Tirhkohte Thiltih Zirlai 46-na. Tirhkohte 9:1-9

TIRHKOHTE 9:1-9 MIZOVBSI Saula erawh chuan Lalpa zirtîrho a vau thu leh thah a tum thu a la chhâk chhuak ta cheu va. puithiam lalber hnênah a kal a, [2] Damaska khuaa inkhâwmna in zawng zawnga mite hnêna pêk tûrin lehkhate a dîl a, Kawnga mi chu tu pawh a hmuh chuan hmeichhia pawh, mipa pawh, Jerusalem khuaah phuar chunga a hruai theihna tûrin. [3] Tin, a kal laiin, Damaska khua a thlen dâwnin, thâwklehkhatan êng, vân ata a vêlin a lo êng ta phut a; [4] tin, leiah a tlu a, a hnênah, “Saula, Saula, nangin engati nge mi tihduhdah?” tiin aw a hria a. [5] Tin, ani chuan “Lalpa, tu nge i nih?” a ti a. Tin, Lalpa chuan, “Isua, i tihduhdah hi ka ni e; [6] nimahsela, tho la, khuaah lût rawh; tichuan, i tih tûr an lo hrilh ang che,” a ti a. [7] Tin, a hnêna kal vete chu dang rengin an ding a, aw zawng an hre na a, tu mah an hmu si lo va. [8] Tin, Saula chu lei ata chu a tho va; tin, a han meng a, eng mah a hmu thei ta lo va; tichuan, a kutah an kai a, Damaska khuaah an hruai lût a. [9] Tin, ni thum khaw hmu lovin a awm a, eng mah a eiin a in lo va.

Sawi zauna : Lalpa vana hruai chhoha a awm hnuin a hmasa berin zirtir Petera leh Johana rawngbawlna a rawn lang a. Eitur semtu atana thlan chhuah Stephana leh Philipa an rawn lang leh a. Tunah midang daih Paula leh Barnaba rawngbawlna a rawn lang chho leh dawn a ni. Tirhkohte Thiltih hi mumal taka ziak a ni. Mi chi tinreng Pathianin a thu puan darh nan a hmang a ni tih kan hmu thei a ni. Saul tih hi Hebrai hming a ni a. ‘Tawngtai a dil, prayed for,’ emaw ‘thleng tura duh, dil, desired,’ tihna a ni. Paul/Paulus  tih hi Latin a ‘te, small,’ tihna a ni. Saula pa hi an ngaihhlut tak mai Rom mi nihna, Roman Citizen nei a ni a, chuvangin Saula hi a pian tirh atangin Rom mi a ni nghal a ni. Khang hunlai khan Rom mi chu mi tha, vantlang chunga leng an ni a. Inchhuan phahna tham a ni. Rom mi chu an man pawn dik leh uluk taka a chungthu rel tur a ni a (fair trail), nghaisak/vuak theih an ni lo a (immunity from torture), lal ber Kaisara hnena an chungchang thu ngaihtuah tura thlen theihna an nei bawk a ni. Saula hi Rom mi a nih avangin Latin hming hi a piantirh atanga a neih ve reng a nih a rinawm. Hei vang hian a pianthar hnua Saula hi Paula ni ta anga sawina hi a dik lo niin a lang.

Saula hi Juda sakhua tana thahnemngai tak mai a ni. Isua ringtute kha Juda sakhaw tana mi hnawk niin a ngai nghet tlat a ni. A kalna apianga Kristiante man kha Pathian tana thil tha tak tiah a inngai a ni. Numbers 25 a Phinehasan Pathian tana thahnem a ngaih avanga thil sual ti a thah a hri a lo reh ta ang deuh khan, Kristianna kha tih reh ngai hri angin a ngai niin a lang.

Kawng; Kristian tih hi Tirhkohte Thiltih bu-ah hian Kawng tiin sawi a ni. A inhmeh hle mai. Kawng reng reng chuan thlen tumna (destination) a nei thin. Isua ringtu nih hi enge maw rin bik neih, tih dan bik enge maw riau neih, sakhuana thil a ni ber lo. Engkim Isuan a hneh vek nun, a way of living, chhungril nun, nun kawng zawk hi a ni. Isua zui nun hi enge maw chawlhnia va tih zawk, enge maw chhung va in sawrbing lam a ni lo va, nitin nun, zing thawh atanga mut thleng, kan thawk tek tek chhung kan nun a huam vek a ni.

Ngaihtuah zui atan: 46/1. Saula khan Kristiante tihduhdah kha Pathian tana thahnemngaihna niin a hre tlat mai a. Pathian tana thahnemngai ni a inhriat lai hian Isua ringtu mi hnawk tak, Pathian dotu, rinnaa mi ti thuanawp thin nih theih thovin i hria em?

46/2. Enge maw uar bik, chin dan bik midangten an tih ve loh avanga an dik lo ta ni a i ngaih thin thil a awm em? Isua neitu nih bak thil dang engemaw Pathian lawm bik riau nihna tur thilte a awmin i hria em?

46/3. ‘Engati nge mi tihduhdah,’ tih hian Isuan amah ringtute chunga thil thleng a ngaihpawimawh zia, anmahni nena a in identify zia a lang chiang hle mai a. He thu hian a thlamuan chein a fuih che em, i huaisen phah em le? (Isua hi ringtute zingah a cheng chang a ni lo va an chunga thil tha lo thleng hi a chunga thleng angin a ngai a ni.)