Tiam Tlat E (I Married You) XIV– Walter Trobisch

Bung 4

‘Nimin lamah khan mi pahnih inkarah chauh awm thei inneihna triangle – kalsan, invawn leh tisa pumkhat nih chungchang kan sawi tawh a.

‘A hnu lamah nu pakhatin phone in min rawn bia a, blackboard a triangle ka ziah kha a ngainat loh thu min hrilh a. “Inzawmna lai te, kil leh zum te a ngah lutuk a. Min chhun na thei alawm,” a ti.

‘A sawi tum ka manin ka hria. He inneihna, hmangaihna leh nupa nun awmna triangle hi thil tihdanglam theih loh leh nghet burah ngai lo ula, thil nungah han ngai zawk chhin teh u.

‘Entir nan, ṭum khat chu circus-ah juggler (titla lova thil vawr kual ṭhin) pathum ka hmu a. Awmze nei taka inremin an inkarah awl inchen vek an dah a, triangle a kil thum ang maiin. Pakhatin a ṭhiante pahnih hnenah ball a theh a, a ṭhiante pahnih aṭangin ball a dawng pah zel bawk a. An pe mawlh mawlh a, an dawng mawlh mawlh bawk a ni. Chutianga an inpek mawlh mawlha an dawn mawlh mawlh chhung chuan an thiltih kha tluang takin a kal zel a ni.

‘Inneihna pawh hi he an thiam thil pholan ang deuh hi a nia. A nunna laimu chu he’ng dan zawma tih a nihna te, mimal inlaichinna a nihna te leh tisa inzawmna a nihna te ṭha taka an thawh honaah a innghat a ni.’ Hetih lai hian ka briefcase aṭangin triangle lem thinga siam ka phawrh a, mipuite hmuh theih turin ka han lek lang vel a. A hnuai kil veilam chu vuanin heti hian ka ti a:

‘Inneihna chuan hmangaihna a mamawh a ni. Chu hmangaihna aṭang chuan a duh khawp a hmu a, a hlimna a hmu a ni. Hmangaihna hi inneihna thilpek chu a ni. Inneihna chuan phur reng theihna a pe a, beiseina tawp chin nei lo a pe a ni. Hmangaihna hi inneihna thisen zama thisen kal kual vel ang hi a ni. Nunna petu a ni.

‘Tichuan innei nihna, nupui pasal nei nihna chuan he nunna hi nupa nunah a hlan chhawng a, chu inpumkhatna chu chenna tur hmun a siamsak ta a ni. Nu pakhat chuan he triangle hi puan in ang zawkin mitthla a duh thu min hrilh a. Ni e, inneihna hi chu nupa nun tan chuan puan in a ni ngei alawm. Chumi hmunah chuan inhmangaihte chuan himna leh chenna hmun an nei a ni. Hlauhna ata tihzalen an ni a, lungawina thuk tak leh nun chawlhna tak tak an nei thei a ni.

‘He nun chawlhna hi hmangaihnaah chuan pek a ni ve leh a. Rilru leh ngaihtuahna inlumlet but but ṭhin kara nghing ngai lo bulṭhut nghet tak a lo ni a. He ‘puan in’ chhungah hian tisa inpumkhatna nupa nun chuan hmangaihna a tinghet a, a tipung zel bawk a. Hmangaihna chu dam chhung daih a nih theih nan rinawm turin a hruai a ni.

 ‘Hmangaihna chuan he tisa inpumkhatna aṭang hian chakna a la a ni mai lova, he tisa inpumkhata pawh hi a tichak ve tho bawk a ni. Hmangaihna chuan tisaa nemngheh chu a chak a, a tinghet a, awmze nei leh hlu-ah a siam a ni. Inneihnaa suih ngheh hmangaihna thiltih a nih angin tisa inpumkhatna chu “hmangaihna thiltih” tak tak a lo ni ta a ni.

‘Chutiang zelin “puan in” chhungah chuan hmangaihna thiltih chuan a dawng ringawt bik lova, chu inneihna chu a suih nghet ve leh bawk a ni. An taksa an han inhlan ve venaah khan inhmangaihte khan an inneih thutiam kha an tinghet sauh sauh zel a ni.

‘Inneihna chuan he thutiam tihthar zelna hmang hian hmangaihna a lo tipung ve leh a. Hetiang tur atan hian hmangaihna hian inneihna hi inneihnain hmangaihna a mamawh ang tluk zetin a mamawh ve bawk. Lungngaih chang a lo awm a, hmangaihna chu dai mai thei dinhmuna a lo din hunah nupate chuan innei tawh an ni tih chu hre rengin an thutiam chu inhrilh nawn mawlh mawlh rawh se. “Ka nupui/pasal i ni miau a,” an ti ṭhin. Chutiang chuan inneihna chu hmangaihna veng himtu leh vawng nungtu a lo ni.

Pathian duhzawng

‘Tunlai hian nupa nun, hmangaihna leh inneihna chungchangah thil hriat fiah tawk loh a awm ṭhin. He hriat fiah lohna hi Africa-ah mai ni lo, Khawthlang lam leh Khawchhak lamah pawh a awm tho. Hetiang a nih avang hian kan Bible chang thlan kha a lo tunlai ta riau mai a ni. Thil pawimawh pathumte hi a nei kim vek a. Zawhna lian tak lo awm thei ta chu: Nupa nun, hmangaihna leh inneihna chungchanga Pathian duhzawng chu eng nge ni ta ang? Engtianga inzawm turin nge Pathian chuan a duh? He’ng zawhnate hi tu mahin an chhang ṭha ngam lo.

‘A enga pawh chu lo ni se, hetiang ngaihdan mumal pawh nei ngam lo kan nih lai hian kan awm dan min hruaitu turin rawtna han siam ve hrim hrim ka duh a. Ka rawtna chu hei hi a ni:

‘Pathian duhzawng chu heng thil pathumte thawhhona ṭha hi a ni. Chu vangin thawh hona ṭha an neih theihna chu Pathian duhzawng an ni vek mai. Thawh hona ṭha an neih theih lohna ve thung chu Pathian duhzawng daltu an ni vek mai.

‘He inkaihhruaina hi inneih hma leh inneih hnu atan pawh a dik ve ve a ni. Inneih hma chuan he zawhna hi i inzawh a ngai ang: “Tuna kan thiltih tum hian nakinah he’ng thil pathumte inkarah thawh hona ṭha a siam ang nge nakinah thawh hona ṭha tur a dal ang?” Inneih hnuah chuan hetiang hian i inzawt ve thung ang: “He thil hian thil pathumte thawh hona ṭha a siam ang nge a tibuai zawk ang?”

‘Triangle zalen tak chhunga he’ng thil pathumte thawh hona ṭha chu tihdanglam theih a niin thil thar ngaihtuah chhuah theihna pawh a leng vek mai. Eng dinhmunah pawh dingin eng ram mi pawh ni ila kan mamawh awm kim vekna hlimthla chu Genesis 2:24 ah hian Pathianin min entir a ni. Pathian duhzawng chu Kristian tan chauh lo pawh a lo dik zel a. Mi zawng zawngte tan a dik a ni. He triangle zalen, kan Bible chang hlimthla hi Pathianin mi zawng zawngte min chhawp a ni. Min chhawp ka ti a, thilthlawnpek a ni mah awm e. Pathian chuan kan lak ata engmah hi a phut lui lo, min pek ve zet phawt loh chuan.

Ngaithlatu mipuite chuan rilru taka ngaihtuah zuiin an ngawi ṭhap hlawm a. Blackboard a triangle chu an en a, ka ken lai pawh chu an rawn thlek leh ṭhin a. An rilru tur awm ka han dawnpui a, ka sawi chhunzawm leh a:

‘Tunah chuan huphurhawm in ti pawh a ni mai thei. “Inneihna chu hetiang em em a nih chuan kei chuan inneihna ṭha famkim ka la hlat hle mai,” in lo ti pawh a ni thei e. Kei pawh chutiang chu ka inhmuh dan a ni. Daniel-a pawh hi a ni ve tho tih ka hria.

Daniel-a chu a lo bu nghauh nghauh a.

‘Inneihna ṭha famkim kan tih hi a awm tak tak lo. Inneihna chuan mi a titlawm ṭhin. Mahni ṭhatnate chhuanga chapo lo tura invenna him ber chu nupui/pasal neih hi a ni mai. Triangle kil eng emaw lai hi kan thawm ṭha deuh reng mai a nia.

‘Inneihnaa neuh neuh awm ṭhinte hian heng thil pathum zinga pakhat tal hi triangle-ah khan a invuah fuh chiah lo bik a ni tih an tilang ka’n ti teh ang. Kan tehfunga kan hman hlimthla kha hmangin inneihnaa natna awm theite i han en fiah dawn teh ang. Tunah chuan inneihna lam daktawr vekah lo inngai chhin ula. Inneih damdawi inah kan kal dawn a ni. A chhunga damlo awmte ka han hmelhriattir ang che u. A hmasa berah chuan damlo pakhat, kan triangle veilam kila harsatna nei a ni. Hmangaihna chu a lo dai zo ta. He natna hi hetiang a hming ka phuah a.