COUNSELLOR HUANG – ‘KRISTIAN CHHUNGKUA’ by Dr. KL Biakchungnunga

• Dr. KL Biakchungnunga

(Thu lakna : 17th July 2011, Thalaite Thian)

September beirual thlâa kan thuzir tûr hi ‘Kristian chhùngkua tih a ni dâwn bawk a. Tûnlai khawvêla Kristian chhûngkua nihna phawkchhuak ber tih hial ngam, 1993 kum thlenga a thusawi atanga Isua Krista hnena inhlân ringawt pawh mi maktaduai 2 leh nuai 5 (2.5 million) lai nia chhût, vaibêlchhe 2 leh maktaduai 2 (2.2 billion) hnena Krista chanchin hril tawh, Gallup list of admired people for 20th Century-a number 7-na hauh phâk, Billy Graham leh a fâte chanchin hi i han en thuak thuak teh ang.

Pian leh mûrna:

Billy Grahama hi a pian leh mûrna chu Presbyterian Kohhran a ni. A pa William Franklin Graham leh a nu Morrow Coffey te hi Charlotte, North Carolina, USA-ah bawng vulh ṭhin an ni a. November 17, 1918-ah a piang a. Kum 16 a nihin American Independent Baptist Evangelist – Mordecai Ham-a Pathian thusawi aṭangin a piangthar a Sharon High School aṭanga a graduate hnuah, Bob Jones University-ah semester khat a zir a, an kalphung a rilrem loh avângin, Trinity College of Florida-ah a insawn a. Heta a zir lai hian Pathian kohna a dawng a. Wheaton College-ah lût lehin, Anthropology a zir a; heta a zir lai hian Bible hi Pathian thâwkkhum, dik lo thei lo a ni tih nghet takin a pawm ta a ni. Hun puma rawngbawl tura a inpêk hnuah Baptist Kohhranah lûtin, Southern Baptist member a ni mêk.

Ruth Bell-i nên an intawn dân:

Kum 2007-a Ropuina rama haw ta, Billy Grahama nupui Ruth Bell-i hi, Presbyterian Kohhran tirha China rama medical missionary hna thawk—Lemuel Nelson Bell leh Virginia Leftwich Bell te fanu a ni a; Qingjiang, Kiangsu, China-ah June 10, 1920-ah a piang a. An awmna khua hi Sanghai khawpui aṭanga mêl 300 vela hlâ a ni. China ram bawka missionary nih tumin, Pathian thua inbuatsaih tûrin Billy Gramhama zirna Wheaton College-ah a rawn zir ve a. Billy nena an inhmuh hmasak ber ṭum hian, “Ka lam pana a rawn kal chu mit la sawn lo lêkin ka thlîr a, kan mit leh mit a han intawn chiah chuan, nupui atana ka lungdumtu a ni tih ka hre nghâl a ni,” tiin Billy Grahama hian a rilru leh thinlung a khawih dân a sawi.

Ruthi a tawn hmâ, 1937 kumah, an College-a kal ve tho, Emily Cavanaugh chu Billy hian a ngaizâwng a, a propose nghê nghê a. Atirah Emily hian a duh ve a; mahse, a kum lehah chuan an College-a zir ve bawk, Charles Massey chu a thang leh ta zâwk a. Billy hian a tuar hle a ni. Mahse, Emily aia a lungdumtu zâwk Ruth Bell-i a neih phah ta a ni. China rama missionary tura a rilru a lo siam tawh avângin Ruthi hian Billy hi a pawm nghal mai lova, nasa taka a ṭawngṭai hnuah thutlûkna a siam thei chauh a ni. Tichuan, Wheaton College an chhuahsan hnu thla hnihna, August 13, 1943-ah an innei ta a ni. 1964 kum khân Billy Grahama hi America President atana mipuiin an duh ber a ni a. Mahse, Ruthi hian Chanchin Ṭha hrilh a bânsan chuan inṭhen hial a duh thu a hrilh a, “Nupui ṭhen tawh chu America mipuite hian President-ah an duh che i ring em?” tiin a dodâl tlat a, a nupui thu zâwmin candidate ni tura sâwmna chu a hnar ta a ni. Hmun chêp vângin an rawngbawlna chhui lovin, an fâte panga chanchin kan en thuak thuak ang. An upat dân indawtin:

1. Virginia Leftwich (Gigi) Graham Tchividjian (born 1945)

Gigi hi an fa hming koh a ni. Clinic Psychologist Doctor Stephen Tchividjian nên inneiin, Switzerland, Israel leh Wisconsin-ah te an khawsak kual hnuah, tûnah hian Southern Florida-ah an chêng mêk a, fâ 7 nein tû 11 an nei. Lehkhabu a ziak thin a, Blue Ridge Writer’s Group Special Author’s Award leh National Gold Medallion Award a dawng tawh. America ram pum huap Women’s Conference leh Convention-ah thu sawiin a chhuak deuh reng a, TV leh Radio program ‘Good morning America’, ‘The 700 Club’ tihah te thu a sawi ṭhin bawk.

2. Anne Graham Lotz (born 1948)

Bible zirtir thiam tak a ni. Kum 8 a nihin a piangthar a. Kum 18 a nihin Dr. Daniel Lotz nên an innei. Bible Study Fellowship dinin mi 500 chuang zet a zirtir thin. Zirna lamah College a rap lo. AnGel Ministries dintu Founder a ni a, Pathian thu lam lehkhabu 11 a ziak tawh a, chawimawina pah a dawng nual. A lehkhabu ziak avângin Honorary Doctorate 6 zet a dawng. A lehkhabu ziak 4 zetin Gold Medallion Book Award a dawng a ni.

3.Ruth Bell ‘Bunny’ Graham (born 1950)

Kum 18 a nihin pasal a nei a, an inṭhen leh. Fa 4 leh tû 1 a nei. Kum 40 a nihin College a kal ṭha leh a, Religion & Communication-ah BA a zo. ‘Ruth Graham and Friends’ tih rawngbawlna dinin Founder President nihna a chelh mêk. Kohhran leh khawtlânga mi baihvai, khawhar leh sualin a hliamte ṭawngṭaisak leh enkawlna hnâ an thawk ṭhin. Pathian thu lampang lehkhabu a ziak nual bawk. A lehkhabu hnuhnung ber, “Legacy of Faith: things I learnt from my father” tih chuan chhiar a hlawh hlê.

4. William Franklin Graham III (born 1952)

Christian Evangelist leh Missionary hna thawk a ni. Billy Graham Evangelistic Association (GEA)-ah President a ni mêk a, Samaritan’s Purse an tih mai-The International Christian Relief Organization-ah Chief Executive Officer a ni mêk bawk. Letourneau College a kal laiin a classmate nula Curfew laiin a lo tawmpui avângin hnawhchhuah a ni ve mauh mai. Kum 22 a nihin Jerusalem a zinna Hotela piangthar a ni. Kum 2001-a George W. Bush President atana lâkluh a nih ṭum khân opening prayer hlântu a ni.

5. Nelson Edman ‘Ned’ Graham (born 1958)

College a kal lain a ṭhianten Billy Grahama fapa tia an chhaih ṭhin avângin a hel phah a, zû leh drugs te pawh a tih phah hial. A nu leh pa hmangaihna avânga Krista hnêna hruai a nih hnuah, hun puma rawngbawltu nii Grace Community Church, Washington-ah Pastor a ni tawh a. China rama Pathian thu thawntu East Gates International President niin a nupui Carol-i leh a fapa 2 nên China ramah rawngbawlin an awm mek.