Tirhkohte Thiltih Zirlai 41-na. Tirhkohte 7:51-53

TIRHKOHTE 7:51-53 MIZOVBSI 51Mi tihmawh, thinlung leh beng tan lohte u, kumkhuain Thlarau Thianghlim in dodâl fo ve; in thlahtute tih ang zêl khân in ti ṭhîn.  52In thlahtuten zâwlneite zîngah tu nge an tihduhdah loh ni? Mi Fel tak lo kal tûr thu hril lâwktute kha an tihlum a; chu Mi Takzet chu mantîrtu leh thattute nangmahni hi tûnah in ni asin. 53Dân, vântirhkohte pêk chhâwn kha, hmu zeta zâwm si lote u!” a ti a..

Sawi Zauna : Thuthlung Hlui hunlai khan Pathian hian Israel fate hi ‘mi tihmawh/luhlul, stiff-necked’ tiin vawi 20 dawn lai a ko a ni. A entirna tha tak chu; Exodus 32:8, 9 Ka thupêkte chu an hawisan hma zet mai. Bâwngno lem an insiam a, an bia a, a hnênah chuan an inthawi a, ‘Aw Israel-te u, hêngte hi Aigupta ram ata rawn hruai chhuaktu che u in pathiante an nih hi!’ an ti e,” a ti a. 9Tin, Lalpan Mosia hnênah, “He miteho hi ka enthla reng a, ngai teh, hnam luhlul tak an lo nih hi!, tih hi a ni awm e. ‘Thinlung leh beng tan loh, uncircumcised heart’ ti a Pathianin a mi Israel-te a kohna hi Jeremiah 9:25, 26 “Ngai teh u, nite a lo thleng e,” tih hi Lalpa thuchhuak a ni. “Tisa maia serh tanho zawng zawng ka hrem dâwn. 26Aigupta mi te, Juda mi te, Edom mi te, Amon mi te, Moab mi te leh thlalêra chêng bak ziat kâwnghote chu ka hrem dâwn; chûngho chu serh tan tak an ni lo va, Israel-te ngei pawh thinlung lama serh tan loh an ni,” tih-te kan hmu a. Serhtan an nih leh Mosia hmanga Pathian thupek dan zawm tha inti a inchhuang em em Israel-te chu Pathianin serh tan loh, dan pawh hre lo Jentile-te nen in ang rengah a chhuah a ni. Deuteronomy 10: 16 ‘Chuvângin, in thinlung hmâwr vun tan ula, tihmawh tawh suh u,’ tih atang hian Pathianin a zawn chu a lang mai ni lo, thinlung lama a thu pawisa tu, chhungril lam atanga in tan nun tak pawn lama lang chhuak ta a ni tih a hriat theih awm e. Stephena hian a thu ngaithlatu Juda-te hi Isua lo kal tur hrillawktu zawlneite tiduhdaha tihhlumtu-ah a puh a. Mi Takzeta, Isua ngei pawh mana thattu-ah a puh a ni.

Ngaihtuah Zui Atan: 41/1 Thahnemngai taka Pathian thu zawm emaw kan intih lai hian a rilru ni miah lo thil kan ti fo theiin i hria em? A entirna i pe thei em?