Tiam Tlat E (I Married You) XXVI– Walter Trobisch

Bung 7 chhunzawmna

Kan thusawi tawp lam hre pha hotel hnathawk chuan mak ti takin min en a. ‘Mi pakhatin vawi eng emaw zat a lo calltawh che a,’ a ti a.

‘Call let theih turin a number a hrilh che em?’

‘Hrilh lo ka pu. Lo call leh zawk tur angin a insawi a.’

Chutih lai tak chuan telephone dahna hmun aṭangin thawktu a lo chhuak a, chu pa bawk chuan a rawn call leh thu a rawn sawi a.

‘Lo hrilh la, khawngaihin. Ka room aṭangin ka lo chhang ang.’

Maurice-a chu hmanhmawh takin ka mangṭha a. Lift ka nghah mek lai chuan a lo kir leh a, a biak theihna tur numberinziahna lehkha min pe a. ‘Min mamawh takin min lo be tawp dawn nia. Naktuk hi ka awl nileng dawn a.’

Ka room ka thlen veleh chuan telephone chu ka la nghal a. 

‘John-a ka nia.’

‘Min lo bia chu ka lawm hle mai. I ṭha maw? Nizana kan thusawi kha i lo ngaihtuah zui em?’

Aw dam, mahse pawr ru tak tih hriat si hian,‘Ka pu, thil hrilh duh che ka nei a,’ a rawn ti a. ‘Ka kut balte hi hna pangngai ka thawhnaa bal an nih hi. Rim taka ka thawh vanga bal a ni. Chhuan pawh ka chhuang asin. Ka hna hi hotel-a nula titipui vel mai mai ai chuan a hahthlak zawk. Ka inchei dan pawh ka duh dan dan a ni mai, i thu a awm lo. Fatma-i pawh ka buaipui tur a ni. A enkawl dan pawh ka hria. Ram danga awm ka sawi pawh kha engtin nge i tih ka hriat duh vang chauh a ni. Ka duh chu keimah ngeiin ka hria. Ka nunah hian lo buaiin lo inrawlh suh. Tunah hian Fatma-i i rawn hawtir nghal a nih loh chuan police hnenah ka report ang.’

‘Hetah a awm hleinem.’

‘Ka awih lo e a.’

‘Ka hrilh che chu, hetah a awm lo.’

‘I thusawi pakhat mah hi ka awih lo. Hna aṭanga ka banin inah a lo awm lova. Tukverh aṭangin a chhuak a ni ang. Biak Inah a lo kal tih pawh ka hre vek.’

‘Khawngaih takin min ngaithla teh, John-a. Ka tina che chu pawi ka ti khawp mai. I kut chungchanga ka thusawi avang khan min ngaidam dawn nia. Mahse tunah chuan Fatma-i zawn hmuh vat chu a pawimawh hmasa zawk a nih chu.’

‘A lo inkhawm tih ka hria.’

‘Ni e, Biak Inah pawh a rawn kal ngei a. Mahse a chhuak hma vut a. A rawn pan che ni turah ka lo ngai hmiah asin.’

‘Tunah hian dar sawmpakhat a ni a. Zanlaia a lo la kir lo a nih chuan police-ah ka report ang a, a chungah eng pawh thleng se ka puh vek ang che.’

‘Khawngaihin min han hrilh teh, John-a…’

Phone a dah tau hmak tawh. Chiai lova inngaihtuah ka han tum a. Thil pawi tak ka tisual a ni. A kut bal chungchang te kha chu sawi loh tawp tur a nia. Mi chungchang a chhe zawnga kan sawi zawng zawng hi Setana hnena kan ṭawngṭaina a ni a, chhanin a awm nghal zel a nih hi tih ka ngaihtuah nauh nauh a.

Engtin nge maw a hriat leh reng reng ni? Fatma-i khan a hrilh a ni thei mai ang em? Mahse nilengin an inhmu lo angin a sawi si a? Nge ni a, dawt min hrilh zawk le?

Fatma-i pawh chu khawiah nge maw a awm reng reng ni? Hmeichhe tan mahnia zan reia chhuah chu a him lo hle si a. A chungah eng pawh thleng thei a ni. An in awmna tal te lo hria ila a ṭha tur. Khawiah nge maw a kal ang ni?

Khumah ka tluzal a, muthilh mai theih ka inring. Tih theih nei lo riau leh puitu nei lo riauva inhriatnain ka khat a. Engkimtitheia kuta Fatma-i hlan bak chu tih theih reng ka nei lo. Marriage counsellor ṭawngṭai thei lo chu sakawr nei lo sakawr khalhtu ang lek a ni, ka ti rilru a.

Eng chen chiah nge ka lo chhin hman tih ka hre lova, mahse ka harh zawk mai a. Ka room-ah chuan ṭawng thawm ka hria ni mai hian ka hria a. John-a aw ngei niin ka hria. Chutah chuan ka mumangah ani kha ka hmu tih ka hre chhuak a, ka room-a an lo len lai kha ka lo hmu a ni: an haw dawnah khan an awmna a hlat leh hlat loh kha ka zawt a. ‘Hla love, lui kam lehlam mai saw a ni,’ a ti a nih tak kha. Tunah chuan zing lam dar 3:00 a lo ri ṭep tawh a.

Ka rilruah chuan manganna riau a lo lut thut a.

Telephone ka va la a, mut chhuah hmel takin min lo chhang a. Zan lam thawktu a ni.

‘He khuaah hian lui a awm em min han hrilh teh.’

‘Awm e, ka pu.’

‘Lui lian a ni em?’

‘Lian ve deuh tho.’

‘Heta ṭangin a hla em?’

‘Hlat chu a hla ve deuh.’

‘Engtia rei nge kal ngai?’

‘Rei chu a rei ve deuh ang.’

A chhanna aṭang chuan minute sawmpanga aṭanga darkar hnih inkar a ni thei vek mai.

‘Ka thusawina Biak In kan pan lai khan lui ka hmu lo reng reng.’

‘Leilawn kan lova in thlen theih vang a nih dawn chu.’

‘A nih leh miin “Lui kam lehlamah mai sawn kan cheng” ti ta se, he hotel aṭang hian chu leilawn chu a kan a ngai dawn em?’

‘Ngai ang, ka pu.’

‘A nih leh Christ Church aṭanga panin lui kam lehlam chu kal dawn ta se, chu leilawn tho chu a kan a ngai em?’

‘Ngai e aw, ka pu.’

‘Leilawn pakhat chauh em ni awm?’

‘Aw, leilawn pakhat chauh a awm, ka pu.’

‘Tunah hian taxi lak mai tur a awm ang em?’

‘A harsa viau ang. A hrim hrimah tun ang hunah chuan mahnia taxi lak chu a chi loh ka ti.’

‘A nih chuan khawngaihin he number hi min lo biaktir teh.’

Rei tak chhung chu phone ri ka ngaithla a. A tawpah Maurice-an a lo chhang a.

‘Walter-a ka nia, Maurice. Ka duh duh hunah lo be tur chein min ti bawk a. Hei tunah ka mamawh tlat mai che.’

‘I tan chuan ka inpeih reng e.’

‘Minute engzatah nge hotel i lo thlen theih ang?’

‘Minute sawmpanga.’

‘Minute sawmah lo thlen tum la.’

Ka insiam sawk sawk a, ka chhuak a, hotel kawtah chuan Maurice-a chu ka zuk nghak ta a. Kawngpui te chu a reh duk mai a, mihring leh lirthei han veivak eih pawh an awm lo. A tawpah chuan Maurice-a car eng chu a rawn lang ta va va a. Ka bulah a rawn ding chat a, ka lut nghal thuai a.

‘Leilawn awmna i hria em?’

A nui tawp a.

‘Khawngaih takin engmah min zawt suh. Leilawnah chuan min hruai tawp la, mahse leilawn i zawh hma chuan ding a, kawng sirah i indah dawn nia.’

Ngawi rengin kan pan ta a. Maurice-an engmah min zawt lo tak tak chu ka lawm khawp mai. Tichuan leilawn chu ka va hmu ta a. A sei viau a, zau tak erawh a ni lo. A sir ve veah chuan lunga siam vawnban a awm vek a. A dinglam sir kilah chuan kea kalte tana kalna tur bik kawng a awm a.

Hnai teah Maurice-a chu a ding a, mahse leilawn pumpui kan hmuh vek theihna hmunah kher a ding a ni. Kawng sirah chuan eng engmah a awm lo naa thla eng avang chuan lui kam lehlam thlengin kan va hmu vek thei a.

Saw a awm alawm. Fatma-i a awm, vawnbanah chuan a lo dak a, hnuai lama tui luang ri hum hum chu a lo thlir mek a.

‘Saw nu saw i hmu thei em?’

‘Aw.’

‘A chanchin chu ka hrilh vek hman lo ang che. Mahse a beidawng em em mai a, mahni intihlum mai thei dinhmunah a ding a ni. Police station a awm hnai em?’

‘Lui kam lehlamah sawn a awm.’

‘A nih chu. Tunah chuan leilawn hi lawn kai la, feet sawmhnih velin emaw amah saw hlat la, kan tlan pel dawn emaw a tihna turin. Tichuan i ding thut ang a, kei ka zuang chhuak nghal ang a, a zuan thlak hmain va man hman ka tum ang.’

‘Zuang thla hman ta se?’

‘A nih chuan a rang thei ang berin police station-ah chuan i va tlan ang a, i va sawi vek ang.’

‘Aw le.’

‘Zawi te tea kan inbia i hmu a nih erawh chuan i kir leh ang a, hla deuh hlekah i lo indah dawn nia. Kan thusawi hre pha lo, mahse min hmu pha reng siin i lo awm dawn nia.’

‘Engati maw?’

‘Thubuai neih rup theih thil a ni a, chu vang chuan he nu nena ka thiltih engkim min hmuhpuitu hi ka mamawh alawm. Kal tawh ang.’

‘Kan ṭawngṭai phawt dawn em ni ang?’

‘Tehreng mai.’

Hun khawhral tur kan nei tawh lo. Maurice-a chu rei lo te a ṭawngṭai a, a motor khalhna chungah chuan a kut a suih a. A kut rinawm tak chu ka en reng a, mihring kut a ni lo tih ka hria.