HLIM HMEL – Lalchuangliana

Tun laia thalaite hla pakhat, “Min chhungkhat la,” tih Tevenin ama lehlin nalh deuha a sakah hian a thunawnah “Chutin kan hmel an hmuh hunin an hmuh nan che, nui hmel ringawta Pa hmangaih an hriat theih nan” tih hi a awm a. Kan hmel hlim ringawt pawh hi Chanchin tha hriltu a lo ni thei dawn a ni. Mi thenkhat chu an vannei a, an hmel nui sa hi an awm a, thenkhat erawh an han tawng hleka hmel nui sang mai, an tawng ngaihno bei nghal ringawt hi an awm bawk a. Mi tam ber hi chu tum deuh hmak kan ni a, hmel nui chuang miah lova thu han sawite hi an mi tak riaute hian kan han hre bawk a. Mizoten, “Tawngkam thain sial a man” kan tih te hi a lo Pathian thu em em a. ” Chhanna nemin thinrim a tireh” (Thufingte 15:1) ” Aw dam chuan mi a tiharh,” tih te hi Bible thu a ni. Pathian thu chuan in tawngka  chhuak chu chia al, khawngaihna tel ni fo rawh se tiin min fuih bawk a, ( Kol.4:6).

Ziaktu pakhat Dave Branon chuan tihian a ziak a: Nupa tuak thar te hi an awm a. Tuk khat chu mi pakhat hian an kawngkhar a rawn kik a, kawng an han hawn chuan an hmelhriat ngai pawh ni lo,  an rualpui awm vel hian hlim deuh hian, ” Good morning! In thenawm hnai Kohhran a member pakhat ka ni a, enge in tha maw tiin kan rawn hmu ve hrim hrim che u a ni,” a ti a. Kawng rawn hawntu pawh chuan a hmel hlim avang chuan tha deuhin a lo chhang a, “Restaurant ah Coffee in pahin inhmu leh ang aw,” an ti a. Tichuan zawi zawin Lal Isua chanchin tha a lo pawm tak avanga a nun inthlak thu te a hrilh a. Rei lo teah chuan chumi nupa tharte pawh chu biak inah an rawn lawi ve ta a, Lal Isua ringin an piangthar a, Bible thu an zir a, nakinah phei chuan Sunday School zirtirtu leh Kohhran upa te a lo ni ta hial a. Hlim hmel taka chibai rawn buktu khan anmahni hnenah thu a sawi ring hle a lo ni. Christian College-ah ka zir laiin nula mengmawi deuh mai hi a lo kal ve a. Ka hmuh tirh atangin ka  ngaizawng nghal ringawt mai a, a hming chu Sue a ni a. Kan inzui ta chawt mai a, kristian tha deuh mai a ni a, keipawh piangthar phur zet hi ka ni bawk a. A tawpah chuan kan innei ta nge nge a. Sue hi nupa tuak thar ka sawite fanu hi a ni. Hlim leh phur taka Lal Isua chanchin tha lo hrilhtu khan mi pakhat mai Lal Isua hnenah a lo hruai lo va, chhungkua leh thlah kal zel mi tam tak Lal Isua hnena hruaitu a lo ni zawk reng mai.

“Isua chanchin ka hre zual ang,
A khawngaihna mite hrilhin.”

Pu Lalchuangliana hian India sawrkara a hna, IAS bansanin 1973 atang khan North India-ah Missionary in a thawk a. Kum 2025 khan hun puma Missionary hna chu a chawlhsan ve ta a. A nupui Pi Thansangi nen Zotlang, Aizawlah an cheng mek a ni.