Tirhkohte Thiltih Zirlai 16-na. Tirhkohte 3:1-10

TIRHKOHTE 3:1-10 MIZOVBSI

Tin, Petera leh Johana chu behliang mun hunin, ṭawngṭai hun lai chuan, Pathian biak ina lût tûrin an chho va. [2] Tin, patling tu emaw a pian tirh ata kebai an rawn zâwn a, chu mi chu biak ina lûtte hnêna kut dawh tûrin biak in kawngkhâr, ‘Mawi’ an tih bulah chuan ni tin an muttîr ṭhîn a ni a; [3] chu mi chuan Petera leh Johana Pathian biak ina lût tûr chu a hmu a, kut a dawh a. [4] Tin, Peteran ani chu a en reng a, Johana pawhin; tin, Peteran, “Min han en rawh,” a ti a. [5] Tin, ani chuan an lakah eng emaw hmuh a beisei a, a han en a. [6] Nimahsela, Peteran, “Tangka leh rangkachak eng mah ka nei lo; nimahsela, ka neih chhun ka pe ang che: Nazareth Isua Krista hmingin kein kal tawh rawh,” a ti a. [7] Tin, a kut ding lam a chelh a, a kai tho ta a; tin, thâwklehkhatan a kete leh a kheimit ruhte chu a lo chak ta nghâl a. [8] Tin, ani chu a zuang tho va, a ding a, kein a kal ṭan ta a. Tin, kea kal kal leh, zuang zuang leh, Pathian fak chung zêlin biak inah chuan a lût ve ta a. [9] Tin, kea a kal leh Pathian a fak chu mi zawng zawngin an hmu a; [10] biak in kawngkhâr ‘Mawi’ bula kutdawha ṭhu ṭhîn kha a ni tih an hria a; a chunga thil thleng chu mak an ti êm êm a, an buai hle mai a.

Sawi Zauna: Pian tirh ata kebai ke a kal leh a harsat zia, tha leh thei a nih loh zia Tirhkohte Thiltih ziaktu Dr. Luka hian a hre chiang hle awm e. ‘Nazareth Isua Krista hmingin kein kal tawh rawh,’ tih kan hmu a. Mitthi tawh hming hian thil tih theih a nei tlem khawp mai. Dawrah kalin, ‘Pu Gandhi-an lo la rawh a ti,’  ti ta i la an bungrua engmah min lak tir kher lovang. Lalpa khan a dam laiin natna tam tak ti dam mahse a thi hlen a nih ngai chuan a hmingin tumah an dam zuiin a rinawm loh. Lalpa Isua hmingin kebai a lo tha lehta hian a thih hlen loh zia, chatuana nung reng tura a thawh leh zia a lan tir chiang hle mai. Thil pahnih chhinchhiah i la:   

1. He kebai hian Isua a neih tak avangin a dam chhung chang ni lo, chatuana a danglam vekna tur malsawmna a dawng ta a ni. A beisei chu pawisa tlem a ni. Isua avanga a neih tak erawh tehkhin theih loh khawp thil a ni. Mumang lamah pawh a hmuh phak ngai loh thil a chang ta a ni. Pawisa tlemte, chaw vawi khat emaw eina tur lek beisei zeng kha, kum 40 chuang taksa leh thlarauva a saltanna ata chhuah zalen a ni ta. Ni pangngai liam ve leh mai tur kha Isua a tawn takah chuan a dam chhung chang ni lo chatuan nun thleng nghawng thei a chungah a thleng ta a ni. Vawiin hi Lalpa Isua nen hmangin i tan ni chhinchhiah tlak lo ni se. A thiltih ropui i hmuhna ni lo ni ve rawh se.
2. Kebaiin a beisei chu pawisa a ni. A duh, a zawn a hmu lo va, chu a thil zawn thawh chhuah theihna tura damna a chang ta zawk a ni. Hnathawk thei turin, ei zawnga mi dangte pawh pui let ve thei turin tih dam a ni ta a ni. Kan duh leh mamawh Pathian hnena kan dil hian kan dil ang min pek mai chang a awm a, a chang chuan kan mamawh keimahni ngeiin kan thawh chhuah theihna chakna leh remchang min siam sak chang a awm bawk thin. Thawh theihna, rem hriatna leh rem channa-te hi Pathian hnen atanga kan hmuh a ni.

‘Petera hian a kut dinglam a pe a, a kaitho ta a,’ tih a ni. A kuta vuana kai thotu chu Petera a ni a, ti damtu, thiltihtheihna neitu chu Pathian a ni. Mite chunga Pathian hnathawh a lan nan, mite damna turin in sengin, chak lote i chelhin i kai tho ve thin em? Pathianin hna a thawh theihnan a hman theih turin i in peihin i che chhuak ve thin em?

Ngaihtuah zui atan:

27. Thil mak, miracle hi i ring em, i rin/rin loh chhan enge ni?

Pathianin vawilehkhata a tih dam leh doctorte hmanga a tih dam danglamna he zeng dam ta atang hian i sawi thei em?

28. Damdawi thawh dan leh rilru lam an zirna lama experiment an tih thin dan pakhat chu; natna nei zingah mi enge maw zat chu damdawi tak tak ni lo, enge maw mai mai an pe a. Damdawi a ngaiin an ei a, chung zinga mi chu sawm zingah pahnih pathum an dam ve thei tlat zel a ni. Placebo effect an ti. Rinna an dam pui a ni ve thei angem? Pathian rina damna hi engtin chiah nge a thawh ni a i hriat?