SONAM WANGMO Part 3

Kan Hotel chu a hmingah ” Naksel Boutique Hotel and Spa,” kan ti a, Paro leh Thimphu ah chuan Hotel tha ber pawla ngaih a ni ve.  In hriat angin  Bhutan chu “Land of the Thunder Dragon” tia hriat a ni a. A tlangram leh ruam vela khawpui leh tek tla chuai chuai hi Dragon ka atanga mei lo chhuak a ni an ti! He ram Seal leh Flag pawh hi Dragon lem vek a ni a, ‘Druk’ an tih hi. Flag ah chuan Dragon-in lunghlu
a tham lai hi a lang a. Khawiah pawh hian Dragon lem hi a kerin emaw, a ziakin emaw hmuh tur a tam em em a. Pathian tak hriat lohna ram a nih vang hian kan Hotel pawh chu engtinnge Pathian hming lan chhuah theihna tur a nih ang tih chu ka ngaihtuah ta a.

Ka thinlungah kan Hotelah chuan Dragon (Druk) lem reng reng a awm tur a ni lo tih hi a chiang em em a. Tichuan Bhutan rama mi dang tihdan loh takin kan Hotel- ah chuan Dragon lem hmuh tur a awm ta miah lo va. Chu chu mi dang pawh hian mak an ti a, “Engatinge  Druk lem hi a awm ve loh?” tih zawhna chu, Kristian ni lote hnen atang hian  kan tawng fo va. A ngaithla duh tan chuan kan rinna leh Lal Isua
chanchin sawina remchang tak a ni thin a. Tin, Kristian leh Foreigner te hriat thiam tur em em erawh chuan  1 Corinth 13 (Hmangaihna thu) hi kan Hotel Lobby ah chuan langsar takin ka tar thung a. Hei pawh hian zawhna a titam khawp mai. A bang leh lamah chuan  “A time for everything” tiin Ecclesiastes 3:1 – 8 leh 11 hi ka tar bawk a. Tin Hotel inchung ber lerah chuan ‘Prayer Tower’ ka ti mai a, tawngtaina
pindan te tak te hi a awm a, chutah chuan Light eng tawk hi nileng zankhuain kan chhi bawk a. Hei pawh hi tih chhan ka nei a.

Bhutan rama Tourist rawn zin tawh phawtina an tlawh ngei ngei chu “Tiger’s Nest” an tih mai, kum 400 vela upa, tlang panga Buddhist  Temple pali leh Monk ho awmna Monastery mawi leh dangdai tak maia sak hi a ni a. Chuta kal tur chuan chhoh lamah step 250 zawh a  chhuk lamah  step 700 zawh  leh a ngai a ni. Kan Hotel hian chu Tiger’s Nest chu a ep siah a. Prayer Tower-a mit lova Light kan chhit chu Lal Isua Chanchin tha entirna a ni a. Engtik niah emaw chuan chu Tiger’s Nest chu  Chanchin tha in a la luh chhuak ngei ang tih kan beiseina leh kan dilna entirna a ni.

Ka pasal Suvara chuan kum li kal taah khan min boralsan a. Ani pawh a thih hma kum thumah nasa takin a piangthar a, a zu in a sim a. Kohhranah a tangkai em em a. Mahse kum tam tak chhunga zu a lo in nasat kha a taksain a tuar ta a, kan Hotel pawh rei min dampui hman ta lo a ni. Mahse thlamuang taka Lalpa hnena a kal ta kha ka rilru leh ka thlarau hi a lawm em em a ni. Keima awmna turin Hotel bul lawkah chuan in lian lo deuh hi ka sa a, chutah chuan ka cheng ber a ni. Ka fanu hian pasal neiin fa pahnih an nei a, ani pawh hi ringtu tha tak a ni a, a pasal erawh hian Pathian lam a ngaihsak lutuk rih lo a ni.

Thil mak leh ropui deuh chu Pathian hian mi tha deuh deuh min pui tur hi min pe tlat mai a. Tuna ka Manager hi mi thiam tak mai a ni a, mahse Buddhist rinawm tak a ni thin. A nupui hi a dam tha thei lo va, vawi khat chu Buddhist puithiam ho hi a nupui tidam tura koh a tum a. Kei chuan, “Anni ai chuan kan Pastor hi ko la, tawngtai sak se a dam mai ka ring zawk mang e,”  ka ti a. Ka hnathawh dan leh ka nungchang min thlir rengtu hi a ni a, mi hi a ngaisang ve  thin a, ka thu pawh chu a awih ve mai a. Kan Pastor chu  a lo kal a, a nupui tan chuan thahnemngai takin a rawn tawngtai a, a dam nghal mai lo na, rei lo teah a dam fel ta vek a, a buai leh tawh ngai lo. Chuta tang chuan ka Manager chuan Lal Isua hi a ring ve ta a, tunah chuan kan Kohhran hruaitu rinawm a ni bawk a. A kutah hian engkim ngaihngam takin ka dah thei a, ka tan a thawventhlak hle a ni.

Tuna kan Finance Manager pawh hi  Bank-ah pawisa puk dila ka va kalna thin a an Manager thin a ni a, a fel em em a, kan hnena rawn thawk turin ka sawm a, a lo duh ve mai a. Ani pawh hi tunah chuan ringtu nghet tak a ni tawh. Hotelah chuan ei siamtu Chef tha hi an pawimawh em em a. Ka mamawh tak mai Pathianin ringtu tha deuh mai min pe leh tlat mai bawk a, tunah hian kan Chief Chef a ni. Anni bakah hian kan thawktu tam tak hi ringtu an ni.

Pathian zarah kan Hotel  leh Rainbow Tours & Treks kan kalpui tluang viau va. Kum 2020 March thla khan ka fate nen Bangkok-ah kan zin a. Hriat lawk hauh lovin Covid runpui khan min  nang ta a, Thailand pawh chu kan chhuahsan thei ta lo va. Tum loh deuhin thla thum ngawt mai kan han tang a. Bhutan- a kan lo kir leh chuan Hotel dangte nen kan Hotel pawh khar vek a ni tawh a. Chutah chuan keini hi Kristian Hotel kan nih hi engtinnge kan lantir ang tih ka ngaihtuah a. Hotel dang chuan an Staff zawng zawngte chu hlawh pawh pe lovin an chhuahtir vek a. Keini erawh chuan thla thum chhung chu kan Staff te hi, hna a awm emaw, awm lo emaw, an hlawh pangngai   theuh pe phawt mai ang kan ti a. Thla thum a ral chuan kan
harsa ta hle a. Bank-ah pawisa puk tur ka zawng leh ta a. Thla thum dang chu hlawh kan pe leh a.Mahse kan business ber a tih theih chuan loh avangin kan Staff te pawh chu hlawh mumal kan pe thei ta bik lova. Mahse zawi zawiin boruak a lo ziaawm a, kan Hotel pawh chu kan hawng a, Covid hma ang chuan a ni thei tawh rih lo. Tunah tak erawh hi chuan kan ziaawm chho ve ta zel a. Kan duh ber mai chu Tourist tam tak lo kal se tih hi a ni a. Pathianin kawng min hawnsak a. Thlawhna kan charter tawp mai a, Hanoi, Vietnam atang khian thlawhna hian mi 120 vel hi kan han phur  thin a, chung chu kan Guest te an ni nghal mai bawk a. Tun kum thar lo awm turah pawh hian Chartered Flight 6 lai ‘line-up’ sa kan nei a ni. Hengte pawh hi Pathian min duhsakna liau liau a ni.

(Chhunzawm tur…)