TAWTAWRAWT HNUHNUNG – Lalchuangliana

General Bipin Rawat CDS leh a nupui, Brig. L S Lidder te, hun lo taka chhiatna rapthlak tawka boralte Military Funeral Service an siamsak kha TV ah ka en ve a. Mimala ka hriatte an ni lo, mahse ka lo lainat ve em em a, ka ui em em bawk. Chutah “The Last Post” an han ham ta a, mittui hi a hnai mai a ni. “The Last Post” hi Bugle in an ham thin a, keini chuan tawtawrawt kan tih ve mai avangin “Tawtawrawt Hnuhnung” ti pawhin kan dah thei ang chu.

“The Last Post” hi sipaite an hnathawk zo, tlaiah, “Lo haw rawh ule, chawlh a hun e,” tia an in auhkhawmna a ni. Indo lai pawhin he tawtawrawt ri an hriat chuan inkah an hai a, zanah an chawl a, a tukah indo chu an chhunzawm leh mai a ni. Sipai an thiha, ‘military funeral’ an neih erawh chuan,  he sipai hian a hna a zo ta a, a chawl ta e tih nan “The Last Post” hi an tum thin a ni. Tin, Saptawng hian, “Old soldiers never die, they just fade away'”  (Sipai hlun hi thi mai lovin an ral riai riai a ni) an ti thin. General Rawat leh Brigadier Lidder te pawh an ral ta riai riai a nih hi.

“The Last Post” hian chanchin chhui dawl lem lo, mahse ngaihnawm tak a nei a. American Civil War lai khan Union Sipai Captain pakhat hian, Confederate sipaite nena an inbeih chiam hnuin, zanah Confederate sipai pakhat thi mai tur chalchang lai hi a hmu a, hmelma lam pawh ni se a khawngaih em vangin a va paw chhuak a. Mahse chu sipai chu a thi ta mai a. A hmel a han en chuan ama fapa a lo ni reng mai a. Music zir tura America chhim lama awm kha sipaiah a lo inpe niin…a ipteah chuan he “Last Post” music hi a lo awm a. An hotute hnenah hmelma sipai pawh ni se a fapa sun nan he music hi ‘play’ a dil a. A sipai pui Bugler in he hla hi a tumsak a, tichuan sipai thi sun nan an hmang chho ta zel  a ni tiin thu a darh nasa hle. Mahse thu ngaihnawm tak hi thu tak chu  a ni chiah lo a ni awm e. A music erawh
mitin hriat a ni ta tho a ni.

Bible-ah “tawtawrawt hnuhnung” tih kan hmu a. “Thu ril ka hrilh dawn che u hi. Kan zain kan muhil vek lo vang a, nimahsela tawtawrawt hnuhnung ber rik hunah chuan thawklehkhatah, mitkhapkar lovah tihdanglam kan ni vek ang.” (1 Kor.15:52) Sipai tawtawrawt hnuhnung an han ham chuan General leh Brigadier, Colonel leh Wing Commander, Havildar leh pai mawlte pawh,  an ral riai riai a. Lalpa tawtawrawt
hnuhnung a rik hunah erawh keini ringtute chu tihdanglamin kan awm thung dawn a, tawih thei chu tawih thei lovin, thi thei chu thi thei tawh lo turin, nun  tharin kan leng tawh ang a, Lalpa hnenah kumkhuain kan awm reng tawh dawn a ni.

A rei tawh lo vang tawtawrawt hnuhnung lo rik tur hi. Ringtute tan hun nghahhlelhawm a ni. Ringlotute tan thih hnihna dar ri a ni thung ang. Tunah hian tawngtai leh pianthar a va hunin a va tul em! Tawtawrawt hnuhnung chu kan za vaia tan ham mai turin  peih sa a ni!

—-

Pu Lalchuangliana hian India sawrkara a hna, IAS bansanin 1973 atang khan North India-ah Missionary in a thawk a. Kum 2025 khan hun puma Missionary hna chu a chawlhsan ve ta a. A nupui Pi Thansangi nen Zotlang, Aizawlah an cheng mek a ni.