TLAWM VE LO SIPAI RINAWM- Lalchuangliana

Hiroo Onoda chu Japan ram thingtlang khaw pakhat Kainan an tihah March 19,1922 khan a lo piang a. Japan chu Khawvel Indopui 2-na Asia rama chawkchhuaktu a nih vangin Hiroo pawh chu kum 20 mi lek niin Japan Sipaiah a tang ve a. Intelligence Officer ni turin Nakano School-ah training hautak tak a hlen a. December 1944 khan Phillipines thliarkar pakhat Lubang an tihah chuan thlawhna tumhmun leh lawngkai tichhe tura tih a ni. February 28, 1945 chuan American Sipaite chuan chu thliarkar chu an rawn kai ta ngei a, Japanese sipai tam ber chu an tlanchhiat loh leh kah hlum an ni a. Major Yoshimi Taniguchi-in a Lieutenant Onoda order a pek hnuhnun ber chu: “Lo tang tlat la, kum thum kum nga pawh a ni thei, kan rawn lam leh ngei ngei ang che,” tih a ni.

Lt. Onoda leh a thiante pathum chuan indo a tawp tia lehkha an rawn vawrh darh chuai chuai te pawh chu lo hmu mah se hmelmaten an bumna niin an ring a, an awih duh lo. Ramhnuaiah buk an sa a, mi huana thlai ei tur ruin an rante phil sakin an khawsa a, hmelma emaw tiin Philippino mi pawh an that nual a. Kum 1950 khan pakhat chu a in surrender a, pahnih dang chu Police in an kap hlum a. Lt. Onodo pawh hi kum 1959 khan a thi tiha puan a ni a. Zirlai pakhat Norio Suzuki chuan Lt. Onoda hi a thi lo niin a ring tlat a, a zawng ta ngat ngat a, kum 1974 khan a zu zawng hmu ta a, mahse a Commanding Officer hnen atanga  order a hmuh loh vangin hruai haw mai a duh chuang lo.

Kum 29 a ral hnuah Japanese sawrkar chuan Rtd. Major Yoshimi  Taniguchi, “Kan rawn lam leh ngei ngei ang che,” titu kha an tir thla a, “Japan kan tlawm ta, tunah chuan i duty atanga ‘relieve’ i ni e,” a han tih chuan chu sipai cher leh thawmhnaw zawr tak ha, mahse tlawm ngai lo  Hiroo Onoda chuan a Senior Officer chu salute a pe a, a tap ta zawih zawih a.A thawmhnaw zawr tak nen chuan Manila khawpuiah an
hruai a, President Marcos hnenah a chempai chu a hlan a, President chuan an mite a lo thah avanga a thiltihsual chu a ngaidam a, a chempai pawh chu Hiroo Onoda hnenah a pe kir leh a ni.

Tokyo khawpuia a rawn kir leh chuan mipui sang tam takin an lo hmuak a, an parade pui a, chawimawina tinreng an hlan a. Indopuiah a tlawm lam an nih avanga Japanese mipui rilru na leh hnual lutuk chu a rawn so sang leh a, mahni inrintawkna, huaisenna a rawn chawk tho va, Japan ram leh hnam tan piantharna a ni ringawt mai. Hiroo chuan a unaupa Toshiro hnenah, ” Ka tibuai rei em mai che u a,
pawi ka ti tak zet a ni,” a ti. Japan ram lo thang nasa leh in sang pui puite chuan a rilru a tihah zawk a. Chuvangin, 1975 khan  Brazil- ah a pem ta daih a. Lo te neiin ran te a vulh a, nupui Machie Onuku a nei bawk a. An nupain Japan ramah 1984 khan an lo kir leh a, Onoda Nature School an din a. Kum 1996 khan Lubang ah a zu kal leh a, sikul din nan dollar 10,000 a pe a. Japan leh Brazil ah an cheng lawr a, Brazil hian Honorary Citizenship an pe bawk. Sipai rinawm tlawm ngai lo Lt. Hiroo Onoda chu kum 92 mi niin January 16, 2014 khan a thi ve ta a ni.

Keini Lalberte Lalber sipaite pawh hi kan Lal leh a ram tan hian kan tlawm ngai lo tur
a ni dawn lawm ni?