Tirhkohte Thiltih Zirlai 23-na. Tirhkohte 4:23-30

TIRHKOHTE 4:23-30 MIZCLBSI

Petera te chu an chhuak a, an ṭhiante hnênah an va kal a, puithiam lalte leh upaten an hnêna an sawi chu an hrilh vek a. [24] An thu ngaithlatute chuan a rualin ring takin Pathian an au va, “Aw Lalber, nang, vân te, lei te, tuifinriat te leh a chhûnga thil awm zawng zawng siamtu, [25] Thlarau Thianghlimin min thlahtu i chhiahhlawh Davida kâin hêng thu hi i sawi a: ‘Jentail-te engati nge an thinur? Mipuiin engati nge thil sâwt lo an rêl? [26] Lei lalten an er a, hotute pawh a chungah an inrâwn khâwm a, Lalpa leh a hriak thiha chungah chuan,’ tiin. [27] “Chutiang tak chuan he khuaah hian i chhiahhlawh thianghlim Isua, i hriak thiha chungah chuan, Heroda leh Pontia Pilata te chu Jentail-te leh Juda-te nên an inthurual ta ngei a. [28] Nangin i ruat lâwk ang thlentîr i tum chu tihlawhtling tûrin an pung khâwm a lo ni. [29] Lalpa, ngai teh, tûna an mi vau dân hi, i thu hril ngam tûrin i bawihte hi huaisenna pe ang che. [30] Mite tidam tûrin i kut phar la, i chhiahhlawh thianghlim Isua hmingin chhinchhiahna te leh thil makte tihtîr bawk ang che,” an ti a. [31] Chutia an ṭawngṭai zawh chuan an awmkhâwmna hmun chu a lo nghîng a, an za-in Thlarau Thianghlimin an khat a, huai takin Pathian thu an hril ta a.

Chhinchhiah tur thenkhat:

1. Zirtirte hi tu hnena tawngtai nge an nih an chiang khawp mai. Pathian nung, siamtu, thiltihtheihna neitu, mi zawng zawng chunga thuneitu hnenah an tawngtai a ni. Tu hnenah nge i tawngtai i hria em?

2. Bible a Pathian thutiam leh hril lawk zul zuiin an tawngtai a ni. (Pathian thu hnena in hmeh lo, Pathian thil tum ni miah lo dil tlat hi a awm theiin i hria em?)

3. Pathian hnenah anmahni himnan emaw, an phuba la turin emaw an dil lo. A aia pawimawh a awm ani ang e.

4. Pathian thuhretu ni turin huaisenna an dil.

Sawi chhunzawm ve rawh le. (Ringtute tawngtaina khi uluk takin chhiar la.)

Pathianin an tawngtai a chhang a ni tih lan nan pawn lam leh chhung lamah chhinchhiahna a rawn thleng a. An awmna a nghing a, Thlarau Thianghlimin an lo khat ta bawk a. Huaisen takin Pathian Thu an sawi ta a ni.

Ngaihtuah Tur:

37. Eng hunah nge i tawngtai thin? Enge i sawi thin?