Tirhkohte Thiltih Zirlai 14-na. Tirhkohte 2:42-47 – Dr. A. Zothansanga

TIRHKOHTE 2:42-47 MIZCLBSI

Tirhkohte thu zirtîr ngaithlaa inpâwl khâwmin, chhang phel leh ṭawngṭaiin an awm ho ṭhîn a.  [43] Mi tinin an zah ta hle a, tirhkohte chuan thil mak leh chhinchhiahna tam tak an ti a. [44] Ringtu zawng zawngte chu an awm khâwmna inah an awm ho ṭhîn a, engkim an inṭâwm vek a. [45] A neite chuan an in leh lo te leh an thil neih te an hralh a, an châkkhai daih tâwk ṭheuhvin an zaa hnênah chuan an sem ṭhîn. [46] Ni tin Tempulah lungrual takin an inkhâwm ṭhîn a, in hrang hrangahte chhang an phel a, hlim tak leh inphal takin chaw an ei ho ṭhîn. [47] Pathian an fak a, mi zawng zawng duhsak an hlawh a, Lalpa chuan a chhandam apiangte chu ni tin an zîngah a tel belhtîr zêl a.

Sawi Zauna: ‘Tirhkohte’ a tih hi Lalpa zirtir 11-te leh Juda thlaktu Matthia-te kha an ni. An thu zirtir hi Hebrai Bible-Thuthlung Hlui, Lalpa Isua nun leh a zirtirna, a bikin a tawrhna, a thih a phum a nih thu leh a thawhleh thute ni berin a lang. (Tirkohte bu a thu sawite leh a hnua apostolte thu ziakte chhiarin kan thlun zawm thei a ni.)

Apostolte hi thu zirtir leh ziak tura Pathianin a ruat an ni a. Bible-a an thu ziakte hi thil dang nen khaikhin loh tur a ni. Tu thu ziak, tu zirtirna dang mah (he thu ziak pawh telin) hi Bible nen in ang, level khata dah ngai loh tur. Pathian Thu, Pathian thawkkhum, Pathian ka atanga chhuak chu Bible chauh hi a ni.

Ringtu hmasate hi inpawl, fellowship neiin an awmho thin a, chhang an phel a, an tawngtai nasa thin hle a ni. Chhungkaw khat ang maiin an khawsa a, an in duhsakin an in ngaihsak hle tih a lang bawk. Neih thawhkhawm a intawm hi ram in relbawl dan kawng khat Communism nen a in an lohna chu, zirtirte hi chu anmahni duh thu a pe an ni a, Communism-ah chuan dan anga neih tur, phut a, tih luih hial thin an ni. Ringtute hi chu tumah pe tura phut emaw fuih emaw pawh an ni lo, tih luihnain thil an pe lo. Mahni duh thu ngeia pe an ni. An in lungrualna leh tan hona hi a chhinchhiah tlak khawp mai.

Pathian an fak a, mi zawng zawng duhsak an hlawh a, Lalpa chuan a chhandam apiangte chu ni tin an zîngah a tel belhtîr zêl a.

(Tirhkohte Thiltih bu hi thil thleng ziahna bu, historical record a ni. Ringtu hmasate awm dan ang hian awm tur tih zirtirna a keng lo a ni tih hriat a tha. Heng an awm khawm a, neih intawma an awm hian buaina leh harsatna a hnu-ah a thleng a, Jerusalem kohhran chu midangte puih ngaiin an awm chho a ni tih pawh hriat a tha.)

Ngaihtuah zui a tan:

24. Ringtu hmasate awm dan leh tunlai ringtute kan awm dan hi khaikhin la, an tih dan chhawm ngai ni a i hriatte han sawi teh?

25. Kan zirlai Tirhkohte 2 : 42-47 uluk takin chhiar leh la: ringtute thil tih thin tunlaia tih rem ta lo emaw tul lo emaw hriat i nei em? Tih tawh loh tawp tur i ti nge, a tlukpui, a dangin thlak a ngai i ti?