KUM 18 A LO NI TA

Kum 2006 khan Delhi Mizo Inkhawm Committee chuan  Beihrual thla September chhung zir turin “Bible – Pathian Thu” tih tawp mai hi a thlang a, chumi kaihhruaina ziak tur chuan min ti a. Ka theih ang tawkin ka zir a, Inrinni leh Chawlhni tina zir turin Thupui  9- ah ka chhuah a, keimah ngei hian ka hlawkpui khawp mai.

September 3, 2006 chumi thlaa Chawlhni hmasa berah chuan a thupui ziaktu tiin Beihrual laia zir tur chu hawng turin min ti a. Ka sawi tur chu ka ziak thla a, Introduction-ah ‘Postmodernism’ leh chumi zirtirnain Pathian thu kan pawm leh zuina lamah min hruaibo thui tawh ziate ka sawi nual a. Keima chanchin hi  tihian ka lo ziak tel a:

Ka naupan laiin Reiek khuaa seilian ka ni a. Kum 1955 khan Aizawlah Mizo High School- ah ka lut ve a. Thlasik chawlh laiin Reiek- ah ka haw thla a, kan khuaah chuan BPO an rawn dah ve a. Nikhat chu lehkhathawn hi ka hmu ve mial a. Ka han chhiar chuan Aizawl nula tleirawl hmeltha deuh ‘love letter’ hi a lo ni reng mai a! Ka chhiar nawn ka chhiar nawn a, a lehkha chu ka ‘bye- heart’ rang hle. Lehkha han thawn ve leh nachang pawh chu ka hre lem lo va, kum thara sikul kan luh leh pawh chuan amah chu ka be tha ngam leh lawi bawk si lo va, a zuzi zo ta a, Pi Sangteii a vannei ta thung a ni! Chu nula nen chuan inkungkaihna kan neih zui loh avangin kan intheihnghilh leh nghal mai a, lehkhaah khan enge a sawi pawh ka hre reng tawh lo.

Kum 1962 khan Shillong- ah B A  Eco Hons Final Year ka nih kumin ‘ bial’ dang ka chhar ta a. A chanchin hi mi sawi vawi tam tak ka hre tawh a, tha pawh ka lo ti ralkhat ve mai thin a. Chumi kuma kan intawn chiah erawh chuan ka thinlung zawng zawnga amah hmangaiha, ama ta chauh ni turin ka intiam ve chawr mai a. Chu ka ‘bial’ chhar thar chu Lal Isua a ni. A chanchin hriat tam ka duh ta em em a, a chanchin hriatna ber tur Bible pawh chu ka lo nei thathum lo va. Mizo tawng Thuthlung Thar hi lei turin Tribal Hostel, Laitumkhrah atangin Bible Society Office, Jaiaw-ah ka zu kal nal nal a. Phek hnih lai mai ‘ blank’ hi a lo awm leh nghal a, thleng turin ka zuk kal tha leh a. Chhiar chu nuam ka ti em em a, ka chhiar chhuak
ta thuai a. Ka chhiar nawn leh thin a, Lal Isua min hmangaihzia min hriattir nasat poh leh amah chu ka hmangaih zual  hian ka hria a. English Bible thar ka lei bawk a (kha tih lai khan Mizo tawng Bible pum hi lei mai tur a awm lo) Ka rilruah hian Lal Isua hi a khat a, ka thinlungah hian a cham reng thin. Mahse chuti reng chu a lo ni lo va, a chanchin chhiar reng pawh chu a lo har tan mai a. Nitin Bible chhiar ziah erawh hi chu a tul hian ka hre ringawt mai a, ka chhiar hi chuan ka inchhir ngai lo. Nula ‘love letter’ min thawntu nena kan inkar chu a tawp thuai a, pawi pawh ka ti bawk lo va. Lal Isua nena kan inkar erawh hi chu nghet tulh tulh tur hian ka duh a, kan intawh ni atangin  kan intheihnghilh ni a awm ngai lo.

Chutiang ‘experience’ nei tawh kan nih ka ring a, la nei ve lote kan awm chuan Lal Isua hi lo ‘bial’ nghal turin ka sawm a che u. Beihrual chhung hian Lal Isua chanchin sawina  Bible hi Pathian Thu a nihzia te, a zirtir pawimawh zual te, Thlarau thawkkhuma ziah a nih dan te, a rintlakzia leh engtia lo dawnsawn tur nge tih te kan zir dawn a ni. Vawiin a sawi hawnnaa kan thupui ber chu “Bible hi Pathian Thu” a ni, tih hi a ni.