4. Hriat fiah tuma ngaihthlain [With informed listening]
Kristianna hian hringnun thlirna tlang dang reng reng hi a do vek a ni. Mahse “common grace” zirtirna chuan ring lote hnenah pawh finna, chhia leh ṭha hriatna, ṭhatna leh mawina te hi Pathianin a pe ve vek a lo ti a. Chu vangin khawvel thlirna nen chuan indo tlat mah se ring lote hnen aṭang hian kan inzir thei a, kan inzir tur pawh a ni bawk ang. Sual chungchanga thurin kan en chuan keini Kristiante hi kan thlirna dik neih vang hian kan fing lua lo tih a lang a; common grace zirtirna kan en chuan ring lote pawh an thlirna dik lo vang hian an mawl lua lo tih a lang bawk. Chutih rualin an thu kan ngaithla dawn a nih pawhin an thlirna tlang ang ang pawmpui ve ngawt lo turin fing takin kan ngaithla ang.
Kristiante tan Critical Race Theory (Khawthlang ramah chuan chi leh chi inthliarna hi danah te, kalphungah te a beh tlat avangin intluktlanna a awm thei lo tih zirtirna) hi khawvel thlirna tlang a ni tia hnawl siin hmanruaah a la hman theih tho em tih hi zawhna zawh fo a ni. Black kohhranten kum za chuang an lo au chhuahpui tawh chi leh chi inthliarna leh rorelna dik lo chungchang Black leh Latino Kristianten tun hnua an han sawi chhuah ve hian “Critical Race Theory” tia hnawl a ni ta mai hi an lungawi lo hle a ni tih Esau McCaulley chuan a sawi a. Kalphungah rorelna dik lo a awm a ni tih hre thar vun ngo tleirawlin a thlirna chu CRT a bet tlat zirtirna aṭangin a lo nei te pawh a ni mahna. Mahse Marxism awm hma daihin rorelna dik chungchang hi Bible aṭangin Black kohhranten an lo hriat tawh si chuan CRT vang tih chu a dik thei lo vang.
McCaulley chuan Kristian hruaitu, vun ngo ni lo hote chu CRT pawm anga va puh thluk ngawt hi a fuh loh dan pali a awm niin a sawi a.
“1. Hemi chungchanga sawihona tam ber chuan Black Kristiante tihphung hi a ngai pawimawh tlat lo; 2. Vun ngo ni lo Kristiante chu an fel a ni tih finfiah a nih hma chuan an sual tih ngaihdan a siam tlat; 3. A nghawng nat ber mite tan chuan he thu hi thu hlui, awmze awm tawh lo a ni; 4. CRT pawma puh tam berte hi chu Black/White/hnam hrang hrang Kristiante thawhho theihna kawng zawngtute an ni. Chu vangin, CRT pawma inpuhna hluar lutuk hi chuan kohhran rawngbawlna leh thawhhona a tibuai hneh hle a ni.”
A nih chuan Kristian tan Critical Race Theory chu hmanruaah hman theih a ni em? Kawng khatah chuan CRT hi hmanrua ngawta hman chu a theih loh, a thlirna tlang tih loh chu, a chhan chu he thlirna tlang hi a hmanrua chu a ni deuh ber tlat. CRT chuan chi leh chi inthliarna leh intluktlan lohna zawng zawngte hi kalphung dik loh vangah a ngai vek tawp. Kristian theory ni lo dangte ang bawkin he ngaihdan hi a reductionist (thu har tak pawh hi awlsam taka hriat fiah theih a ni tia a awmze peng khat hmanga thil hrilhfiah ngawt) hle a ni. Hei hi a chak lohna lian tak a ni a, a chakna pawh a ni thei tho. Ṭawng upa pakhat a awm: “I hmanraw neih chu tuboh chauh a nih chuan engkim hi perek angin i hmu vek ang.” CRT chuan thil tam tak hi a hmu perek (kalphunga rorelna dik lo) dawn a, perek ni vek lo mah se. Chutih rualin perek tak tak pawh a hmuh hmaih dawn hauh lo. Kan Bible thlirnain a huho mawhphurhna leh kalphunga rorelna dik lote an awm tih a sawi bawk angin kan sual vang leh hnam ziarang avanga kan hmuh hmaih tam tak hi CRT vuantute chuan Kristiante min kawhhmuh thei dawn a ni.
CRT hmanraw ṭhenkhat he’ng “interest convergence” (hnam hnuaihnungte leh hnam chungnungte mamawhna a inan chauhvin hnam hnuaihnungte tan hmasawnna a awm ve ṭhin tih ngaihdan) leh “structural determinism” (intluktlan lohna hi mimal ngaihdan vang ni lo vin kalphungah hian a awm tel sa tih ngaihdan) te hi chuan awmze neiin an thawk vek lo. Mahse Kristiante hi kan Bible thlirna tlanga hmanraw ṭhenkhat kan nei tih pawh kan hriat tawh mang lohte min hriat nawntir thei ang, entir nan sual chungchanga thurin te hi (hei hi Kristianten ‘interest convergence’ kan hriatthiam dan a ni). Tin, thu thiltihtheihnate pawh min hriat nawntir thei ang. Christopher Watkin leh Esau McCaulley te hian Bible-in hnam ziarang chik taka a bukna hmanrua hrang hrang an tarlang a, he’ngte hi tunlaia kan sawi chhuah leh tak ho ai hian an hmasa zawk daih a ni. An hmanrua va ṭawm ve ngawt kher lo va CRT vuantute thu ngaihthlak hian kan hmanraw neihte min hriat thartir thei a ni.
5. Fiah taka kan thu hriat puang chhuakin.
Khawvela rorelna dik a awm theihna tura thawktu Kristian chuan a ruk a ralin a thawk tur a ni lo. “Chi leh eng” kan nih chuan kan tum ber chu miin kan thiltih ṭhatte an hmu ang a, “kan Pa vana mi an chawimawi thei ang,” tih hi a ni (Matthaia 5:14-16; 1 Petera 2:12). Miin kan rinna an hriat miau loh chuan hei hi a thleng thei lo. Rorelna dik a awmna tur ngawr ngawrin rorelna dik hi kan bei lo, Krista leh Chanchin Ṭha avangin kan bei a ni zawk. Rorelna dik kan beihna kawngah hian engtin nge fiah takin kan thu hriat hi kan puan chhuah theih ang?
A hmasa berin thuhretu nihna chuan inngaitlawm taka ngaithlatu (a chung lam en la) nih a keng tel. Kan thu hnialtu apiang chapo taka kan hnawl zel mai chuan tu mahin Kristiante hi min zah ngai lo vang. Kan zirtir a nih chuan thuhnuairawlh takin kan zirtir ang (2 Timothea 2:24-25). Min hnialtute hmusit takin kan hnial let hrep ringawt zel a nih chuan Chanchin Ṭha hrilhna remchang tak kan bawhpelh zel tihna a ni.
A pahnihnaah, khawvelin Kristianna leh kohhran hi politics khelhna hmanrua emaw an tih mai lohna turin Kristian kohhran leh rinna hi eng political party emaw a hruaitute emaw nena inzawm thuk lutuk loh hi Kristian thuhretu nihnain a ken tel tlat a ni (hnuai lam en la).
A pathumnaah, thawhpuite inang khat renga en chung zelin khawvel ngaiha rorelna dik chu a famkim lohnate thuhnuairawlh tak siin kan hrilh hre zel ang. Mi thiam tam tak chuan liberal leh progressive ngaihdante hi Bible aṭanga lak chhuah an ni mai lo va, tunlai khawvel kalphung hian rorelna dik awmna khawvel din tura midangte tana sum leh thiltihtheihna pek ral duhna chhan tur a nei tawh lo hrim hrim an ti a, a awm ang riau lehnghal. Tunlai khawvel hian a duhthusam ṭhatna tungding tura a mamawh tawk ṭhatna hi a nei meuh tawh lo a ni, mihring dikna chanvote leh retheite tuamhlawmna chenin.
Kohhran hna pui ber chu Pathian Thu hmanga Chanchin Ṭha puan leh zirtira siam tih a nih lai mekin, zirtira siamna chuan Kristiante chu rorelna dik a awm theih nana bei turin a fuihin a thuam chak ang, chuti ang a nih loh chuan Pathian Thu mil a ni thei lo.
Kristian ṭhenkhat chuan ringtute’n rorelna dik kan hriat dan hi a dik zawk tiin midang kan hnial tur a ni lo va, khawvel tana thuhretu ni turin kan nunah kan tilang mai tur a ni tih ngaihdan an nei a. A eng emaw zawk zawk a nih a ṭul kher lo. Alasdair MacIntyre chuan liberal individualism (uchuak taka mimal dah zalenna) leh Marxism (Karl Marx-a zirtirna, mimal chunga ram dah lalna) kan hnawl ve ve phawt chuan “ṭan hmun dik leh ṭha, thil thlir nan leh chetlak nan pawha rin tlak” kan nei dawn chauh a ni a ti. Bible in rorelna dik a tih chu kan “nunpui” ringawt a, innghahna ṭha a nihzia kan tarlang tel lo a nih chuan, kan khawvel kalphung tlu chhe mek laimua awm thlarau lama ṭamna rawn siamtu relativism (engkim hi a thlirtu ngaihdana innghat a ni tih ngaihdan) hi kan ṭan ve tih a kawk daih thei ang.
chhunzawm tur
*Tim Keller (1950-2023) was an American Presbyterian pastor, preacher, theologian, and Christian apologist. He was the chairman and co-founder of Redeemer City to City, which trains pastors for service around the world. He was also the founding pastor of Redeemer Presbyterian Church in New York City and the author of several best selling books. This article can be found here: https://gospelinlife.com/article/justice-in-the-bible/
Discover more from NUN HRUAITU
Subscribe to get the latest posts sent to your email.