Tirhkohte Thiltih Zirlai 36-na. Tirhkohte 7:1-8

TIRHKOHTE 7:1-8 MIZCLBSI

Puithiam lalber chuan, “Hêng thu hi a dik em?” a ti a. [2] Ani chuan, “Ka unaute leh ka pute u, ngaithla rawh u. Kan pu Abrahama chu Haran khuaa a awm hma, Mesapotamia rama a awm lai khân, ropuina Pathian chu a hnênah a inlâr a. [3] I ram leh i laichînte hi chhuahsan la, ram ka la kawhhmuh tûr che lamah kal rawh,’ a rawn ti a. [4] Tichuan, Kaldai ram ata a chhuak a, Haran-ah awmhmun a khuar a. Chuta ṭang chuan a pa thih hnuah tûna in awmna ramah hian Pathianin a pêm luhtîr a. [5] Pathian chuan ram luah tûr hniak khat pawh a pe lo va; mahse, Abrahama chu fa nei lo a ni chungin, amah leh a thlahte hnênah he ram hi pêk a tiam a. [6] Pathianin hetiang hian a hrilh a ni, ‘I thlahte chu mi ramah an la mikhual ang a, kum zali lai mi bawihah awmin tihduhdah an ni bawk ang. [7] Bawiha siamtu tûr hnam chu keimah ngeiin ka la ngaihtuah ang a, chumi hnuah an chhuak ang a, he hmunah hian ka rawng an la bâwl ang,’ a ti a. [8] Pathianin a hnênah serh tan thu kha a thlung a. Chutiang tak chuan fapa Isaka a neih khân, a ni riat ni-ah a serh a tansak a. Isaka chuan fapa Jakoba a nei a, Jakoban fapa sâwm leh pahnih, thlahtute kha, a nei a.

Sawi zauna : Stephana an puhna hi bung 6 tawp lamah khan a inziak a: Hretu der an rawn thawhpui a, chûng chuan, “He mi hian kan Tempul thianghlim leh kan Dân hi a sawichhiat a bâng duh lo. ‘Nazaret Isuan kan Tempul hi a ṭhiat ang a, Mosia Dân min pêkte hi a tidanglam vek dâwn,’ a tih kan hria a ni,” tih a ni. An zawhna aia pawimawh; Temple awm chhan, dan petu Pathian chu tunge tiin bul a tan a ni. Pathian thupek leh amah biakna hmun ka sawi hmain vawiina he hmuna hnam anga in la awm theihna chhan Pathianin bul a lo tansak dan ka han hrilh ang che u, a ti a ni.  Temple leh dan a awm hma khan Pathian chuan Israel hnam lo chhuahna bul Abrahama hnenah thu a lo tiam tawh a, nasa taka malsawmin a lo hruai tawh a ni. An awm dan tur pawh a lo sawi lawk diam tawh a. Khang hun lai khan Pathian tana koh chhuah an nih chhinchhiahna serh tan tih loh chu dan pek an ni hran lo.

Josepha leh Mosia chungchang chipchiar takin Stephana hian a sawi a. Anni hmang hian Pathianin an hnam chhanchhuahna ropui tak a lo siam sak tawh a. Chung chu dan a pek hma daih kha a ni. Chumi hnuah Davida a sawi lang leh a. Temple hi Davida rilrua lo lang a ni. Pathianin ka in tur sa rawh, a ti pawh a ni lo. Amah Davida chu in ropui takah a cheng a, Pathian bawm erawh chu puanin mai maiah a awm a, Davida chu a inthlahrung ta a, Pathian bawm awmna tur temple sak a duh ta a ni. (Pathian a buai ve miah lo. Puanin, temple tih vel hian Pathian ropuina leh nihna a ti buai lo.) Amah Davida chuan sa ta lovin a fapa Solomona zawkin a sa a ni.

Stephana hian temple leh dan a sawi chhiat leh chhiat loh an zawhna hi a aia thuk zawkin, heng temple leh dan petu Pathian chu tunge tiin bul a tan a ni. (Result leh theorem an zawt a, a aia pawimawh result lo chhuahna definition-in a chhang a ni.)

Ngaihtuah zui atan 53. Kan biak ber Pathian hriatchian tum si lo hian tih dan leh hmun velah buai chiam hi thil awm thei niin i hria em? Pathian biak inkhawm a khunkhan, puithuna a thatna leh that lohna ni a i hriat han sawi teh. Khunkhan taka inkhawm/uluk taka inchei hi a hmun leh hun a zirin a niin i hria em, nge engtik lai pawhin? Eng tianga kan tih hian nge Pathian ropuina kan lan chhuah tir a, chawimawi a a awm ni a i hriat?