Bible a rorelna dik (Justice in the Bible) I – Tim Keller*

1. Rorelna Dik Pathian

A hmasa berin Bible-a rorelna dik tih hi ziaka dah tlar thu emaw, dan leh hrai zam felfai tak emaw a ni lem lo. Pathian nihnaah zung a kai a, chumi aṭanga ze lo chhuak chu a ni a, dik lo vin a awm thei ngai lo.

Pathian nihna hrang hrang a ziahna rintlak takah khan Herman Bavnick chuan Bible-a Pathian rorelna dik hi chu sual hremna leh siam ṭhatna a ni zel a ti a. Sual thiltih chu a hrem a ni mai lo va, chu thil sual tih avanga tuartute chu an dinhmun ngai luah leh thei turin a chawi kang zel ṭhin. Chutih rualin, mak tak maiin, “Bible-ah hian Pathian siam ṭhatna rorel hi a sual hremna rorel aiin a langsar zawk daih” a ni. “Mi rethei thubuai dik lo taka relsak…pawi sawi lo leh mi felte tihhlum…thamna lak…hnam dang, hmeithai leh fahrahte hnehchhiah…” te chu Pathianin a do tlat a. Anni chu Pathianin “dinhmun zahawm leh intodelhah a hlang chho a…Mi harsate hre reng chunga rorelna dik pek chu khawngaihna leh lainatna hnathawh a lo ni bawk a ni.” Chu vangin, Pathian siam ṭhatna rorel chu “a thinurna, a hmangaihna dai ngai lo nena inhal tlat ang a ni lo va, a hmangaihna nen chuan a inhnaihin a inmil em em zawk a ni.” A rorelna dik chu “a khawngaihna luangliam a ni tel bawk (Sam 97:11-12; 112:3-6; 116:5; 118:15-19).”

Kan Lalpa rorelna dik hi hremna a ni bawk. Dik lohna tuartute leh nawmnah taka cheibawlte tan dikna a pe a ni mai lo va, he’ng sual titute tan hremna a pe tel bawk. “Mi suaksual chu hrem lohvin a chhuah lo va” (Ezekiela 7:4, 9, 27; 8:18; 9:10). Khawvel zawng zawng chunga Roreltu a nih angin Lalpa chuan mi zawng zawng chungah an phu tawk ang zelin dikna a lek ang (Tirhkohte Thiltih 17:30-31). Chutih rualin engkim a siam ṭhain “engkim a siam thar ang” a, sualna, natna leh thihna awm tawh lohna turin (Matthaia 19:28). Sual hremna leh siam ṭhatna tur A rorel hun chu khawvel tawpah tihfamkimin a awm ang a, dikaiosune – rorelna dik – a khat van thar leh lei tharah kan cheng tawh ang (2 Petera 3:13).

chhunzawm tur

———————–

*Tim Keller (1950-2023) was an American Presbyterian pastor, preacher, theologian, and Christian apologist. He was the chairman and co-founder of Redeemer City to City, which trains pastors for service around the world.  He was also the founding pastor of Redeemer Presbyterian Church in New York City and the author of several best selling books. This article can be found here: https://gospelinlife.com/article/justice-in-the-bible/