Tirhkohte Thiltih Zirlai 45-na

TIRHKOHTE 8:26-36, 38-40 MIZCLBSI . Lalpa tirh vântirhkohvin Filipa chu a bia a, “Tho la, Jerusalem aṭanga Gaza khaw zuk chhun, chhim lam thlalêr kal tlang kawngah khuan kal rawh,” a ti a. [27] Tichuan, a tho va, a kal ta a. Tin, Ethiopia rama mi pakhat an lalnu Kandaki hnuaia mi tilreh lal tak, a sum zawng zawng enkawltu chu Jerusalemah Pathian be tûrin a han kal a; [28] a haw lamah chuan tawlailîra ṭhu chungin zâwlnei Isaia lehkhabu a chhiar a. [29] Thlarauvin Filipa hnênah, “Tawlailîr saw pan la, va pawh rawh,” a ti a. [30] Tichuan, Filipa chu a va tlân a, mi tilrehin zâwlnei Isaia lehkhabu a chhiar chu a ngaithla a, “I chhiar chu a awmzia i hria em?” a ti a. [31] Ani chuan, “Tu ma mi hrilh fiah lohvin engtin nge ka hriat ang?” a ti a. Filipa chu a bula ṭhu-a chuang ve tûrin a sâwm a. [32] Lehkha Thu a chhiar lai chu hei hi a ni: “Berâm talh tûr angin ani chu an hruai a, Berâmno a hmul mêttu hmaa a ngawi reng angin, Ani pawhin a ka a âng lo, [33] Tihmualpho a ni a, dik lo taka rêlsak a ni, A thlahte chanchin tuin nge la sawi ang? Khawvêl aṭangin a nun an lâksak ta si a,” tih hi. [34] Mi tilreh chuan Filipa hnênah, “Zâwlnei hian tu thu nge a sawi, ama thu nge mi dang thu? Mi hrilh teh,” a ti a. [35] Filipa chuan Lehkha Thu aṭang chuan sawi ṭanin, Isua chanchin a hrilh ta a. [36] Chutia kalkawnga an kal lai chuan tui awmna an thleng a, mi tilreh chuan, “En teh, heta hi tui a awm a, baptisma ka chan engin nge dâl?” a ti a. [38] Tichuan, tawlailîr chu a tiding a, Filipa leh mi tilreh chu an pahnihin tuiah chuan an chhuk a; Filipa chuan a baptis ta a. [39] Tui ata an lo chhuah chhoh chuan Lalpa Thlarauvin Filipa chu a la bo ta a. Mi tilreh chuan a hmu ta lo va; nimahsela, hlim takin a kal ta zêl a. [40] Filipa chu Azota khuaah miin an lo hmu a, Kaisari khua a thlen hma chu khaw tinah a kal a, Chanchin Ṭha a hril zêl a.

Sawi zauna : Philipa leh Ethiopia mitilreh chungchangah hian a ram zauh naa Pathian hnathawh dan, a mite hnathawha a tel zia, a active involvement a lang chiang hle.

*Pathianin mi zawng zawng a hria. A vantirhkohin Philipa chu mitilreh tawk turin a tir.

*Tuman chanchin tha hi tihpalh, accident-in an hre lo. Pathianin a sawitu leh ngaithlatu a buatsaih.

*Pathian Thu hriat hi chhandamnan a tawk. Philipa hian mitilreh thu chhiar/hriat hmangin Isua chanchin a hrilh fiah.

*Pathian Thlarau-in Philipa a hruai a. Philipa thusawi chu mitilreh hriatthiamna a pe a. Thlarau tho chuan mi tilreh a hruai a, nun thar a pe a, Thlarau rah hlimna, joy a neihtir a ni.  

*Pathian mi Philipa chuan Thlarau thu a awih a, Isua tirhna, a commission a ngaipawimawh a. Mitilreh chuan Thu chu a ring a, baptisma a chang nghal a. A tu ate mah hian hun an paih lo, time an waste lo.

Ngaihtuah zui atan 45/1. Mitilreh hian ISAIA 53:7-8 ‘Ani chu hnehchhiah leh tihduhdahin a awm a, Inngaitlâwm takin a tuar zêl a, A chhâng lêt ve hauh lo; Berâm talh tûr an kaih laia a ngawi tlat leh, Berâm a hmul meh laia a ngawi reng ṭhîn ang hian, Ani pawhin eng mah a sawi lo. [8] An han man a, a chungthu an rêl a, A thlah kal zêl tûr tu man an dâwnpui lo; A nunna chu khawvêl ata an lâksak ta, Ka mite sual vânga tihhlum a ni,’ tih a lo chhiar a. He thu hi Isua chanchin ngei a nih dan han sawi teh.

45/2. I mithmuha tling ngai lote, i hmuhsitte, i ngei zawng takte, i pawla mi ni lote, i ngaisak ngai lohte Pathian Thu hrilh i duh em, eng tiangin nge hma i lak ang?