TIRHKOHTE 4:5-7 MIZCLBSI
A tûkah chuan Juda hotu te, upa te, Dân zirtîrtu te Jerusalemah an inkhâwm a; [6] Puithiam lalber Ana te, Kaiapha te, Johana te, Aleksandra te, puithiam lalber chi zawng zawngte pawh, Jerusalem khuaah an awm khâwm a. [7] Tin, Petera leh Johana chu a laiah an dintîr a, “Eng tih theihnain nge, tu hmingin nge hêng hi in tih?” an ti a, an zâwt a.
Sawi Zauna : Juda hotu te, upa te, dan zirtirtu te- rulers, elders and teachers of the law: rorelna sang ber Sanhedrin an tih a thu thin ho an ni. Puithiam lalber Anna te, Kaiapha te, Johana(Anna fapa ni a ngaih a ni) leh Aleksandra: a hunlaia mi ropui, sakhua leh khawtlang hruaitu, thu neitu berte an ni. Kohhran tiak tir, mi thar deuh vek, mi lian leh mi ropui awm lo, hruaitu experience engmah nei lo chuan dodaltu a nei lian nghal khawp mai. A zamawm duh ngawt ang. An tum ber chu tih thaih, vau beh, intimidate a ni.
Eng tih theihnain nge, tu hmingin nge heng hi in tih? Lalpa pawh kha, heng mite tho hian hetiang zawhna hi an zawt ve tho a. Temple a then thianghlim tum khan, “Eng thuneihnain nge hêng thil hi i tih? Tu nge thu pe che?”, tiin (Matthaia 21:23). Juda ho ngaihtuahnaah chuan thiltihtheihna hi hmingah a bet tel ve tlat a ni. Chuvangin Barjona- Jona fapa titein an in ko thin reng a ni. A fapa chuan Jona hming a keng a, Jona thuneihna leh thiltihtheihna a chhawm avangin. Tu hmingin nge? Hming hian awmzia a awm thei khawp mai. Delhi hi ram hrang hrang aiawhtu, diplomat awmna a ni. US Embassy thu chhuak chu ngaihpawimawh a ngai. USA hmingin thu an sawi tlat avangin huai pawh an huai. Bible hi Pathian atanga thu chhuak, Pathian hminga lehkhabu kan neih a nih avangin a van pawimawh dawn em!
Ngaihtuah Atan:
33. Tu aiawhin nge, tu tan nge, tu hmingin nge i din a, tu hmingin nge thil i tih a, tu ropui nan nge i pen chhuah ve thin le? Isua, lei leh van Lalber hminga ding thin i ni em, tunge i hlauh thin a, tu lungawina nge i zawn thin?
Discover more from NUN HRUAITU
Subscribe to get the latest posts sent to your email.