Tirhkohte Thiltih Zirlai 48-na. Tirhkohte 9:19b-25

TIRHKOHTE 9:19b-25 MIZOVBSI Tin, Damaska khuaa zirtîrho awmte hnênah chuan ni eng emaw zât a awm a. [20] Inkhâwmna inahte chuan Isua chu Pathian Fapa a nihzia thu a tlângaupui ta nghâl a. [21] Tin, a thu hretu zawng zawng chuan mak an ti hle a, “He mi hi Jerusalem khuaa he hming lamtute tiduhdah ṭhîn kha a ni lo vem ni? Chûng mite chu puithiam lalte hnêna phuar chunga hruai, a rawn kal chhan a nih kha,” an ti a. [22] Saula erawh chu a lo chak lehzual a, chu mi chu Krista a ni tak zet tih a hrilhfiah a, Damaska khuaa Juda awmte chu a tidang hiau ṭhîn a. [23] Tin, ni rei tak hnuah chuan Saula tihlum tûrin Juda-te chu an inrâwn a; [24] nimahsela, Saula chuan an phiar thu chu a lo hre ta a. Tin, tihhlum tumin kulh kawngka tinah chuan a chhûn a zânin an châng ṭhîn a. [25] Nimahsela, a zirtîrten ani chu an hruai a, zânah kulh tukverhah bâwmin an thlâk thla ta a.

Sawi zauna :  Isuan a tawh chinah chuan Saula a inthlak chiang hle mai. A huat em em, phuara tan ina khung a, tihhlum hial pawh a tum thin Isua ringtu a ni ve ta. A thu huat ber kha a tlangaupui ta a, um zuia man a tumte kha a thiante an ni ta a, a thawhpui thinte kha amah hawtu, tih hlum tuma kulh kawngka tina changtu-ah an tang ta. Isua hi Pathian Fapa a ni tih a tlangaupui ta a. Stephana ang mai khan amah hnialtute a ti dang ta hiau mai thin a ni. Heng danglamna nasa tak mai amaha thlentu chu Isua a ni. Ni thum chhung chawngheia a tawngtai chhan pawh Isua a tawh vang a ni. A mit a lo var hnua engmah a ei hmaa baptisma a channa chhan pawh Isua vang a ni. A thusawi ber pawh Isua chungchang a ni.

Ngaihtuah zui atan: 48/`1. Saula hian a mit a var leh takah chuan rei rial lovin, ‘Isua chu Pathian Fapa a nih zia a hril ta nghal (immediately) a,’ tih kan hmu a ni. Thuthlung Hlui a lo bel em em thin chu a awmzia a lo hre fuh ngai reng reng lo a, Isua nihna an hre chiang ta chu Mosia lehkhabute, zawlneite thu leh Sam-te chu a fiah ta uarh uarh mai a ni, Pathian Thu chu Isuaah a in rem dik ta thlap mai a ni, ti zawng te pawhin a sawi theih awm e. A thu a lo bel tawh em avang chuan huaisen takin chanchin tha, Isua nihna chu a sawi ta piap piap mai a ni.

Isua tel lo va Thuthlung Hlui, Bible thu hrim hrim hian awmzia leh hlutna a hranin a nei lo tih i hre thei em? Isua tel lo va Thuthlung Hlui sawi fiah tum hlauhawm zia Saula atang hian i zir chhuak em?