Chhum anga ral leh mai tur hringnuna nun dan thiam – Robert L Chongthu IAS

Thuhriltu bu hi Bible-ah chuan ril leh chhenfakawm ber pawl, rilru tibuai map thei a ni. Mihring awm dan tur chungchanga zirtirna fiah fai tak emaw thutiam thlamuanthlak tak tak emaw awmna Bible bu dangte ang lo takin Thuhriltu bu hi chuan hringnun nihphung harsa tak takte min thlirpui daih a. Tawrhna chungchang te, rorelna dik lo chungchang te, lungawi lohna chungchang te, upat zelna leh thihna chungchang te thlengin zep nei hauh lovin a sawi a. Zawhna chhan hrehawm tak tak nun awmzia, dam chhan leh hringnun sawi lawk theih lohzia chungchangte pawh ngaihtuah lo thei lovin chhiartute min siam a. Chutih rualin a boruak rihzia ngaihtuah chuan Thuhriltu bu hi beidawnna lehkhabu chu a ni hauh si lo. Chutih a hnekin tlawmna, lungawina leh Pathiana rinna thuk lehzual nei turin min ko a ni.

​Thuhriltu bu laimu-ah hian Hebrai ṭawng thumal “hevel” tih hi a awm a. “Eng mah lo mai mai” tia lehlin ni fo mah se he thumal awmzia tak hi chu “chhum,” “tui hu,” “mei khu,” emaw “thaw” tihte a ni daih. He’ng thilte hi a taka awm leh hmuh theih, mahse khawih leh man beh theih hauh si loh an ni a, chu vangin he tehkhinna hian awmze thuk tak a nei a ni. Thuhriltu bu-a Zirtirtu hmuh danah chuan hringnun hrim hrim pawh hi hevel chu a ni. Hringnun hi a awngrawp a, chatuan daih tur a nih loh bakah a ral zung zung a ni. Mi tam tak chuan chian fakna, pangngai rengna leh thil thleng chunga thuneihna zawngin an nun pum an hmang ral a, mahse hringnun nihna tak tak hi chu man beh rual lohvin an kut kar aṭangin a pit chhuak zel si. Chu vang chuan Thuhriltu bu hian hringnun hi a zir thiam theih tih ngaihdan hringfaten nghet taka kan vawn tlat hi a rawn bitum ta chat a ni.

​Hringnun hi kalphung awm sa, chhut chhuah theih vek zul zuiin a kal tur a ni tih hi mihringte hian rin dan tlanglawnah kan nei tlat mai a. Thawhrimna chuan hlawhtlinna a thlen zel ang a, finna chuan tawrhna a pumpelhtir zel ang a, Pathiana rinawmna chuan malsawmna leh venhimna a thlen zel ang tih hi kan ring tlat a. Chutih laiin Thuhriltu chuan he’ng rinna leh beiseina ang diak diak hian khawvel hi a kal duh si lo tih a hmu a. Mi ṭhaten an tawrh laiin mi sualte an ding chhuak hlauh a. Mi ate ang thovin mi fingte pawh an thi ve a. Rorelna dik lo pawh a ding chang zawkah a ṭang fo mai niin a lang bawk. Zirtirtu hian “ni hnuaia” hringnun a ni a sawi fiah ni; a awmzia chu mihring pangngai pakhat ve mai a nihna angin he’ngte hi a thlir a ni. Hetianga lei lam aṭanga thlirnaah hi chuan hringnun awmzia chu hriat thiam har leh dik lo hle angin a lang ngei ang. Hun chu a kal ngaiin a kal reng a, chhuan thar lo chhuakin an liam leh a, luite chu an luang zel a, a tawpah chuan mi zawng zawng hi thihnain min lem zo ṭhin. Mihringte hian Pathian thil ruahmante hi kan hre fiah kim thei lova, kan nun tawpna tur pawh kan tidanglam thei lo.

​Hemi hriat chhuahna hian “the divine disconnect” kan tih mai hi a siam chhuak ta ṭhin a, chu chu miin hringnun awm dan tur nia a ngaih leh hringnun nihna tak tak inkar danglamna nasa tak hi a ni. Pathian thlirna tlang va ṭawm tumna leh duhna avang hian mihringah phawklekna leh hlauhthawnna tam tak a lo awm a. Hun lo la awm tur chungchangah pawh chianna, hriat fiahna leh thleng ve ngei tura tiam nih ṭhenkhat chuan an thlahlel em em a. Thil dinhmun, inlaichinna, hnathawh, hriselna leh hlawhtlinna chunga thuneih duhin an hmanhlel ṭhin. Thuhriltu erawh chuan Pathian kan nih lohzia min hrilh nawn mawlh mawlh a. Hetianga thu neih tumna hian khel lovin lungawi lohna, chauh derna, hlauhna leh beidawnna te a thlen ṭhin. Zirtirtu chuan he’ng zawnga hringfate thiltihte hi “thli man tum” nen a tehkhin a. Hna, hausakna, hming ṭhatna, nawmchenna leh hlawhtlinna zawngin miten hringnun an hmang ral a, he’ngte hian rei tak atan nun awmzia leh himna an pe turah an ngai a ni. Mahse mihring kut hnu zawng zawng hi hunin a her liampuiin a tiral deuh vek zel a. Tui kama ṭiau hmanga in lem sakte tui fawnin a len bo zel angin mihring hlawhtlinna te hi chuan rei an daih ngai lo.

​Mak deuh maiin Thuhriltu hian nihilism (hringnun hian awmzia leh hlutna tak tak a nei lo tih ngaihdan) emaw beidawng lam hawiin emaw he’ngte hi a chhang lem lova. Hringnun dawnsawn dan danglam deuh zawka dawngsawng thiam turin mite a fuih zawk. Hringnun hi ngam tur emaw, neih tur emaw anga ngai lovin Pathian thilthlawnpek angah ngai zawk turin Zirtirtu chuan min fuih a. Hlim taka ei leh in, mahni hnaa lawm, midangte hmangaih leh thil thleng pangngai mai anga langte lawm taka dawnsawn thiam aia ṭha hi a awm chuang lo tih Thuhriltu chuan a sawi nawn a sawi nawn a. He’ng thilte hian awmze thuk tak an neih chhan chu chatuan an daih vang a ni lova, anmahni hun ṭheuha hlim taka dawnsawn tur thilthlawnpek an nih vang zawk a ni.

​Hringfaten chutiang hunbi nei thilthlawnpekte chu awmze kumhlun zawn nan kan hman chiah hian harsatna a lo inṭan ta ṭhin a. Kan hnate hi kan nihna berah an chang a, sumte hi himna kulhbingah an chang a, reilote atana nawmna chu hringnun tlanchhiatsan nan kan hmang a, sakhuana pawh nun nuam zawk neihna tur atana tihphung ve maiah a chang ṭhin. Thuhriltu chuan he man beh tumna rilru hi bitumin hringnun hman dan tur dang min kawhhmuh a: kut inhawnga rinna. Thunun tuma man beh tlat ai chuan hringnuna thilthlawnpekte hi inngaitlawm tak leh lawm taka dawng a, chen a, a huna thlah leh mai turin min zirtir a ni. Zirtirtu chuan kut hum leh kut inhawng lemte a khaikhin a. Kut hum chuan hlauhthawnna, ta neih tumna leh thil tawp dan thunun tumna lam a entir a. Kut inhawng erawh chuan inpek pumhlumna, lawmna leh Pathiana rinna lam a entir ve thung a ni.

​Finna pawh hian tih theih chin a nei a ni tih Thuhriltu hian a tawpkhawkah chuan min zirtir a. Finna hi a hluin hringnun hi a siam ṭha thei a, mahse tawrhna a tibo thei lova, chhiatna zawng zawng a hrilh fiah zo lova, thihna a pumpelh thei hek lo. Mihringte hi chu thilsiam, tih theih chin nei, an hunbi ruata nung ve mai kan ni a, Pathian thil tum zawng zawng hi kan hmuhpui seng lo. Chu vangin hringnun zir thiama, ngamnaah ni lovin eng mah chiang lo karah pawh Pathian rin tlatnaah hian finna tak tak chu a awm zawk a ni. Isua Kristan naktuk atana lungkham lova ni tina Pa kuta innghat ngam tura min zirtirna kha he thupui hian a va kawh zawm a ni. Chu vangin Thuhriltu hi beidawnnain a tawp lova, inpek pumhlumnain a tawp a ni. Hringnun hi chhum anga ral leh mai tur ni mah se Pathian thilthlawnpek a nih avangin a hlu em em a ni.