Tirhkohte Thiltih Zirlai 13-na. Tirhkohte 2:36-41 – Dr. A. Zothansanga

TIRHKOHTE 2:36-41 MIZCLBSI

“Chutichuan, Isua in khenbeh kha, Pathianin Lalpaah leh Kristaah a siam ta ngei tih Israel mi tinin hre ngei rawh se,” a ti a. [37] An thu hriat chuan an thinlung a khawih a, Petera leh tirhkoh dangte hnênah chuan, “Unaute u, eng nge kan tih tâk ang?” an ti a. [38] Petera chuan, “Sim ula, in sualte ngaihdam nân Isua Krista hmingin baptisma chang ṭheuh rawh u; tichuan, he thil pêk, thlarau Thianghlim hi in dawng ang. [39] A tiam hi in tân a ni a, in fate tân pawh a ni a, ram hla taka mi zawng zawng tân leh, Lalpa kan Pathianin a koh apiangte tân a ni e,” a ti a. [40] Thu dang tam tak sawiin a sâwm a, “Tûnlai mi sual takte lakah hian intihim rawh u,” tiin a fuih nghâl bawk a. [41] A thu zâwm apiangin baptisma an chang a; chumi ni chuan mi sângthum laiin an belh ta a.

Sawi Zauna: Pentikos ni a Thlarau Thianghlim an chan a, tawng danga an tawng chuan a lo thlirtute a ti buai, a ti confuse a ni.

Petera thusawi chuan thil a ti fiah a, an thinlung a khawih a, they were cut to the heart tih kan hmu a ni. Hebrai 4:12-ah chuan, ‘Pathian Thu hi a nung a, khandaih hriam ang a ni,’ tih ziak a ni. Thinlung khawih theitu chu Pathian chauh a ni. Hei hi Thlarau hnathawh chu a ni. Pathian Thu-in mi rilru a khawih chuan Pathian hnen pan an duh thin. ‘Enge kan tih tak ang,’ an ti a. Thinlung nat kha a tawk lo va, enge maw tih an duh, an mamawh a ni.

Petera hian thil pahnih ti turin a ti a. Sim turin: sim hi rilru thlak, ngaihdan, tih dan thlak a ni. Isua chunga an tih, an chet dan kha pawi ti a, inchhir a tawk lo. Sim tur an ni: Isua an hriat dan thin, mi hnawk, khenbeh tlak a an ngaih kha Pathianin Lalpaah leh Kristaah a siam ngei tih pawmin an rilru thlak tur an ni. Baptisma chan: Khang hun lai khan Judaho hian a tlangpuiin baptisma an chang ngai lo. Gentile mi Judaism sakhua zawma, Juda mi nih duhte an baptis thin. Baptisma an chang hian an tih tak zia, Isua an mamawh zia a entir a ni. Simna hi chhunglama Pathian Thlarau hnathawh lo lang a ni a. Baptisma hian pan lam, hmuh theiha Isua ringtu an ni tih lanna a ni.

Hei tho hi Baptistu Johanan mite ti tura a tih kha a ni a. Lalpa pawn a rawngbawl tan tirh khan sim rawh u, tih tho hi a thupui kha a ni (Mathaia 3:2, 4:17)

An chunga thil lo thleng tur pahnih Petera hian a sawi a. Sual ngaihdamna an chang ang a, Thlarau Thianghlim pek an ni ang. Heng hi enge maw an tih vanga chang leh hmu an ni lo tih hriat reng a tha. A tira chang mi 120 te ngei pawh kha enge maw an tih vanga chang an ni lo. Korneli chhungte ngei chungah pawh khan Petera thusawi an ngaithla a Thlarau Thianghlim an chang ta mai a ni.

Pathian Thu hi thil tihin a zui thin. Min hmangaih em em a-tichuan a Fapa min pe a. Isua kan rina, Pathian kan hmangaih chuan a thu kan zawm ang. Isua kha engmah a tih hma, rawngbawlna pawh a tan hma khan Pathianin, ‘Ka Fapa duh tak a ni a, a chungah ka lawm em em a ni,’ tih kha a sawi daih tawh. Pathian hmangaihna, a chunga a lawmna kha amah nawr kaltu pawh a ni.

Ngaihtuah i la;

23. Bible hian i ngaihdan a thlak tawh thin em? Petera sawi hian an thinlung a khawih a ni, tih kan hmu a. Pathian Thu hian i thinlung a khawih thin em, chu chu engtin nge i bawh zui, ngaihtuahna rilru chin-ah, pawi tihnain emaw a tawp mai thin nge, thil i ti a, i che chhuak thin?