Tiam Tlat E (I Married You) XXX– Walter Trobisch

Bung 8 chhunzawmna

Airport-a min hruai turin Daniel-a chu a lo thleng a. Khualchhawn dawhkan kan kal pelh lai chuan telephone dawngtunu chuan a ṭhuthmunah lu tunin a mitmei hmangin chibai min lo buk a. Ka lu bu zauhvin ka chhang a. Chutah chuan Ingrid-i tan room ka lo hauh lawk hauh lo tih ka hre chhuak zawk a.

Khualchhawn hnenah chuan mi pahnih awm theihna room-ah ka insawn mai a rem leh rem loh kan zawt a. Kar tawp atan chuan an khah vek tawh thuin min chhang a.

‘Niminah emaw, tukinah emaw kha chuan min han zawt la a ṭha tur,’ a ti a.

‘A zahthlak pawh ka ti, Daniel. He laiah kar tluanin inneihna leh inpek tawnna chungchang sawiin ka buai em em a, ka nupui nena kan awm dun theihna tur room ka lo ngaihtuah theihnghilh daih mai a nia.’

Khualchhawn chuan ka room awmna chhawng, a bul hnai tea mi pakhat awm theihna room chu la mai turin thurawn min pe a, chu chu kan la ta mai a.

‘Kan inhau a ang viau ang a,’ ka han ti a.

Daniel-an min lo hnem vat a: ‘A hran ve vein mi in kawm thei ang a, a ṭha viau tho asin. Tukinah Esther-in Fatma-i kawmna tur atana mikhual room kan lo nei kha ṭha ka ti riau asin.’

Esther-i chuan car-ah min lo nghak a. Fatma-i nen an inkawm lai leh chhun laia kan inbiak lai khan tu in nge naupang lo awm tih ka han zawt a. 

Chhuang tak maiin, ‘Kan pa hian,’ a ti a.

Daniel-a erawh chu a lo rum nghut a.

‘Hrehawm i ti em ni, unaupa?’

‘Tehreng mai! Hetianga tih a chin chuan eng nge kan thlen ang pawh ka hre love,’ fiamthu hian a ti a. Ngunthluk zawkin a han sawi chhunzawm a. ‘Tak takin maw Walter, hetia ka rawngbawlnaa a han tel ve takah hian Esther-i hi mi danglam a lo ni daih mai. Nupui thar ka nei a ni hawt mai.’

‘Tunah tuin nge nau awm a?’ tiin ka zawt leh a.

‘Daniel-a nen in ruala airport ka lo kal theih nan tiin Fatma-in awm a lo chuh ve a.’

Airport pana kan tlan mek lai chuan Daniel-a chuan hotel-a telephone dawngtu hnenah khan counselling dan zirtirna ka pek leh pek loh min zawt a.

‘Tukin dar kaw pelh hnu deuhah khan rawn biak che ka tum a, mahse telephone chhangtu khan aw nem, zaidam takin: “Ka pu, buaina thuk tak i nei a ni ang tih chu ka ring. Mahse beidawng miah suh aw. Daktawr chu tunah hian a mu hahdam rih a. Chhun laiah bak ka kai tho thei lo. Chumi hunah i lo be leh a nih chuan a puih theih ngei che ka ring,” a ti a.’

Kan pathum chuan kan nui dar dar a.

‘Polite taka chhang turin ka ti ringawt alawm,’ ka ti a. ‘Mahse nang ber chu ka “damlo” hmasa ber i ni ang tih tuin nge ring ang ni? Vawiinah pawh phone ka dawng hnem khawp mai. He khawpuiah hian phone hmanga counselling beih hi engah nge maw tu mahin an la tih loh ni?’

Chutih lai mek chuan airport chu kan thleng a, mahse Ingrid-i te thlawhna chu darkar chanve laiin a rawn tlai dawn tih thu kan dawng a. Kan nghah mek laiin Daniel-a leh Esther-i te chuan a hma tlaia ka thusawi chungchangah khan sawi duh an lo nei a.

‘Nizan khan triangle line kawi nei kha kan sawi a,’ tiin Daniel-a chuan bul a han ṭan a, ‘chumiin a kar awl a siam dan nen, “inlaichinnaa a kim lo” lai i tih kha. Mahse inhual tawh tam tak hetianga sawi ve theih loh tur hi kan hre nual asin. An dinhmun chu a dang daih asin. Hun rei tak chu an lo inhre tawh a. An inhmangaihnaah pawh an chiang. An rinawmzia pawh a taka fiahin vawi tam tak a lo awm tawh. Hun harsa pawh tam tak an lo pal tlang tawh a. Hmangaihna an tihlan danah pawh pen khat te tein hma an sawn a, chumi rualin mawhphurhna lak kawngah pawh hma an sawn bawk. Mahse pawn lam thil eng emaw avangin an la innei thei lo mai chauh a ni. Chenna hmun tur an nei lo emaw, entir nan an pahnihin zirlai mai an la ni emaw pawh a ni thei. Chutah chuan kim lo emaw kawrawng emaw a awm hauh lo, inneih leh tisa pumkhat an nihna turah awl tlem te chauh a awm tih mai a ni. An dinhmun chu hetiang deuh hian a lang ang.’

Daniel-a chuan a jacket aṭangin card a rawn phawrh a, chutah chuan triangle lem, line in parallel vek, a tawp bera linekawi bik pakhat chiah nei a han ziak a:

A han sawi chhunzawm a: ‘He’ng mite hi chuan, “Kan inneih hmaa nupa kan nih hi kan thiam loh a ni bik lo. Pawn lam thil vangin hetiang hian kan awm a ni a. Duhthusam chu a ni hauh lo, mahse kan tan chuan sual ro rovah a zia deuh alawm. Heti zawng hian risk kan la mai a ni, kan tisa chakna hmeh mih reng a, inkiltawih taka tawm im reng leh inchan palh hlauh ai chuan a lo zia deuh a.” A nihna takah chuan Walter, an thusawi ka han ngaihthlak hi chuan dikna chen pawh a awmin ka hre ṭhin. Inneih hun nghah reng chuan kha’ng thiltihtheihnate inlaichinna kha an tibuai zawk daih dawn asin tisaa an inpek mai ai daihin.’

‘Hei tak hi chu dinhmun buaithlak leh inhnialna pawh chawk chhuak tam ber chu a ni,’ tiin ka chhang a. ‘Pawn lama mite hian anni va teh a, lo dem ngawt turin dikna kan nei hauh lo.’

‘Mahse ṭhenkhat hian inneih hmaa mipat hmeichhiatna hman hian inneihnaah a tihlim zawk an ti a ni lo’m ni?’ tiin Esther-i chuan min lo zawt ve leh a.

‘Keimahah chuan,’ tiin ka han chhang a, ‘Inneih hmain mipat hmeichhiatna lo hmang lo ta se an inkar a chhiat daih tur thu hi nupa tuak pakhat mah ka la hre lo. Nupa tuak ṭhenkhat, inneih hmaa mipat hmeichhiatna an hmanin an inkar thu a tihchhiat loh thu sawi erawh ka hria a. Mahse chhan ṭha tak avanga inneih hmaa mipat hmeichhiatna hmang tawh, an han thlir let a ngaihdan thar nei nupa tuak hi ka hre hnem daih zawk asin.’

‘I lehkhabu ziah, I Loved a Girl (Hmeichhe pakhat ka hmangaih a) tih kha kan lo chhiar a. François-a leh Cecile-i te kha chumi a hnuhnung zawkah chuan an tel em?’

‘An telin ka ring. Cecile-i man sang tak François-an a pek theih loh kha triangle-a awl lai te reuh te an lo kal kan mai chhanah khan ṭha tawkah an lo ngai kha a nia. Tunah chuan lo nghak zawk se an intih tawh zawk ka ring.’

‘Chu’ng nupa angte hnenah chuan eng nge i sawi ang?’

‘A hmasa berah chuan an inneih loh chhan zawng zawng ka zawt chhuak vek phawt ang a. A chang hi chuan a chhan dik tak hi chu chapona dik lo mai hi a ni ve ṭhin a. Dawhkan leh khum chauh neia nupa nun bul ṭan tur khan an chapo mah mah a lo nia. Engah nge an duh loh ni? A tirah chuan harsatna hi han awm ve neuh neuh se a ṭha alawm. A kaw tawpa ṭan hnuah chuan hma lam pan chauhvin a kal theih tawh asin, tiin ka hrilh ang.’

‘A nih chuan bungbel pawh nei mumal lova in te tak te luaha bul ṭan tawp mai tur pawhin thurawn i pe dawn tihna em ni?’

‘Bedroom thar lian ṭha tak neih loh vanga inneih hun sawn hlat zel kha a atthlak ka ti mai mai a nia.’

‘He’ng laia kan buaina chu maw,’ tiin Daniel-a chuan min han hrilh fiah a, ‘kan kohhran mi tam tak an inneih loh chhan chu mingo ho thawmhnaw ang an neih zawh loh vang a nia – mipa tan suit dum leh hmeichhe tan inneih kawrfual var. Midangten a hun an sawn hlat zel chhan pawh kan hnam dana inneih ruai buatsaih hi a hautak lutuk a.’

‘Chu chuan insengso vak lova inneih buatsaih hi intihhmuh zel tura kan inzirtir a ngai tih keimahah chuan a nem nghet sauh sauh mai!’ ka lo ti a. ‘Hun rei tak inhual tawh, an hmangaihna leh rinawmna pawh fiaha awm tawhte chu an chhungte pawhin innei thuai thuai tura an fuih a ngai a ni.’

‘Chu chu theih loh ta se?’ Daniel-a chuan a la ti leh zel a.

‘Chutih hunah chuan an harsatna pakhat chu taksa an inpekna – tisa chakna hrikthlakna – hmangin su kiang mah se harsatna dang tam tak a lo chhuak zel dawn tho tih in hriattir a ngai ang.’

‘Chutianga inkawpte chuan eng harsatna nge an neih tlangpui?’ Esther-i pawh chuan a rawn ti ve a.

‘Chu’ng inkawpte chu kir leh theih a ni tawh lo ti hriat nawntir an ngai a ni. Khami ni aṭang khan kawngka vir thei kha a invuah nghet tlat tawh. Chu bakah mahnia awmna tur hmun an neih loh chuan inher rem te kha a harsa ṭhin a. Mipa aiin hmeichhia khan awmna hmun him neih loh hi an tuar zawk ṭhin a, chu chuan nupa nunah pawh kham khawp hmu lovin a awmtir reng thei a ni.’

‘A nih leh indanna lam te hi?’ Esther-i chuan a ti leh a. 

‘Duhthlanna an siam lai hian he’ng thleng thleng hian an lo ngaihtuah lo tlangpui a. He harsatna hi duhthusama sut kian theih a ni lo tih an hre chhuak thuai a, eng kawngah pawh insiam rem ṭulna a lo awm zel bawk a. Inneih zet loh chuan rilru te hi a inhmu duh lo khawp mai.’

Ingrid-i te thlawhna pawh a tawpah chuan a lo thleng ve ta a. A chuangte ho pawh an lo chhuak ṭan a.

Tichuan ka nupui pawh ka va hmu a. Ngil takin, zahawm takin step-ah chuan zawi muangin a rawn chhuk a. Suit rawng buang inbelin a nghawngah chuan scarf hring a awrh a. A rawng ngainat zawng tak a nih saw, ka ti rilru a.

Thlawhna leh airport inkara zei taka a rawn pen phei paha Swedish rawng kai bana mawi lo a ban tlawntlai ṭha tak a rawn vai hah hah lai chuan he nu chhelo tak pasal ka ni hi ka lo inchhuang ru veng veng a. Daniel-a erawh a ngawi reng a.

Kan lam hawia ban a rawn vai lauh lauh lai chuan Ingrid-i hmel chu a faiin a eng phet mai hian ka hria a. He nu tho hian hmanni lawkah lehkhathawn chhiar hrehawm tak a rawn ziak tih pawh a awihawm loh hial zawk.

A bag khai chu ka melh a, Daniel-a leh Esther-i te tana thilpek ka ken theihnghilh kha a rawn theihnghilh ve loh hram ka beisei ru hle a.

Inhmangaih taka chibai kan inbuk zawh hnuin airport restaurant lam kan pan a. Kan paliin dawhkan kan kil a, ei tur kan lam nghal a. Kan nghah pah chuan Ingrid-i chuan thilpek a rawn kente a han sem a: Esther-i tan kawr, Daniel-a tan necktie, an ina tar tur Austria tlangram lem chuang calendar leh an fate inkhualtelemna tur thil.

An beisei loh deuh thilpek an dawn avang chuan an innel nghal hle mai. Ṭhian hlui inhmukhawm ang maiin kan titi nghal hlut a. Ingrid-i titi thiamzia mawlh chu ka lawm a.

Ingrid-i chu a pianna avanga American mi a ni tih an han hriat chuan United States a mite chuan Africa rama mite harsatna ang tho hi an hmachhawn ve em, inneihna triangle hi an mamawh ang thovin an mamawh ve em tih an hre chak hle a. Daniel-a pawhin nawmchenna hmun, serh leh sang reng awm lohna chanchin a chhiarte a lo sawi zel bawk a. Chu’ng hmunah chuan nupa an va kal a, inngaizawng tak tak si lovin an duh duh an va inkawp lawr a, tichuan an kawppui ngaite nen bawk an haw leh ṭhin a. Mahse he’ng hmun enkawltute hian hetianga lo kal nupate hi an inkawp fuh rei ngai lo tih an lo hmu chhuak a ni awm e. Anmahniah eng emaw hel a awm tlat ṭhin.

‘Ni e,’ Ingrid-i chuan a han ti a, ‘he’ng hi “kawppui pakhat neih ninawm tak” nun an tih aṭanga hawi khawthawnna hmunah an ngai a, mahse a nghawng chhuah chu khawharna leh ruak riauva inhriatna nasa zawk a ni leh ṭhin. African hovin an mamawh tluk zetin American ho pawn triangle chu an mamawh. Kawppui pakhat chauh neih hi zinkawng nuam tak, inneihna huanga nupa nun leh hmangaihna luan za tirtu a ni thei tih kan tarlan a ngai khawp mai. Uire tluka ninawm leh inṭhen tluka nun ruak hi a awm lo.’

Esther-i chuan duhthusam a lo nei a. ‘He thu hi vawi khat chu a huhovin puang thei ila a ṭha ngawt ang, kan pali, African nupa leh European-American nupa te hian.’

‘Ni e, African hovin an African pui tho ka aṭangin he thu hi hria se a hlawk ngawt ang,’ tiin ka lo ṭawmpui a.

‘Chu ai mah chuan American leh European ten African ka aṭanga an hriatin a nghawng thui zawk ang,’ Ingrid-i pawhin a lo ti ve bawk a.

‘Kei pawh ka ring,’ tiin ka lo tuihnih a, Esther-i lam hawi pahin inman takin ka sawi zawm a, ‘bial thutak chauh sawi in nih a – nihna baka lang mahni intheh lar tum bial emaw mahni inti te tlat bial emaw in nih loh chuan. He’ng bial mahni inti te te hian mi hmuha inngaitlawm ang taka lan an duh ṭhin a. Te zawka inhriat tlatna hian rilru chapo a lo khuh mawi mai mai duh khawp asin.’

‘Kan nu hi counselling lam zirtirna lo pe zel lo teh,’ tiin Daniel-a chuan nui huah huahin min han hau fiam a. Ingrid-i lam hawiin: ‘In pa hian kan nu hi pastor-ah a chhuah a, kei lah nau awmah min chhuah daih a. Ka tih chu, kan chhungkuaah hian pastor pakhat awm hi a tawk viau a ni.’

‘Kan harsatna tawh ang tho an tawk ve a nia Ingrid,’ tiin ka han hrilh fiah a, ‘zar buaitu an nei ve reng a, a inkahpup chaw chho zut mai, an hna leh an nupa nihna inkarah inhruipawh a awm ve reng a. Midangte harsatna chu a ngaithla hman reng a, a nupui harsatna chu a ngaithla hman meuh lo. A inang i ti ve em?’

Ingrid-i chu a han inngaihtuah vang vang a. Heti hian a rawn ti ta a: ‘Chin fel dan pakhat chauh a awm. Tawm bona hmun in mamawh a ni. Khaw pawnah tu mahin an hriat loh leh tu mahin an rawn zawn hmuh theih lohna tur che. Chutah chuan kar khatah vawi khat tal, ni khat emaw ni chanve emaw tal in va kal dun ṭhin ang a.’

Esther-i chuan, ‘Chutianga kalna tur hmun chu ka hria,’ a rawn ti var a.

‘Khawiah?’ Daniel-a chuan a rawn ti a.

‘Kan pahnih chauha kan awm hunah ka hrilh ang che,’ chimawm hmel taka nui chungin a rawn ti a. ‘Midang tu mahin an hre tur a ni lo.’

‘Walter-a chu tihbuai loh a duh chang chuan Catholic monastery (puithiamte inkhung hranna hmun) ah a kal ṭhin asin,’ Ingrid-in a ti a.

‘Nia, a dik,’ ka ti a, ‘ka kal lah hian an puithiam nupui nei lote hi ka thik riau zel.’

Esther-i chuan ka tih tak tak leh tak tak loh a hre duh a.

‘A ti tak tak ang,’ tiin Daniel-a chuan min lo chhansak a. ‘Nupui nei tawh tu pawh hian nupui la nei lo se intih chang an nei vek ang.’

Daniel-a chuan thawktu pakhat hnenah bill lo keng turin a han hui a. Amahin pek vek a tum tlat lehnghal a. A hlawh a tam loh avangin a inphalna chu a sang hle tih ka hre tho naa African dana mikhual an duatna chu hnarsak loh hram kan duh a.

Airport aṭanga hotel kan pan chuan a hnungah kan nute pahnih chu an ṭhu a. Esther-i chuan tawm bona chungchanga thurawn ṭha tak a pek avangin Ingrid-i chungah lawmthu a sawi nawn leh a.

Ingrid-i leh Esther-i te an titi dun lai chuan Daniel-a chuan, ‘Lehkhabu pakhat, a ziaktuin counsellor te hi thurawn pe lo tura a tihna ka chhiar tawh asin.’

‘Thurawn ṭha lo tak a nih chu tiraw?’

‘Ni e, mahse a sawi dan chuan mi thurawn pek chu kawng kawhhmuh tihna a ni a tia. Chutiang tih loh tur chu a tia.’

‘A pumpelh tak tak theih loh, Daniel. Kawng kawhhmuh loh pawh hi kawhhmuh dan chi khat a ni tho asin – a finthlak mah zawk pawh a ni mai thei. Paul Tournier-an tu mah hi chhia leh ṭha chungchangah ngaihdan nei lovin kan awm thei tak tak lo a tih leh ngawih chuh tlat pawh ni ila kan rilru chhungril leh duhna tak tak hi chu miin an ring thiam vek tho tih hi ka ṭawmpui khawp mai.’

‘Engmah sawi lo pawh ni la, i ngaihdan tur awm ang chu hun tam tak sengin a lo zeldin ang a. Chutianga a tih chuan dik lo zetin thu a lo titlu ringawt thei a. Ka ngaihdan chuan tlang takin kan ngaihdante chu midangte hriattir mai ila, chu chu mi rinawm nihna a nih bakah a hlauhawm lo zawk daih a ni – chutih rualin kan ngaihdan an pawm leh pawm loh chungchangah zalenna pe thiam ve bawk ila.’

‘Mahse Walter, chumi ziaktu chuan thurawn petu chu lui kama him taka ṭhu chunga midang tuia awm nena inbia angin a tehkhin a. Chu ai chuan tuiah chuan zuang thla vein a bulah chuan chen ve zawk tur a ti a.’

‘A letling hlauh a nih chu,’ ka ti a, ‘thurawn i pek loh chuan tuiah chuan i zuang lut miah lo zawk alawm. Thurawn i pek erawh chuan zuang lut ve ang i ni. Chu mi chuan i thurawn pek chu a lo pawm a, a lo zawm chuan i mawhphurhna a ni tawh a. Inzawmna in nei tlat tawh. A bula tui cheng i nih tawh chu.’

Hotel kan thleng a, Esther-i leh Daniel-a te nen chuan kan inmangṭha a.

‘In thlen hunah min lo bia la,’ tiin Daniel-a chu ka chah a, ‘Fatma-i chungchang pawh min lo hrilh la aw.’