MAY DAY, CONCERN LEH KEI

Vawiin May ni 1, 2024 hi  khawvel pumah ‘May Day’ (Labour Day) tia hriat a nih chu kan hre deuh theuhin ka ring a. Kut hnathawktute chawimawina ni a ni a, rilru-ah “Communists” tih hi a rawn lang nghal zuai mai bawk ! Bible chang lar tak, Rom 8:28 hi a dikzia hretu niin ka inhre ve a. Pathianin min hmangaih hmasak avangin amah hmangaihtu ka ni a, ama ruat anga a koh ni hian ka in hre ve tlat bawk a. Hei kum 50 a ni dawn ta, Lalpan min ko nia ka hriat vanga ka nun kawng danglam dawrha ka feh chhuahna kha. Kum 50 chhung hian ka thatna tur hlirin Lalpan engkimin min thawhsak tih hi ka chiang em em mai a, unau tam takte zinga fa u ber Lal Isua unau naupang lam ka ni hi ka lung a awi em em mai bawk a ni.

Kum zabi 20- na a liam dawn hma kum 10 vel chhung khan khawvel pumpuiah Chanchin Tha hril  thuai thuai a tulzia hriatna hian Pathian mi leh Kohhrante a nawr nasa em em a. Hmun hrang hrangah “Great Commission for World Evangelization” (GCOWE) Khawmpui buatsaih a ni a. Chu chuan kei tak ngial pawh hi min nawr ve a, Chanchin Tha hril ngai pawimawh thianza inthurualin CONCERN hi kum 1995 khan kan din a, kum 1996 ah EHA atanga ka chhuah veleh North India Harvest Network leh a umzuitu CONCERN chu buaipuiin kum 28 zet chu ka lo inhmang ve ta a. Kohhran leh Mission hrang hrangte thui khawmin North India, mi maktaduai 500 chuang awmna, Kristian 1% pawh awm lohna hmunah hian mi dang leh pawl hrang hrang nen kan han bung ve tan a. Kum 2001 atang khan rawngbawlna Record hi kan chhinchhiah tan a, Kum 22 kal ta chhung khan CONCERN Network rawngbawlna atang hian ringthar mi 14,15,165 in Lal Isua ringa Baptisma an lo changte hian min tilawm ve em em a ni. Vanrama kan inhmuhkhawm hun tur te mitthlain ka hmu thin….a ropuizia tur chu aw!

CONCERN-ah hian a fawng chelhtu niin Executive Director ka ni chho va. Midangin min chhawk tura ka duhna hi a rei tawh a, mahse kan FCRA a fel hmaa chhuahsan kha a rem lo tlat mai a. Sawrkarin kan FCRA min rawn tihtawpsak ta a, “Hiai taka,” a ni mai! Tunah hian Pathianin kawng dang min reh sak a, ama hruainaa kan kal zel dan tur kan chiang ta a. Tichuan keipawh ka awl thei ta niin ka inhria a, vawiin MAY
DAY atang hian ka chawl ta a ni. Hei leh chen min hruaitu Lalpa chungah hian ka lawm tak zet a ni. A tul anga biak leh rawn theih turin kum khat erawh chu CONCERN -ah hian ka la tangkhang dawn a ni.

“MAY DAY”  tih hi hlauhawm leh harsatna tawkten “Tanpui kan ngai e” an tihna au hla a ni bawk a. Keimah leh CONCERN hian harsatna kan tawk hran lo va, mahse Lalpan fimkhur taka kan awm zelna tura ‘ warning’ min pek a ni bawkin ka hria, April 24 kha kan Wedding Anniversary a ni a, min duhsaktute chibai bukna kan dawng nasa a, kan va lawm em! Kan nupain thian thate kokhawma ruai han theh rupte kan chak a, kan tlin si lo va. “Rs 10,000 hi kan Anniversary lawm nan hmang ve reng reng teh ang,” kan ti a, “Naupang hovin Rs 5000, puitlingin Rs 5000 hmang ila,”  kan ti a. Budget a buai deuh pawhin a pawi lo te kan ti vel a. Pathian thatzia chu …. tlai lamah chhungkaw pakhat min duhsak em em rengtute hian min rawn phone a, “Ka nuin pawisa pek che u a duh,” an rawn ti ringawt a. “Lalpa hi chu a va tha tak, kan senso tur min rawn pe leh dawn a nih chu,” kan ti a. Pathian hian hnung lama sa min barh hi a ching ve a, a let li min rawn pe a nih chu !! ÇONCERN ah hian pension te PF tih te a awm ve lo va. Mahse Gratuity hi a awm ve a, keipawh,kum 28 lai lo awm ve ta chu Gratuity min pe dawn a, ka lak huna 10% tal mi dang mamawh neite han phuhruk hi ka chak et et a ni. A dang chu Nu Sangteii bazar nan!! (A hmang seng lo nasa ang!)

“Mahni in kan nei si lo va, khawnge kan khawsak tak ang?” tih zawhna hi a lo awm leh ta a. Kum 50 chhung in nuam taka min khawsak tirtu Pathian hian Option pahnih a neiin kan hria a. Pakhat chu Delhi emaw, Aizawl ah emaw, in te fel deuh tuemaw saksa lo dah (in lian leh ropui chu kan luah peih chuang dawn lo va!) emaw, Lal Isuan vana hmun min siamsak luah chho tura min koh hi a niin kan hria. A
lungngaihthlak lo khawp mai. Lalpa hi a va tha tak!