Tiam Tlat E (I Married You) XXV– Walter Trobisch

Bung 7

Thu ka sawi zawh rual rual chuan kawngka lam ka pan nghal a. Fatma-i avang khan lungmuangin ka awm thei tlat lo a ni. Ban hla sak pawh ka nghak hman lo a ni ber e. Ka thawm hriat hnuhnun ber chu Daniel-an an ṭawnga thu a puang lai kha a ni a. Inrinni zanah chuan inkhawm a awm lo ang a, Pathianni-ah erawh thu ka sawi leh dawn a, chutah chuan kan nu pawhin min rawn zawm ve tawh an beisei thu a puang ni-ah ka ngai.

Tleirawl ṭhenkhat, sapṭawng thiam tih ka hriat ho chu Fatma-i chungchang ka va zawt a. Hmanhmawh taka a haw thu chauh min hrilh thei hlawm a.

Ka hlauhthawnna chu a nasa tual tual mai a.

‘Zuitu a nei em?’

‘Nei lo. Amahin a kal.’

Maurice-an a car-in min thlah leh a, mahse tun ṭum chu kawng dangah min hruai a.

‘Khawiah nge kan kal dawn a?’ tiin ka zawt a.

‘Ka nu hi kan thlah phawt ang a. Tichuan kan restaurant changkang ve berah zanriah kilpui che ka duh a,’ a ti a.

‘I nu chuan lo kal te a duh ve lo em ni?’

‘Duh lo ang, restaurant-a kal te hi nuam an ti lo. Anni chu “ṭhutphah ke pathum nei” a ṭhut duh zawk tlat rual kha an nia.’

Shilah-i chu a chau deuh bawk a, engmah a sawi lo. An inah chuan kan va thlah zet a, khawpui lam panin kan kal leh nghal a. Maurice-a chuan in changkan hmel tak kawtah min dinpui a.

Kan ṭhu a, kan ei tur te kan lam fel ta tihah Maurice-a chuan zawhna min zawt ta mawlh mawlh mai a:

‘I thusawiah khan nangmah leh nangmah i inkalh tih i hria em?’

‘Ka inkalh maw?’

‘Aw, Tirhkoh Paula’n nawhchizuar zawm chu amah nen tisa pumkhat an ni a tih thu kha i sawi a. A hnu lawkah “tisa pumkhat” tih hi Bible in inneihna huang chhungah chauh a hmang i ti leh lawi si a.’

Maurice-a chu intithei fahranin a nui var var a.

‘I sawi dik chiah,’ ka ti a. ‘Grik ṭawng aṭanga en chuan he thu hi inneihna chungchanga hman a nih lohna chu 1 Korinth 6:16 ah chauh hian a ni. Mahse chu pawh, ka ngaihdanah chuan, inneihna pawn lama tisa pumkhat nih tum chu a awm ang lo hle tih sawina tur chauhin a ni ang. Nawhchizuar nena pumkhat nih chu a awm ang lo a ni. Paula’n a sawi tum tak chu: “Inneihna pawn lamah chuan hei hi a dik fel thei lo” tihna a ni.’

Soup min rawn chhawp vel lai chuan Maurice-a chu a inngaihtuah vang vang a. Tichuan heti hian min zawt leh a:

‘Ni e, mahse tunah chuan tisa pumkhat an ni nge ni ta chuang lo? Ngaihtuah mah la, an mut dun avang khan tisa pumkhat an ni, induh tak tak lovin emaw inneih pawh tum tak tak lo mah se i ti a. Ṭawngkam dangin sawi ta ila, puan in kaih dun tum lo pawh ni se. Mahse a hnuah puan in chhungah, inneihna chhungah chauh tisa pumkhat an ni thei i ti leh bawk sia.’

‘A, Maurice, ka tan chuan i fing leh lutuk a ni. Ka thuchah inghahna dawrawm lai ber i rawn kawk chat chat mai a nih hi a.’

‘Nawhchizuar a mutpui avanga tisa pumkhat an nih theih chuan nawhchizuar mutpuitu zawng zawngte chu a pasal an ni vek mai dawn asin.’

‘Sex khan kawppuiah a siam ka ti alawm. An innei tawh ka ti reng reng hleinem.’

‘Eng nge a danglamna?’

‘Chu chiah chu alawm kan zawh tur chu.’

Maurice-a chuan mak a tih hmel viau mai a. Eng emaw chen chu kan ngawi vang vang a.

‘En teh maw Maurice, tuna i sawi chiah hi zawhna la chhan miah loh a nia. Mahse keimahah chuan thil chiang deuh pahnih a awm. Pakhatnaah chuan nawhchizuar nen pawh ni se sex hman hian nghawng thui tak a nei a ni. Pahnihnaah chuan tisa pumkhat ni tur chuan i nupui nen ngei pawh ni se sex hman ringawt hi chu a ni chiah lo deuh. He’ng thudik pahnih inkarah hian kawng dik chu kan ar khaw thim dai deuh chu a ngai a ni.’

Maurice-a chu a thaw halh a. Thudik pahnih – engkim hi kawng ngil ang vek ni mai se, kan tum ram hi kan hma zawnah awm tawp se a awlsam zawk tur.

‘A nih chuan innei si lova inkawp ringawt an ni tihna a nih chu,’ Maurice-a chuan a han ti a.

‘Han kuai her hlek la: kawppui nei lo inkawp an nih mai chu. Heti zawnga sawi phei chuan a mak lehzual.’

‘I triangle-ah khan nawhchizawrh hi a khawi laiah nge a awm ang?’

‘A angle dinglam lak hran daihna a ni. Sex chauh a ni a, hmangaihna leh inneihna lakah a hrang daih alawm.’

‘Chuti chungin puan inah chuan an lut a ni lo’m ni? Pumkhat an ni tho a ni lo’m ni?’

‘He thil mak tak hi engtin nge ka sawi fiah theih ang aw? A awmziaah chuan, puan inah khan an lut a, chung a lo nei lo tih an hmu chhuak a. A kawngka hawngin inah an lut a, mahse an han hawi vel a, chung leh bang reng reng a lo nei lo a. An lut nain pawna awm tho an la ni. Chutiang vel chu a ni e.’

Ei tur dang an lo chhawp leh avangin kan han ngawi leh rih a. Chumi hnuah Maurice-a chuan heti hian a ti a:

‘Nula pakhat thianghlim tawh lo ka neih duh loh vanga vawiin chhuna min dem deuh kha ka la na deuh a ni. A nih leh, dan naranin, he dinhmun han thleng si lo hian miin nula thianghlim lo hi nupuiah an nei theiin i ngai em?’

‘Aih, teuh lo mai. A hmeichhiaah a innghat thui viau a ni, a mizia, thil thlen dan boruak leh a ngaihdan te thleng pawhin a ni ang. Mahse he’ng hmeichhe tleirawl, a tam zawk chu kum sawmpathum sawmpali emaw lek lek ka han hmuh hian ka khawngaih em a ni. Tu mahin sex chungchangah zirtirna an pe lova. Zirtirna an dawn zawng chu hmeichhia an nih avangin mipa zawng zawng thu zawm tur a ni tih kha a ni mai a. Mipa a lo kal ta ngei a, a thu an lo awih ta ngei a. Lo hnar tura zirtir an ni lo hrim hrim alawm…En teh maw Maurice, thianghlimna hi taksaa chhinchhiahna put, hamda thler leh thler loh hi a ni ngawt lo asin. Kei ka ngaihdanah chuan thinlung lam hi a ni zawk, hmangaih theihna hi. Hmeichhiain a hloh theih thil niin ka hre lo, a pek theih thil niin ka hre zawk.’

‘I thusawi ka man lo tawp.’

‘Hmeichhe tin hian thilpek danglam tak an nei vek – mipa hnena vawi khat inpek pumhlum theihna hi. He thilpek hi banka sum lu ang hi a ni mai a. Mahse hei hi hmeichhe tam tak chuan nawi te tein an hmang ral a. Ni tinin an sum lu aṭangin tlem te te an hmang ral a, fawr mai mai nan te, an intheh dere mai mai a. A taksaah chuan thianghlim tih theih la ni mah se vawi tam tak an lo infawh leh an lo inkhalh tawh avang khan hmangaih theihna kha a nei tawh lova. A lehlamah hmeichhe dang, tawnhriat reng a neih loh vanga mipain a lo bum kha a awm leh thei a. A taksa chu thianghlim tih theih ni tawh chiah lo mah se a thinlung lam ka en chuan kei chuan thianghlim ka la ti a ni.’

‘Thil hrilh duh che ka nei a,’ Maurice-a chuan a tia. A han ngawih leh det hnuah chuan, ‘I awih emaw awih lo emaw, kei pawh hi tawnhriat la nei lo ka ni asin. Ka la thianghlim.’

‘Min hrilh duh chu ka lawm e, Maurice. Ka awih bawk e.’

Tichuan min zawt leh a: ‘I hre thiam tawh em Walter, hmeichhe thianghlim tawh lo nupuia nei tura ngaihtuah ringawt pawh ka tana a harsatzia chu?’

‘Hre thiam lo.’

‘Kristian ni chung pawhin maw?’

‘Kristian i nih vang tak zawkin maw le. Kristian berin a theih lohvin tu in nge thei ang? A nih loh chuan Lal Isuan ṭawngṭai dan min zirtir anga kan ṭawngṭaiin thinlung taka “Kan chunga thil tisualtute kan ngaidam angin nang pawhin kan thil tihsualte ngaidam ang che” tih theih ngaihna a awmin ka hre lo.’

‘Mahse ngaihdamna chu inpek tawn tur thil a nia.’

‘He thilah hian a tisual a. Nang pawhin thil dangah i tisual tho a. Eng nge a danglamna? Invuan tawn tura min hip thei tur chuan inngaihdam tawnna aia ṭha ka hre lo reng reng. Chu chu Pathian nena nun danglamna chu a ni. Bul ṭan ṭhat leh hi min phalsak reng mai a. Keini pawh midangte nen bul ṭan ṭha zel thei tur kan ni. Ka hrilh ang che, nupa karah hian maw, kan nu nen ni tina bul ṭan ṭhat ngai lova ka awm hi a awm lo. Ani pawh ka lakah chutiang bawkin.’

Ngawi rengin chaw kan eikham a. Mahse he ngawih rengna hi kan titi tawpna ni lovin kan titi kal zel a la ni zawk. Carkan pan mek lai chuan Maurice-a chu nupui atan hmeithai a neih duh leh duh loh ka zawt a.

A rilru lo lutuk thil chu aia han zawh tur pawh chu a awm chuang awm love. Motor khalhna a dawm lai chu ni se a phar hluai duhin ka ring.

‘Eng vangin nge chu chu min zawh?’

‘Africa rama naupang te tea hmeithaite hi ka khawngaih tak zet a ni. Tu mahin an ngaihsak bawk si lo. Pension hlawh emaw, sorkar ṭanpuina emaw an dawng bawk si lo. An vaiin nawhchizuar an ni vek bik lova. A ṭhen chuan hna pangngai thawka ei zawn ve te pawh an duh reng. Nangmah ang mi hi pasalah nei thei se ka ti khawp mai. Hmeithai naupang te, fa pawm te hi nei mai la. I kum ngaihtuahin pa ṭha tak i ni ngei dawn a. I nu chu a tu tur panga vel vawi leh khatah han hawnsak rup mai la, a hmel tur ka mitthla theiin ka hria.’

Maurice-a chu a thaw halh a.

‘I fiamthu mai mai tiraw?’ a ti a.

‘Aih, ka fiamthu miah lo.’

‘Ka rualpui hmeithai chu kei aia nau deuh ai chuan ka tana ṭha zawk turah i ngai tak tak maw?’

‘I kawppui a ni thei dawn a, i fanu ni lovin.’

‘Ani nen chuan kan karah fa lo piang leh se, chu chu a buaithlak viau dawn lo’m ni?’

‘Buaithlak deuh ang, mahse pa tel lova fate enkawl ai chuan a zia dawn a, chu bakah in fate tan pawh an pa fanu rual lek nu neih ai chuan a la zia tho bawk ang.’

‘A nih chuan nuthlawi pawh ka nei thei tho tihna a ni maw?’

‘A dinhmun azirin nei thei e a. Ngaihdamna hi kan ring a nih loh chuan kan ring lo tawp a ni mai.’

Hotel kan thleng a, khualchhawn hmunah kan va lut a. Chutah chuan ka chahbi ka va dil a.

Maurice-a chuan, ‘Walter, ka rilru i tibuai zo vek mai,’ a ti a.

‘Pitar khawhar tak i nih ngawt ka hlau alawm.’

Maurice-a chu a nui huah huah a, min kuah zui a.