avanga thil engkimin awmzia a nei a ni
• Krista Pathian nung Fapa a ni
• Chhandamtu a ni
• Immanuela, Pathian kan zinga awm a ni
• A thlarau keimahnia awm tura min petu a ni
• Mi zawng zawngin a ke bulah thingthia chibai an la buk a, “Lalpa” an la
  tih tur a ni

Vawiinah erawh hi chuan a nihna pakhat hi a bikin chhut ila ka ti a. Chu chu “Roreltu” a nihna hi a ni.

• “Ani chu mitthite leh mi nungte chunga Roreltua Pathian ruat a ni.”(Tirh. 10:42)
• “Pain tuma thu a relsak ngai lo, thu zawng zawng Fapa a reltir ta zawk” (Jn 5:22)
• “Mihring Fapa a nih avangin a hnenah rorel thu a pe.” (Jn.5:27)
• “Lei leh vana thuneihna zawng zawng ka hnenah pek a ni tawh.” (Mat.28:18)
  

Vawiina kan rilru tihrehawmtu leh kan rumna ber pakhat chu roreltu kan ring zo lo hi a ni. India, USA, UK, Mizoram etc. Heng rama roreltu, sawrkar hotu, Court roreltu (judge) ten hleih nei lova ram mipuite tan rual khai taka rorel turin an insawi a, kan beisei bawk a, mahse chutiang mi kan hmu si lo. Anmahni thlangtute leh ruat tute an tan vek a, chutiang ni ve lo tan khua a eng thei lo. Lal Isua rorelna hi zawng

• Mi zawng zawng an thiltih ang zela rorelna tur a ni (2 Kor. 5:10)
• Amah hi khawngaihna leh thutak a ni (John 1:14)
• A rorelna hi khawngaihna lalthutthleng a ni (Heb.4:16)

Lal Isua hi Roreltu Maka a ni. Rorelna a kokia a chuang hi kan va nihlawh em. Amah hi Chanchin Tha chu a ni. Ama rel fel tura dah hi a hahdamthlak a ni. Chuvangin kan tawngka, kan chetzia, kan thiltih, kan nungchang zawng zawng hian amah Lal Isua hi i chhuang ang u. I zahpui lo vang u. I chawimawi ang u. Lal Isua hi thupui berah i nei ang u. Kan nupui, kan pasal, kan fate, kan chhungte, kan hna, kan nihna, kan ro sum, kan hming thatna – heng zawng zawng hmaah hian Lal Isua i dah ang u. Ani tel lo hian leia kan
nun hian awmzia a nei lo. Vanah pawh a tel lo chuan kan tlei chuang lo vang.

(He thuziak hi kum 2021 DMI kum thar atana Pu Lalchuangliana thuchah/thuziah ami a ni. Part dang pahnih kar dangah tihchhuah chhunzawm a ni ang)