MAWHPHURHNA
Bible mil rorelna dik lan chhuahna palina chu mawhphurhnaah a ni – a huho leh mimal mawhphurhnaah. Rorelna dik sawi fiahna awlsam ber pawl pakhat chu “mite hnenah an phu tawk ang pek” tih hi a ni. Mahse, mahni sualah chauh hian em ni mawh kan phurh dawn? Nge ni a, midangte sualah pawh hian mawh kan phurin kan inhnamhnawih ve reng le?
A huho mawhphurhna:
Josua 7 ah chuan Akana’n Jeriko aṭanga rallak sum a lo chheprelh thu kan hmu a. Akana chhungte pawh kha ama rualin tihhlum an ni ve nghal ni awmin a ngaih theih (chang 15, 25). Chu mai a la ni lo va, Pathianin Israel hnam pumpui kha Akana thiltihah khan mawh a phurhtir a. Chu vang chuan Israel mi ṭhenkhat chu Ai khua an run hmasak ṭumin tu nge a nih pawh an hriat loh mi thil tihsual avangin an thih phah hial a (chang 5, 11-12). Numbers 16 ah Kora, Dathana leh Abirama te chhungte chu anni pathum thiltih avangin an thih phah vek a. 2 Samuela 21 ah Pathianin Israel lakah kum thum ṭam a tlaktir a, ram tana an ṭawngṭaina pawh a chhang duh lo va (chang 14). Davida’n a chhan a han zawh chuan Gibeon mite laka Saula chet dan vang a ni tih Pathianin a hrilh a, hetih lai hian Saula chu a thi daih tawh a ni.
He’ng thute han chhiar hi chuan Pathian leh Israelte hi thuthlung inlaichinna thuk tak mai nei an ni a, chu vangin Pathian pawhin a huhovin, a hnam angin mawh a phurhtir zel a, anni zinga mi ni ve lo, pawn lam mite chu mimal angin mawh a phurhtir zel thung tih ngaihdan neih mai pawh a awl khawp. Chutih rualin Pathian chuan ring lo hnamte pawh an thlahtute tihsual chu a huhovin mawh a phurhtir ve tho a. 1 Samuela 15:2 ah Aigupta aṭanga Israel fate an chhuah laia an lo chet dan avangin Amalek ho chu Pathianin a hrem a, chu pawh kum za tam liam tawh hnuah a ni. Deuteronomy 23:3-8 ah Pathianin a mite zinga tel lo turin hnam ṭhenkhat (Ammon ho, Moab ho) te a tih laiin ṭhenkhat chu a ti leh chuang lo (Aigupta) – hei pawh hi chhuan tam tak kal taa an thlahtute khawsak dan vanga ti a ni. Chuti ang zelin Amosa 1-2 ah Pathianin ring lo hnamte chu hun kal tawha an sualte avangin mawh a phurhtir a, he’ngte hi indo laia an chet dan vang leh hnam tam tak sala an man avangin a ni.
Isua thawh leh hnuah khan Thuthlung Thara hruaitute khan Isua thihna chungchanga a huhova mawhphurhna an lak a ṭulzia an hre thar a. Tirhkohte Thiltih 2 ah Petera’n khatih hunlaia Jerusalema awm zawng zawngte kha Isua thih thuah mawh a phurhtir a (Tirhkohte Thiltih 2:22-23, 36; 10:39), thi tura Isua mantirtute an ni vek chuang hauh lo. Paula pawhin Pisidia rama Antiokei khuaa Judaho zinga thu a sawi ṭumin khatih hunlaia Jerusalema chengte leh an lalte kha Isua khengbettute an ni a ti (Tirhkohte Thiltih 13:27). Krista thih thuah Judate zawng zawng chu a puh lem lo. He’ng bakah hian Ezra (Ezra 9) leh Daniel (Daniel 9) te pawhin an mimal tihsual ni lem lo, an mite tihsualah mawh an la a, sual an puang a ni.
Heti a nih chuan Bible hian a huho mawhphurhna hi tunlai Khawthlang mi, individualism la vawng em emtute rin phak bakin a zirtir a nih chu. Chutih rualin a zawng zawnga han inhmehbel vek chi chu a ni lem chuang hauh lo.
chhunzawm tur
*Tim Keller (1950-2023) was an American Presbyterian pastor, preacher, theologian, and Christian apologist. He was the chairman and co-founder of Redeemer City to City, which trains pastors for service around the world. He was also the founding pastor of Redeemer Presbyterian Church in New York City and the author of several best selling books. This article can be found here: https://gospelinlife.com/article/justice-in-the-bible/
Discover more from NUN HRUAITU
Subscribe to get the latest posts sent to your email.