FANAU ENKAWL DAN – By Pi Sangteii w/o Pu Lalchuangliana

Kum 20 chuang fanau enkawl tawh lo hi fanau enkawl dan sawi tur pawh ka ni tawh lo va. Min tih takah chuan a tlangpuia kan hriat tur eawh ka han sawi ang a. British Philosopher Bertrand Russell khan School a din ve a, an ti. Naupang nu leh paten an va tlawh chuan naupang thenkhat chu an lo infiam a, thenkhatin lehkha an zir a, thenkhatin hlumin milem an lo siam a, a thenin bangah milem an lo ziak bawk a. Nu leh pa ho chuan, “Hetiang te chuan naupang tha an va chhuak awm lo ve?” an ti a. Bertrand Russell-a chuan, “Naupang tha chhuah ka tum lo va, puiitling tha chhuah ka tum a ni,” a ti e, an ti. Fanau enkawl
chungchagah pawh enge kan tum ber hi hriat chian a tul hlein a rinawm. Naupang nungchang tha ringawt nge ni se kan duh mi puitling? Fanau enkawl hi, a tha emaw, tha lo emaw, amaha awm mai a ni lo va. Kan enkawlna tur hian ngaihtuah tur tam tak a huam a:

1. Kan fanau chu fa mal a ni em? Hmeichhia nge mipa?
2. Chhungkaw engzat khawsa zinga mi nge ni ? Chhung rual deuh nge nupa kar maia
   khawsa ?
3. Khawtlang nunzia eng ang nge ? Enge mi dang laka an beisei (an expectations)?
4. Kohhran nun leh inzirtir dan enge?
   

Hetiang dinhmun hrang hrangah hian fanau kan enkawl dan pawh a dang zel dawn a ni. Fanaute hi khawng taka kan enkawl chuan mahnia thil ti ngam lo, mi thu chang reng rengah kan chhuah thei a. Kan thlahdul leh lutuk erawh chuan thil tha hre lo leh tih nachang hre lovah kan chhuah thei bawk a ni.

Tin, mi reng reng hian kan zirna ber chu, ‘mi tihdan zir’ (imitation) hi a ni. Naupang kal zir, tawng zir tir, chet zia, an tawngkam etc hi midangte tihdan an zir (imitate) atanga intan vek a ni. A hnu daihah lehkha an zir a, an chhiar thiam a, anmahni in ngaihtuahna an hman theih hma hian mi tihdan zir hian dam chhunga an thiam (thiam loh) leh nungchang hi an lo than lenpui daih tawh a ni.

Fanau enkawl hi nute chauhin a kan tih theih a ni lo va, kan pasal te leh kan chhungkuaa tan ngai a ni. Kan tih theih pawimawh ber erawh chu entawn tlaka kan awm hi a ni. Thil tha tam tak sawi ila – thawh hma tur, lehkha zir taihmak tur, len chhuah tam lutuk loh tur, theu leu loh tur, a hunah chaw ei tur, kut sil tur etc sawi teuhin hrilh fo mah ila, keimahnin kan tih si loh chuan an zirin an ti chuang lo vang. Chu zawng zawng chungah chuan Pathian tanpuina kan mamawh a ni.

Hetiang tlangpui hi tuna ka sawi theih chu ni mai rawh se.