Tirhkohte Thiltih Zirlai 62-na. Tirhkohte 12:6-19

TIRHKOHTE 12:6-19 MIZOVBSI. (5 Petera chu tân inah chuan a awmtîr rih a; nimahsela, kohhranhovin ama tân ṭhahnemngai takin Pathian hnênah an ṭawngṭaisak ṭhîn a.) [6] Tin, Heroda chuan a hruai chhuah dâwnin, chumi zân takah chuan Petera chu sipai pahnih inkârah khaidiat pahnih bunin a muhîl a; a vêngtute pawh kawngkhâr bulah an awm a, tân in chu an vêng a. [7] Tin, ngai teh, Lalpa vântirhkoh pakhat a kiangah a lo ding a, ripah chuan êng eng emaw a lo êng a; tin, Petera nâkah a bêng harh a, “Tho thuai rawh,” a ti a. Tin, a khaidiatte chu a kut ata a tla ta a. [8] Tin, vântirhkoh chuan a hnênah, “Puan veng la, i pheikhawk bun rawh,” a ti a. Tin, ani chuan chutiangin a ti a. Tin, vântirhkoh chuan a hnênah, “I puan bât ṭha la, mi zui rawh,” a ti a. [9] Tin, Petera chu a chhuak a, a zui ta a; vântirhkoh chêtzia chu a tak a ni tih a hre lo va, mumanga a hmuh emaw a ti zâwk a. [10] Tin, vêngtu tawntirh leh a dawttu an pelh hnu chuan, pâwn chhuahna tûr thîr kawngkhâr chu an va thleng a, chu chu an tân a inhawng chawp ta a; tin, an chhuak a, kawtthlêr pakhat an pêl a; tin, vântirhkoh chuan a kalsan ta nghâl a. [11] Tin, Petera chuan a harh veleh, “Lalpan a vântirhkoh a tîr chhuak a, Heroda kuta mi leh Juda mite beiseina zawng zawng ata mi chhandam tih tûnah dik takin ka hre ta,” a ti a. [12] Tin, a inngaihtuah zawhin, Johana, Marka an tih, chu mi nu Mari inah chuan a va kal a; chutah chuan ṭawngṭaiin mi tam tak an lo awm khâwm a. [13] Tin, sumhmun kawngkhâr a kik veleh a hming Rodi, nula pakhat, chhâng tûrin a va kal a. [14] Tin, Petera aw a hriat veleh, a lâwm avângin kawng chu hawng lovin a tlân lût leh ta zâwk a, kawngkhâr bulah Petera a ding tih a va hrilh a. [15] Nimahsela, anni chuan a hnênah, “I â ta a nih hi,” an lo ti a. Ani erawh chu, “Tihtak zet a ni,” tiin a ṭang ṭâlh a. Tin, anni chuan, “A vântirhkoh a nih chu,” an ti a. [16] Nimahsela, Petera chuan a kik reng a; tin, an han hawn chuan amah chu an hmu a, mak an ti hle a. [17] Chutichuan, ani chuan an ngawihna tûrin kutin a zâp a, Pathianin tân in ata amah a hruai chhuahziate chu a hrilh ta a. Tin, “Hêng thu hi Jakoba leh unaute va hrilh rawh u,” a ti a. Tin, a chhuak a, hmun dangah a kal ta a. [18] Tin, ni a chhuah veleh sipaihote chu, “Petera kha khawiah nge a awm tâk?” tiin buai namênin an buai ta lo va. [19] Tin, Heroda chuan a zawng a, a hmu si lo va, a vêngtute chu a chhuahchhâl a, tihhlum tûrin thu a pe ta a. Tin, Heroda chu Judai ram ata Kaisari khuaah a zuk kal a, chutah chuan a awm ta reng a.

Sawi zauna Heroda chu thuneihna leh larna thupui bera nei a ni a. A dinhmun sawh nghehna turin engmah tih hreh a nei lo. Juda sakhaw hruaitute leh mi nawlpuite chu an sakhua tan an tangin thahnem an ngai a. Bia leh tilawm ni a an in hriat Pathian rilru leh duh dan an hlat em em tawh tih pawh an ngaihtuah tawh lo. An thahnem ngaihna chuan a lem zo tawh a ni. Nunna Pathianin a hlut tih pawh an hre duh tawh lo. Jakoba chu Isua a rin avangin tih hlum a ni a, Petera chu Isua a rin avangin man a ni a, tanin a ta Pathianin, kohhrante tawngtaina chhangin a hruai chhuak a ni. Kohhran mite chu Isua an rin avangin tih duhdah an ni a. Mi hriat hlauvin pindan chhungah an tawngtai a ni. Thil hi engtiangin nge a lo thlen ang tih kan hre lo. Kan thiltih hian enge a nghawng dawn tih kan hre tak tak lo. Pathian remruat leh tum angin engkim a thleng dawn tih erawh chu a chiang. Heng karah hian, engpawh thleng se Pathian rin a, a thu awih erawh chu kan thlang zel thei a ni.

Ngaihtuah zui atan. 62/1. A tuk maia tih hlum tur Petera chu a naka ben a kaihthawh ngai khawpin, thlamuangin a muhil thei a ni. Isua i rin hi eng kawngah pawh i thlamuanpui thin em? Khawvelin a pek theih loh thlamuanna, sum leh nihna, ropuina leh larna, hrehawmna leh natnain a tih buai theih loh thlamuanna i nei em?

62/2. Petera mi pariatin pahnih zel inkawpin an in ven chhawk a ni. An danah chuan mitang an tlan chhuahin a vengtu sipai kha tang hrem dan tur angin an hrem thin. Petera vengtute kha an muhil maiin a rinawm loh. Lalpa vantirhkoh khan thawm kha dim em em pawhin a lang si lo. Vantirhkoh chungchang hi i ngaihtuah ngai em, engtiangin nge an chungchang, an thiltihtheihna i hriat thiam? Genesis atangin vantirhkoh hi an lang fo mai a. Tunlai hian an la inlarin, an la chein i hria em, i hmu tawh em?