Tirhkohte Thiltih Zirlai 42-na. Tirhkohte 7:54-60

TIRHKOHTE 7:54-60 MIZCLBSI Chûng thu chu an hriatin an thin a khei ta hle a, a chungah thinurin an ha an ṭhial a. [55] Nimahsela, Stefana chu Thlarau Thianghlimin a khat a, vân lam a thlîr reng a, Pathian ropuina leh Pathian ding lama Isua ding a hmu a. [56] “Ngai teh u, vân inhawng ka hmu a, Pathian ding lama Mihring Fapa ding pawh ka hmu,” a ti a. [57] Chutichuan, ring takin an au va, an beng an hup a, Stefana chu an beih rawn a, [58] khua ata chu an nam chhuak a, lungin an dêng ta a. Thuhretute chuan an puante chu tlangvâl pakhat, Saula an tih, ke bulah chuan an dah a. [59] Stefanan, “Lalpa Isu, ka thlarau la ang che,” tia Lalpa a koh lai chuan lungin an dêng ruih ruih a. [60] A ṭhingṭhi a, ring takin, “Lalpa, he an thiltih sual mawh hi anmahni phurhtîr suh ang che,” a ti a. Chu thu chu a sawi zawh chuan a muhîl ta a.

Sawi zauna : Stephena thusawi an ngaihthlak hian ‘an thin a khei ta hle a,’ tih kan hmu a. Hemi tawngkam hi ‘cut to the heart’ tiin Bible leh tam takah a inziak a ni. He tawngkam hi Penticost ni a Petera thusawi ngaithlatuten an dawnsawn dan a sawina tho kha a ni. Petera thusawi ngaithlatute chuan Isua an ring ta a nih kha. Pathian thuin thinlung a khei hian dawnsawn dan a in ang lo thei hle mai. Huatna hmel dur, duh lohna  karah Pathianin Stephana chu thlir tur, vision a pe a. Stephana chuan thlir tur dik tak chu a thlir avangin a chunga thil thleng hrehawmna leh natna chuan a ti buai lo. Lalpa ang mai khan amah dodaltute a tawngtaisak zawk a ni. Isua hi Hebrai ziaktu chuan (10:12) engkim a thawh zawh tawh avangin, Pathian ding lamah a thu tiin a sawi a. Stephana hian Pathian ding lama ding ka hmu a ti thung a. Enga tinge Isua hi a din tak mai ni ang? Stephana tuar mek thlamuana fuih turin a ding a ni thei a. (Zanah Lalpa chu Paula kiangah a ding a, a thlamuan tih thu bung 23:11 ah hian a in ziak bawk.) Stephana lo lawm, lo recieve turin Lalpa hi a ding a ni thei bawk a. Pa Pathian bulah hian Stephana tan hriatpuitu, a witness ni turin a din sak a ni thei bawk. Eng pawh ni se Lalpa Isua hian amah ringtu tuarna hi a ngainep lo, a la serious hle a ni tih a hriat theih awm e.

Mihring Fapa ding; Stephana hian, ‘Pathian ding lama Mihring Fapa ding ka hmu,’ a ti. Mihring Fapa tih hi Daniela 7:13-14, ‘Zâna ka thil hmuhah chuan hei hi ka hmu bawk: Vân chhûma inthuam hringfa ang tak a lo kal a, Hmakhawsânga lam a pan a, A hnênah chuan an hruai a. A hnênah chuan lalna te, Ropuina te, ramte an pe a. Tichuan, hnam tin, chi tin, ṭawng tin hmangte chuan Chibai an bûk a, kumkhuain thu a nei ang a, A lalna chu a tâwp ngai lo vang,’ tih hi Biblea a lan tanna a ni. Judaho hian an hnam chhanchhuak tur an nghahfak Mesia hming a ni an ti a.  Isua hian Mihring Fapa a in ti a, Stephana chiah hi Isua ‘Mihring Fapa’ ti a kotu dang leh chu a ni. Isua hi Mihring Fapa chu a ni tih hian; thuneihna tawp neitu, roreltu, Pathian leh mihring nihna famkim nei a ni tihna a ni.

‘Pathian ding lama Mihring Fapa ding ka hmu,’ Stephanan a tih hian huat em emna chhan tur pahnih an nei a. 1. Isua hi Pathianin thuneihna a pek, Pathian atanga an hnam chhanchhuaktu lo chhuak, Messia a ni, a tihna a ni a. Pathian Fapa, Pathian ngei a ni, a tihna a ni. Hei hian an thin a khei a. 2. Isua a ding a tih hian mitthi zing ata a tho leh a ni, a tihna a ni bawk a. Roreltu tam zawk hi Sadukai thawhlehna a awm lo ti tute an ni. Ring takin an au a, an beng an hup a, khua ata an nam chhuak a, lungin an deng hlum ta a ni. Stephana chu Isua rin avanga nun chan, martar hmasaber a ni ta a ni.

Ngaihtuah zui atan : 42/1  Stephana hian Isua anna engtiangin nge a tih lan? Eng tik hunah nge Isua anna tih lan i harsat thin? Stephana thihna atang hian zir chhuah i nei em, thlamuan phahna thil i chhar em?