Tirhkohte 4:7-14 Petera leh Johana chu a laiah an dintîr a; “Engtia tidam thei nge in niha, tu hmingin nge he thil hi in tih?” tiin an chhâl a. [8] Tichuan, Petera chu Thlarau Thianghlimin a khat a, an hnênah, “Mipui hotute leh upate u, [9] vawiinah hian kebai tihdam thu-ah engtia dam nge a nih min zâwt a ni bawk a, [10] nangni zawng zawng leh Israel mi zawng zawngin hre teh u; Nazaret Isua Krista, in khenbeh, Pathianin mitthi zîng ata a kaihthawh leh tâka hming khân he mi hi tihdam a ni a; tûnah hetah in hmaah dam varin a ding ta a nih hi. [11] Ani hi alâwm, nangni in satuten in duh loh lung kha, a kil lung pawimawh ber a lo ni ta si a. [12] Tu dang hnênah mah chhandamna a awm lo, vân hnuaia mihring hming sak zîngah min chhandam thei hming dang rêng rêng a awm lo,” a ti a. [13] Petera leh Johana huaizia chu an hmuhin, lehkha thiam lo leh mi mâwl mai an nih an hriatin, mak an ti hle a; Isua hnêna awm ṭhîn an ni tih an hre ta a. [14] Tin, an mi tihdam, an kianga ding chu an enin eng mah sawisêl tûr a awm si lo.
Sawi Zauna : ‘Petera chu Thlarau Thianghlimin a khat a,’ tih kan hmu a. Petera chu Thlarau Thianghlim thuneihna hnuaiah a pumin a awm, a control tihna a ni. Petera thu sawite chu Pathian atanga chhuak a ni tihna a ni.
‘Kebai tih dam thu-ah thil sual ti a puhin kan awm a ni maw?’ tiin Petera hian a zawt let a ni. Mi tanpui, thil tha, thil dik tih avangin man an ni tih a tarlang a. A mantute a khing let, a puh let tihna a ni. ‘Min manna chhan, thiam loh min chantir in tumna chhan hi in ngaihtuah chiang em,’ a ti a ni.
Isua avanga an tawrhna chuan huaisenna a pe a, finnaa thuam an ni. A hunlaia mi ropui, mi fing, roreltute, Pathian Thu hria, lehkha thiam ber berte chu sangha mantuten an dah nil ta vek mai a ni. Isua hi danglamna siamtu, engkim ti letling vektu a ni. Isua neitu an nih avangin an zam lo va, tumah an hlau lo, Pathian thiltihtheihna leh finnaa thuama an awm avangin.
Ngaihtuah chhunzawm i la:
34. “Tu dang hnênah mah chhandamna a awm lo, vân hnuaia mihring hming sak zîngah min chhandam thei hming dang rêng rêng a awm lo,” tih kan hmu a. Chhandam ngaiin i inhria em, eng atangin nge chhandam i ngaih? Isua chhandamna hi changin i in hria em, engtin nge i hriat theih? (Isua ring la, a thu bel la, nitin a chhandam dawn che nia.)
35. ‘Isua hnena awm thin an ni tih an hre ta a,’ tih hi enge a awmzia ni a i hriat?
Discover more from NUN HRUAITU
Subscribe to get the latest posts sent to your email.