Tirhkohte Thiltih Zirlai 7-na. Tirhkohte 2:1-4

TIRHKOHTE 2:1-4 MIZOVBSI

Tin, Pentikos ni a lo thlenin, an zain hmun khatah an awm khâwm vek a. [2] Tin, thâwklehkhatan vân ata ri, thlipui tleh angin a lo thleng ta phut a; tin, chu chuan an ṭhutna in chu a tikhat ta vek a. [3] Tin, leite amaha insem darhin, mei angin an hnênah a lo inlâr ta a. Tin, an chungah a chuang ṭheuh va, [4] an zain Thlarau Thianghlimin an khat ta vek a, Thlarauvin a ṭawngtîr ang zêlin ṭawng dangin an lo ṭawng ta a.

Sawi Zauna: Pentikos Ni (Day of Pentecost) Pentikos ni hi Juda-ten, Kalhlen Kut (Passover) an hman atanga ni 50-naah an hmang thin. Thlai thar hmasa (first fruits) Pathian hnenah an hlan thin. Hei vang hian Pentikos hi buh thar tir kut, the day of the first fruit, tiin Numbers 28:26-ah kan hmu a ni (an hman dan Leviticus 23:15-22, Chawlhkar Kut- Feast of Weeks, Deut. 16:10). Pathianin dan a pek ni niin an ngai. Thuthlung Hlui-ah chuan Israel miten Dan an dawng a, Thuthlung Thar-ah chuan kohhran miten khawngaihna Thlarau, Spirit of grace, an dawng thung ti tein an sawi thin.

Hmun khatah an awm khawm vek a, tih kan hmu a. An awmkhawmna thin pangngai, pindan chungnung, ti a bung 1:13 ah khan a ni thei a. Tin, Pentikos hian an inthawi thin avangin templea pindan pakhat a ni thei bawk. (A hmun chiang taka a ziak lo hi a lawmawm. A hmun a pawimawh lo va, an thil chan hi a pawimawh, a focus chu a ni.)

Thawklehkhat, suddenly – in rinna hman a awm lo. A lo thleng phut mai tihna a ni. Van atanga ri – hmuh theih loh, benga ri hriat theih si. Lei thil ni lo, van atangin. Thlipui tleh angin – thlarau, thli leh thaw (breath) tihte hi thu mal in ang an ni. Thlipui tleh angin a nasa a ni. Thlipui a tleh a ti lova, thlipui tleh ang ri, a sound like a violent wind, tih a ni. Hetiang deuh hi ‘Pathian Thlarauvin tui chung a awp,’ tihte, ‘Pathianin mihring hnarah a thaw,’ tihte Genesis-ah kan hmu a ni.

Mei angin– mei hi Pathian chenchilhna, a presence sawi na a ni a. Tih thianghlimna, purification sawina a ni bawk. An chungah a chuang theuh a, sat upon each of them. Chuang-thu, sat tih hi Thuthlung Thar-ah hian awmhmun, dinhmun nghet, permanence of position, condition sawi nan hman a ni.

Ngaihtuah Zui atan:

12. Pathian Thlarau hi Isua zuitute tan hian mikhual a ni hran lo. Lalpa hnathawh an hmu thin a, anmahni ngei pawh a lo hmanga, tihdamna te pawh an lo nei tawh a ni (Luka 10:9). Tin, Lalpa hian vawi tam tak a lo tiam tawh bawk. Baptistu Johana khan, Thlarau Thianghlim leh meiin Isuan a ringtute a la baptist tur thu a sawi bawk (Luka 3:16).

He mi tum hian an zavaia chungah, hmaih awm lovin a lo thleng, tih kan hmu a. Hei hi a pawimawhna enge ni ang? An rilru a in ang vekin, an inpek dan, an inpeih dante  pawh a in chen awm si lo va. An thil chan erawh a in ang vek lawi si hi.