Tirhkohte Thiltih Zirlai 61-na. Tirhkohte 12:4-5

TIRHKOHTE 12:4-5 MIZOVBSI. [Chu chuan Juda-te a tilâwm tih a hriatin Petera pawh chu man a tum lehzêl a (Chûng nite chu chhang dawidim telh loh ni a ni).] [4] Tin, a man hnuah chuan tân inah a khung a, sipai pâwl li, pali ṭheuh zêlin a vên chhâwktîr a; Kalhlên Kût zawhah mi zawng zawng hnênah hruai chhuah a tum a. [5] Chuvângin, Petera chu tân inah chuan a awmtîr rih a; nimahsela, kohhranhovin ama tân ṭhahnemngai takin Pathian hnênah an ṭawngṭaisak ṭhîn a.

Sawi zauna Heroda hi a hunlaia Juda-ho sakhuana an lak thupui zia, an politics hre em em mai a ni tih a hriat a ni. Ringtute kha la tam lo hle mahse Juda sakhaw tan pawl hnawk tak mai an ni tawh a. He Juda Isua ringtu lo ni ta-te leh Juda sakhaw pangngai la vuantu-te inkar kak ta hi a hmang thiam em em mai a. Jakoba a thah a Juda nawlpui an lawm hian an thinlunga ringtute an huat zia a lang a ni. Heroda khawvel politics a thiam zia a lang bawk. Juda mipui zingah a hming tha ta em em mai a ni. An kalhlen kut an lak thupui ziate hmang tangkaiin kut ni a tihhlum turin Petera a man leh ta zel a. Juda-ho thinlung hneh dan, an ngaihsan nih dan Heroda hian a thiam hle mai. Pathian biakin an be lo chauh a ni.

Kan chhui zawn theih chu Herodan Jakoba a tih hluma Juda-ho lawm em em danah hian Lalpa tan thahnem a ngaih zia, pawl lehlam ti tawh mai ang, Isua ring lo, an sakhaw kulmuk tak la zawmtute tan a (Jakoba) hnawk zia a lang a ni. A dam chhung rei lote Lalpa tan a hmang tha a ni. Petera chu Pathianin a hmang chhunzawm nasa em em a, Johana chu rei tak damin chanchin tha bu leh Thupuante a ziak a. Vawiin ni a Petera, Johana leh Jakoba-te kan hriat rengna chhan chu an damchhung a rei emaw, a tawi emaw Lalpa tan an hmang kha a ni. Chu chu a pawimawh lai tak a ni. Ringtu tha rei tak dam an awm, rei lote a thi ta mai pawh an awm. Mi hriat hlawh an awm, tuma hriat loh pawh an awm. Pakhat a ropui a, pakhat a nep a ni lo. An dam khua a sei emaw sei lo emaw, an khawsak a ziaawm emaw an rethei emaw a pawimawh ber lo,  an damchhung hun an hman dan kha a ni pawimawh ta zawk thin chu.

Ngaihtuah duh tan. 61/1 Tunlai politics tham takte leh Heroda in anna I hriatte han sawi the. Ringtute tana mi hnawkte chungah eng rilru nge i put ang?