Joba, Isua leh Chhandamna Rimawi – Robert L Chongthu IAS

Tin, an hnenah, “Hetiangin ziak a ni, ‘Krista chuan hrehawm a tuar ang a, ni thum niah mitthi zing ata a tho leh ang a, ama hmingin simna thu leh sual ngaihhnathiamna thu Jerusalem khuaa ṭanin, hnam tin hnenah an hril ang,’ tiin. – Luka 24:46-47
 
Kristian tam tak chuan Joba bu hi hringnuna zawhna harsa ber pawl “Eng vangin nge mi ṭhaten an tawrh ṭhin?” tih chhanna zawn nan an hmang ṭhin a. Chutiang zawnga Joba bu chhiartu tam tak chu an beidawng fo mai. Pathian khan Joba kha a tawrh chhan mumalin a hrilh bik tlat lova. Hrilh ahnekin Pathian chuan a kutchhuak ropuizia leh chutiang siam tura finna a mamawhzia chungchang zawhnain a chhang let daih zel. Hei vang hian Joba bu hi hriat thiam harsa leh, a chang phei chuan, beidawnthlak tak ang pawhin a ngaih theih awm e.
 
Heti zawng hian thlir chhin teh ang, Joba bu hi finna thuril hmanga tawrhna hrilh fiah tumna lo ni lo ta se eng nge a nih ang? Isua Krista lam min kawhhmuh hi a thil tum laimu a lo ni zawk mai lo’ng maw?
 
Luka 24 a kan hmuh angin a thawh leh hnu-ah khan Isuan felfai takin Thuthlung Hlui bute hi a khaikhawm a. Pathian thu bute chuan Messia chungchang an sawi a, ani chuan a tuar ang a, thihna ata a tho leh ang a, hnamte hnenah ngaihdamna a la thlen dawn a ni tih a sawi a. Isua sawi danin he chhandamna rimawi hi Hebrai Bible bu puma thu laimu inzam chhuak chu a ni.
 
He thlirna tlang aṭanga thlir chuan Joba bu hi tawrhna thawnthu ringawt a ni tawh lo. Messia lo la kal tur lo thlir lawkna a ni zawk.
 
Joba dikzia leh felzia sawinain Joba bu hi a inṭan a. Pathian leh a ziaktu hian Joba chu mi famkim, mi ngil tak leh Pathian ṭih mi niin an sawi a. Pathian phei chuan “ka chhiahhlawh” a ti hial mai. Hetianga sawina hi a pawimawh riau; a chhan chu Thuthlung Hluia mi bik tlem tePathianin a hna ṭul bik thawk tura mi dik a thlan a chhiahhlawh Nova leh Abrahama te ang hozingah Joba hi a tel ve tihna a ni.
 
Mi dik a ni nachungin Joba chu tawrhna nasa tak mai, a phu vang ni hauh lova tuar turin pek a ni a. A rosum zawng zawng a chan a, a fate an thi a, a hriselna a hloh a, a hmingṭhatna te hial pawh a hloh ta! A lehkhabu hian Joba tawrhna chu a awm lo a ni tih a tarlang nawn fo a. Pathian meuh pawhin Joba chu chhan ṭha tak awm lova tuar a ni tih a puang hial bawk.
 
Hetiang thil awm dan hi hriat tawhna kan nei ngei ngei ang.
 
Thuthlung Hluiah hian Pathian chuan mi dik, mite tawrh aia tuar tura koh chhuah bik a nei fo mai. Nova chu tuilet karah dam chhuakin thilsiam tharte tana malsawmna hnar a lo ni a. Abrahama chu a engkim a kalsanna zarah hnam zawng zawngte engthawlna tur kawng a lo ni a. He’ngah te hian Pathian mi thlan a chhiahhlawhte chuan nasa takin an tuar a, an rinawm tlat a, Pathian chhandamna thiltum atan hmanraw pawimawh tak tak an ni zel ṭhin.
 
Joba pawhin chu kawng tho chu a zawh a ni.
 
He lehkhabu lairilah hian Joba tawrhna ni lovin Joba’n tawrhna a hmachhawn dan hi a pawimawh lai chu a ni. A ṭhiante anga Pathian chu engtin tin emawa sawi fiah tum ve lovin Joba chuan a tawrhna chu Pathian hnen a thlenpui hmiah a. A ṭap a, zawhna a zawt a, a lungawi lohna hrilhin a rilru hrehawmna zawng zawngte chu Pathian hnenah a leih baw vek a. A chhungrila a duh ber chu Pathian nena hmaichhana inhmuh a ni.
 
Pathian a lo inlar tak hnuah pawh Joba chuan hrilhfiahna a beisei ang a hmu chuang lo. Thil ropui zawk erawh a dawng: Pathian chenchilhna chu. Pathian ropuizia leh finzia a hmachhawn takah chuan Joba pawh inngaitlawm takin Pathianah a tlu lut a, a zawng zawngin Pathian kutah a inpe ta zawk a ni.
 
A dawt leha thil thleng hi he lehkhabua en kân hlawh ber lai a ni.
 
Pathian chuan Joba ṭhiante chu zilhhauvin Joba ṭawngṭaisakna va dil turin a ti ta a. Dik lo taka tuartu chu tunah chuan midangte tana ṭawngṭaisak turin beisei a ni ta zawk a, a chunga an thiltih avanga ngaihdam dilna Pathian hnenah a thlenpui leh si a nih chu. Joba chu thu thlensaktuah a ṭang ta! Misualte leh Pathian inkarah a ding a, a ṭawngṭaina chu Pathian pawhin a pawm a ni.
 
He thil thleng hian Isua Krista dinhmun a hrilh lawk a ni.
 
Joba ang thovin Isua pawh kha Pathian chhiahhlawh mi fel leh dik, Pathianin a hmangaih em em a nih thu kan hmu hmasa a. Joba angin a sualna ni lovah a tuar a. Joba ang bawkin hriat thiam loh niin dik lo taka puh a ni hial a. Isua erawh a kal thui deuh zawk a. Hringfate sual leh tawrhna zawng zawng chu a phur a. Kraws ah chuan mi fel tawrhna tawpkhawk tuar a lo ni ta a ni.
 
Joba ang lo takin Isua chuan a ṭhian mi tlemte chauh a ṭawngṭaisak lo. Khawvel zawng zawng tan a ṭawngṭai.
 
Mihringte tawrhna chungchanga Pathian chhanna chu hrilh fiahna mai ni lovin mihring bawk a ni tih kraws chuan a tilang a. Pathian chu mihringte tawrhna lakah a inthiarfihlim mai lo. A rawn lut ve zawk a ni. Isua Kristaah chuan Pathianin tawrhna chu amah leh amah a inbel a, sual chu a bupuiah a bei a, thawhlehna hmangin thihna a hneh a, ngaihdamna leh thilsiam thar tan kawng a hawng zui a ni.
 
Chu vangin Joba bu hian amah leh amah piah lamah kawh a nei a ni. Ringtute hi kan lungngaihna dik taka tilang thiam turin min zirtir a, hriat thiam lohna karah pawh Pathian ring tlat turin min fuih a, tawrhna karah chhel taka awm turin min ti a ni. Chumi piahah, a pawimawh berah chuan Joba’n a lo hrilh lawk Isua lam en turin min ti a ni.
 
A tawpkhawkah chuan Joba chanchin hi Isua chanchin lo sawi lawkna a ni. Genesis a inṭan a, kraws leh thlan ruaka a vawrtawp thleng Bible rimawi zinga pakhat a lo ni a. Pathian chhiahhlawh mi dik leh fel tawrhna zarah ngaihdamna chu pek chhuah a ni a, sual chu hnehin a awm a, hnam zawng zawngte tan beiseina chu dah a ni.
 
Joba bu hi tawrhna chungchang ringawt a ni hran lo. Joba ropui zawk kan Lalpa Isua Krista lam min kawhhmuhtu a ni. Ani chu kan tana min ṭawngṭaisaktu mi dik leh fel, kan tana tuar a, thi a, tho leha, tunah kan Pathian hmaa a mite tana dinga chu a ni.