TAR TAWNGTAINA- Lalchuangliana

Kan Bible hian Sam 71- na hi “Tar Tawngtaina” a ti mauh mai a. Bible vek hian mihring dam chhung chu kum 70 emaw a ni a, a chak deuh chu  kum 80 pawh an dam, a ti a.  Keipawh kum 80 ka pel tawh a, Pathian zara ka la dam hi ‘bokshish’ a ni tawh hian ka hre thin. Ka lawm khawp mai. Tar lam tana harsatna awm chu haihawt te, thil hriat hnu pawh theihnghilh te, chumi avanga thusawi hnu sawi sawi te, mi
hming leh hmun leh hun hriat theih loh te hi a ni tlangpui a. Tin, kan thu tung thei lo va, ding chungin kekawr kan ha thei lo va, mit a lo thim deuh tawh a, beng a chhet tawh bawk. Damdawi lamte kan hriat hma chuan chutiang mi chu ‘tar a’ kan ti mai thin a, chhawnchhaih kan ching bawk thin. Tunah chuan kan
tawngkam tam tak Saptawng kan hawhte chu kan lam ve sek a- stress, depression, alzheimer, dementia, memory loss, bipolar disorder etc kan lam zut zut tawh mai a ni. India ramah hian depression nei hi mi maktaduai 70 vel an awm a, thalaite an bang bik lo, Bipolar disorder nei hi maktaduai 10 vel an awm a, alzheimer hi maktaduai 7 vel an awm bawk a ni an ti. Mizote zingah pawh kan tam khawp mai. ‘Bipolar disorder’ neite hi an mak khawp a, an hmangaih leh an hnaih berte hi an ngai thei lo tlat mai thin. Kan rawngbawlpui ringtu leh hruaitu tha deuh mai hi he natna hian a bual ve a, a nupui a duh em em thin kha a bula awmah a duh ta tlat lo mai a, daktor tha ber ber an rawn hnuah pawh a la danglam chuang rih lo. An nupain kan khawngaih khawp mai.

Hetiang hi kan nun dan pawh lo ni se, manganga lo in khapthluk reng hi a tul reng reng lo. Lalpa hian a hre vek a, thim leh eng siamtu hian depression te hi a hre chiang em a. Mahni inthah tum hial khawpa depression nei nasa mi pakhat hi a awm a. Chemtea in tihhlum a tum a, a chemte chu a tliak hlauh mai a, tuiah tla hlum turin a zuang lut a, tutenemaw an chhan hman leh hlauh va, inawhhlum a tum pawh a ‘fail’
a, mi a dahna (mental asylum) ah kum khat leh a chanve an dah a. Chutah chuan Rom 3: 25 hi a chhiar fuh hlauh mai a, Lal Isua thisen chuan sual zawng zawng a tleng fai thei a, mahni intihhlum duhna rilrute pawh a tleng fai vek tih a han hriat chuan a piang thar ta hlawl mai a. Chu mi chu English Poet hmingthang tak William Cowper a ni. “Immanuela thisen zaman, thisen lui a luang chhuak,” tih hla ropui tak hi a phuah a ni. Misual dam leh piangthar, “Khawngaihna mak mawi leh duhawm,” (Amazing grace! How sweet the sound! ) tih phuahtu John Newton nen khan inthian tha tak an ni. An thu pawh a rual khawpin a rinawm.

I bengte a chhetin i khawhmuh a fiah tawh lo a ni mai thei, chokaah rawng i bawl a, i duh lam turin Fridge i pan a, Fridge i han hawng chiah chu i lak tum kha i hre leh ta lo pawh a ni mai thei, i bulah mi an titi a, an thusawi i man ve miah lo a ni mai thei, i nu emaw, i pa emaw hmangaih taka i enkawl mek khan, “Tunge i nih kha?” a ti mai thei che, lehlam hawiin i mittui a tla sawk pawh a ni thei e. Lalpa hian a hre vek a, mahse hetiang hun i kal tlang hian vanram a ngaihtir thin che a ni. Famkimna hmun Lalpa hnen a nghahhlelhawm thin. Kan tana tha chu Lalpa hnaih reng hi a ni e. Lehkha i chhiar thei tawh lo a nih pawhin i tu leh fate kha “Tar Tawngtaina”- Sam 71 hi i beng hriatah lo chhiartir thin ang che.