Bible a rorelna dik (Justice in the Bible) VI- Tim Keller* (chhunzawmna)

Mimal mawhphurhna:

Tichuan hun kal tawha mite leh tun huna mite, inlaichinna leh inzawmna kan neihpuite sual avangin kan sim a ngai a ni tih kan lo hre ta a. A nih chuan Thuthlung Hluia chang pahnih, mi chu mahni sual avanga hrem ngei tur an nih thu inziahnate hi engtin nge kan hrilh fiah tak ang?

A hmasa zawk chu Ezekiela 18:1-32 a ni a: “Thil tisualtu chu a thi tur a ni. Fapa chuan a pa khawlohna chu a tuar lo vang a, pa pawhin fapa khawlohna chu a tuar hek lo vang” (chang 20). A pahnihna chu Deuteronomy 24:16: “Fate avangin pate tihhlum tur a ni lo va, pate avangin fate tihhlum tur a ni hek lo; mi tin mahni sual avang ṭheuhva tihhlum tur an ni.” Kan hmuh tawh angin a huhova mawhphurhna a awm a. A nih chuan a huho leh mimal mawhphurhna chuan eng nge inzawmna an neih?

A chhanna chu, inzawmna inbuk tawk chiah lo deuh an nei, mimal mawhphurhna a buk a rit zawk avangin. Entir nan, hruaitute chuan an enkawlna hnuaia mite tihsualah mawh an phur ve tur a ni ang, anmahni kut ngeia tihsual ni kher lo mah se. Amaherawhchu chu sual titute chuan mawh an phur nasa ber thung ang.

Thuthlung Hlui zirtu Walter Kaiser chuan he thil hi a sawi thiam viau mai. A hmasain Ezekiela 18 chuan kan thlarau chatuan hmun tur chu kan sual sim dan leh kan thiltihah a innghat a ni tih a tilang a. Pathian hian thlahtute sual emaw hnam sual emaw vangin tu chungah mah thu tawp a siam ngai lo va, anmahni sual hmang chauhvin a siam ṭhin. A dawt lehah Deuteronomy 24:16 chuan mihring rorelna dan chungchang a sawi a. Deuteronomy chuan Israel roreltute chu an thlahtute emaw, an thlahte emaw sualna avangin tu mah dan angin an hrem tur a ni lo tih a hrilh a. A huhova sualna chuan mimal chhia leh ṭha hriatna mawh chu a lem zo tihna a ni lo va, mimal mawhphurhna pawhin a huho mawhphurhna leh sual a awm tih chu a paih thla tihna a ni hek lo. A huho mawhphurhna chu a awm ngei a, mahse a tawpkhawkah chuan kan tihsual chu kan mawh ngei a ni.

Mawhphurhna leh thil thliar harsa:

Secular ngaihdan hi a reductionist duh viau – hringnuna harsatna zawng zawng hi a chhan pakhat an zawng ngawt ṭhin. Chu vangin tunlai progressive ho chuan mimal mawhphurhna dah bovin a huho mawhphurhna lam hlir an sawi a, conservative leh Libertarian ve thung chuan a huho mawhphurhna reng a awm lo an ti ve tlat thung. Left lama mite chuan intluktlan lohna reng reng chu rorelna dik lo vangah an puh vek a, Right lama mite ve thung chuan intluktlan lohna reng reng chu mimal tlaktlai loh vangah an puh ve leh vek thung.

A khawi lam lam zawk pawh kan ṭan a nih chuan rorelna dik chungchanga secular thlirna mit kan hawh tihna a ni ang a, Bible thlirna kan hmang lo tihna a ni ang. Bible chuan ka sualte leh hringnuna ka dinhmun (ka hausa emaw ka rethei emaw) chu thil hrang hrang vang a ni a ti a, chu’ng zingah chuan mimal, a huho leh kan chhehvel boruakte pawh an tel. Retheihna pawh hi mimal hlawhchhamna leh tihsual vang a ni thei a (Thufingte 6:6-7; 23:21), khawtlanga rorelna dik lo a awm vang leh khawtlang inrelbawlna fuh loh vang a ni thei a (Thufingte 13:23; 18:23; Exodus 22:21-27), a nih loh vek pawhin kan chhehvela thil thleng tuilian, hliam leh hrisel lohna vang pawh a ni thei ang. He’ng teh nuaih a nih avang hian rorelna dik pek chhuah – an phu tawk an hlawh leh hremna an hmuhte – hian finna thuk tak, beng sika ngaihtuahna leh theih tawpa fimkhur a mamawh a ni.

chhunzawm tur

*Tim Keller (1950-2023) was an American Presbyterian pastor, preacher, theologian, and Christian apologist. He was the chairman and co-founder of Redeemer City to City, which trains pastors for service around the world.  He was also the founding pastor of Redeemer Presbyterian Church in New York City and the author of several best selling books. This article can be found here: https://gospelinlife.com/article/justice-in-the-bible/