Tiam Tlat E (I Married You) XX– Walter Trobisch

Bung 6

Biak In kan hnaih deuh deuh chuan chu lam aṭanga mipui lo kir kan hmu a.

‘Biak In a khat tawh a nih saw,’ Maurice-a chuan a tia. ‘Ṭhutna chang lo ho an haw leh a ni hi.’

A sawi dik chiah bawk a. Ṭhutthlengah pawh insi chatin an ṭhut mai bakah a kara kalna turah te pawh chuan an ding khat ṭhup mai a. Keini tan pawh kal tlang a harsa. Biak In hma lamah chuan ṭhutna an rem belh a, maicham te pawh an hualtir hial a. Chu’ngah chuan pa upa lam, hmel zahawm tak tak an ṭhu hlawm a.

Ka thinlungah chuan hlauhna a rawn awm leh a. An harsat buaina ṭhenkhat chu ka hre tawh ngei mai a, mahse a zavai chuan ka la hre hauh lo. Ka thusawiin an nun a nghawng dan tur, engti ang taka nain nge a ah ang a, beiseina nge beidawnna a pek ang tihte chu hriat ngaihna pawh a awm lo. Mawhphurhna rit tak a va ni em!

Pa upaho zinga pakhat chuan ṭawngṭaina a han hmang a. Chu chuan ka thla a timuang sawng sawng a. Kha’ng upaho khan ka thusawi tawhte kha dawngsawng fuh lo ni ta se a ṭawngṭai duh miah lovang tiin ka lo ngaihtuah neuh neuh bawk a.

Pulpit-a ka bula Daniel-a a lo ṭhut chuan chakna thar pekin ka awm niin ka hria. Keima thu ni lovin Pathian thu alawm ka sawi dawn tiin keimah leh keimah ka inhrilh a, ka thaw deuh huai bawk a.

Mipui zinga ka va hmuh fuh hmasak ber chu Fatma-i a ni. Hmeichhe tlar hnung lamah a lo ṭhu ve vang a. A mitmeng fiah leh tuihal tih hriat tak nen, a hmel chu midangte zingah chuan a langsar khawp mai. ‘Khawngaih takin a tana ṭangkai tur thu min pe rawh,’ tiin rilruin ka ṭawngṭai a.

A hmaa lo la inkhawm ve lo mi thar an awm nual a. Chu vang chuan a hma zan hniha ka thusawite kha heti hian ka han khaikhawm leh phawt a:

‘Inneihnaa bet tlat thil pathum a awm a: mahni nu leh pate kalsan, nupaa invawn leh tisa pumkhata insiam. Ṭawngkam dangin sawi ta ila, dan anga thiltih, mimala inpawh leh tisaa inzawmna te a awm a ni. He’ngte hi ṭhen hran theih an ni lo. I la hrang ṭalh a nih chuan a vaiin a chhe vek mai dawn a ni.

‘In zinga mi pakhat chuan inneihna hi ṭhutphah ke pathum nei angin a tehkhin thu nichin mai khan min hrilh a. A ke pakhat pawh kim lo ta se chu ṭhutphah chuan i ṭhut rual rualin a tlukpui ang che.’

Mipui zingah chuan nui hmel ka va hmu nual a. He tehkhinna hi a ṭha riau a ni. Shilah-i khan a tidik zet mai.

‘Zan hmasa lamah khan he zawhna hi kan sawiho a: Eng aṭangin nge inneihna hi kan luh ang, dan aṭangin nge, inpawhna aṭangin nge tisa aṭangin? A eng kawng hi nge kawng ṭha ber ni ang?

‘He zawhna chhan dan chi hnih chu kan sawi tawh a – tihdan phung aṭanga chhanna leh tunlai chhanna. Tihdan phung aṭanga chhanna chuan dan anga luh a, mo lawm hut hut a duh a ni. Heta hlauhawm awm thei ta chu, a inpawhna lam, hmangaihna chungchang kha, ngaihthah a ni ta tlat ṭhin hi a ni. Hei vang hi a nia vawiinah in zinga ṭhalai tam tak chu hnam tihdan phung lakah hian an hel tlat ni, inpawhna neih hmasak hlutzia an hre chho dawn chauh a ni si a.

‘Tunlai chhanna chuan tisa lama ṭanin mipat hmeichhiatna aṭanga luh a duh ve thung. Heta hlauhawm awm ve thei ta chu dan lam a ngai pawimawh ta lo hi a ni a, inneih buatsaiha mo lawm hi a awm ta ṭhin lo a ni. Hei vang hi a nia in zinga a upa lam deuh chu tunlai dan lakah hian an hel tlat. Chhungkaw nunin a tuar ang a, chhungkua chu a lo keh chhe mai ang tih an hlau tlat a ni.

‘Vawiinah chuan Bible-in he kan zawhna a chhan dan kan en ve thung tawh ang. A chhanna chu kan hmuh dawn chuan kan Bible chang thlan Genesis 2:24 a thumal hmasa ber hi kan en chik deuh a ngai ang: “Chuvangin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang.”

‘He thumal “chuvangin” tih hi a nihna tak kan hriat fiah dawn chuan a hma lama thu hi kan en let a ngai a ni. Thu lar tak, fiamthu thawh nan pawha hman hlawh tak a ni a. Pathianin mipa tana “ṭanpuitu,” “a kawppui awm mi,” a tlukpui thawhpui, amah tifamkimtu tur a siamsak dawna a khawngaihna hriat fiah phak rual loh mipa hnena a lantir duh chungchang thu a ni:

‘ “Tichuan, Lalpa Pathian chuan Adama chu tui takin a muthilhtir a; tichuan, a muhil ta a; tin, a nak ruh pakhat a la a, chumi ai chu tisain a awh phuitir ta a. Tin, Lalpa Pathian chuan Adama laka a lak nak ruh chu hmeichhiaah a siam a, Adama hnenah a hruai ta a.”

‘He thu hi hmangaihna tak tak sawi fiahna ropui danglam tak a ni. Eng vangin nge mipa leh hmeichhia te hi bang lovin an inthlakhlelh? An inhip tlatna hi engti angin nge hrilhfiah theih a nih ang? A chhanna chu: Thil thuhmun aṭanga siam an ni – hman zana Liberia ram thil ker ka entir che u ang khan. Thil pumkhat aṭanga phel an ni a, chu a phel chu tihpum leh a, intihfamkim tawn leh a, “tisa pumkhat” nih leh an duh tlat a ni.

‘Chutianga hip tawntu chu hmangaihna thiltihtheihna hi a ni. Chu vangin, a nihna ang takin hmangaihna vang chuan an pahnih chuan an nu leh pate an kalsan ang a, an invuan tawn ang a, pumkhat an lo ni ang.