Tiam Tlat E (I Married You) XV– Walter Trobisch

Bung 4 chhunzawmna

Inneihna Kawrawng

‘A case ka han sawi zau ang e aw. Nupa chu dan ang thlapin an innei tawh a, an inneihna pawh a rei leh deuh tawh. Nupa nun pawh an hmang ṭhin ngei e. Mahse hmangaihna erawh a tel tawh lo. Hetiang an nih chhan hi tam tak a awm thei ang. A tir aṭangin hmangaihna chu a awm lo pawh a lo ni reng mai thei. Naupang tein hmanhmawh takin an innei thawt thawt pawh a lo ni reng mai thei, hmangaihna nia an hriat khan ‘invawn’ a keng tel lo pawh a ni mahna. A nih loh pawhin an inneihna hi hmelhmai inngaihzawnna leh tisa chaknain a nawr chhuah ngawt pawh a ni thei a, hun a lo kal a, chu’ng hipnate chu a lo nep ta tial tial tihna pawh a ni thei tho. A nih loh vek pawhin an hmangaihna chhem alh lam an lo ngaihthah deuh a, in lam hna leh eizawnna lam emaw, fate lam emaw ten an rilru zawng zawng an lo la ta te pawh a ni thei e. A hranin mahni duh zawng leh tui zawng an um ve ve a, an inhrilh tawn bawk si lova, kar lovah rilru thuhmun an lo pu hlei thei tawh lo a ni.

‘Natna hlauhawm tak a ni. A kai tawh chuan eng inneihna mah hian serious taka nat phah lovin rei a daih thei lo. A tirah chuan he natna hi “innei ang taka langin” a thup theih ve khawp mai, pawn lam khawvel pawh a bum theih viau. Nupa chu in khatah an awm reng tho. Mahse chu chu a ni deuh tawp mai.

‘He natna hi a awm mai mai lo lehnghal. A lo zual deuh chuan hetiangte hian a lang chhuak ṭhin: Nupa chu ṭawngkam leh thiltihah an indim lovin an rawng telh telh a. He indim lohna hian an inlaichinnaah inngaihsak lohna leh kawrawnna riau a rawn siam ta a ni.

‘He kawrawnna hian engtik emaw ah chuan nupa nun pawh a lo nghawng lo thei ta lova. Triangle-a angle pathumte chu lak hran theih an nih si loh avangin he natna hian angle dang pahnihte pawh a lo tichhe ta zel a ni. Chutih hunah chuan nupa nun chu tih tur ve reng leh phurrit angah an lo ngai tawh a. Nupa nun leh inneihna inkarah fel lo a lo insiam ta a ni.

‘Kar lovah pasal zawk chuan a nupui aia amah hre thiamtu hmeichhe dang a zawng a. Nupui pawhin a pasal aia thlamuan theitu tur mipa dang a zawng ve bawk a. Thikthu a lo chhe tual tual a. Sex lama an rinawm loh hmain rilru lamah an lo rinawm lo daih tawh. Tichuan a tawpah uirena chuan dan anga inneihna chu khawih chhe ve lehin triangle-a angle chung ber pawh chu a tichhe ve leh ta a ni.

‘He natna hi film leh thawnthu tam takah sawi niin tarlan a ni tawh a. He’ng film leh thawnthute hian hmangaihna lo thih chhanah inneihna kha dik lo takin an puh tlat ṭhin. Inneihna pawn lamah chauh hmangaihna hi nungdam thei angah min ngaihtir daih a, chutiang hmangaihna chauh chu fak tlak, duhawm, mawi leh thlakhlelhawm angin min ngaihtir daih ṭhin.

‘He ngaihdan hi a dik lo hul hual. Hmangaihna tihlumtu hi inneihna a ni hauh lova, hmangaihna awm lohna hi inneihna tihlumtu a ni zawk. Inneihna pawn lama hmangaihna chu hnimbuk ro, kang ta ang maiah a chang thuai a, a tawpah chuan inhmangaihte ngei pawh a kang ṭhin.

‘He’ng film leh thawnthuten an ngaihtuah thlen phak mang loh thil thleng thei pakhat a awm. Hmangaihna nena hlim taka inneihna, triangle-ah pawh hmangaihnain hmun pawimawh tak a channa inneihna chu. Damna tak chu hetah chauh hian a awm. Chutih rualin hmangaihna a thih hma leh triangle-a angle dang pahnihte an nat tel ve hmaa enkawl erawh a ngai thung.

Damlo dang, a dawta nupa te hi i han en ve leh teh ang. An harsatna chu triangle chungah hian a awm a. He natna hi hetiangin a hming ka phuah a

Rukruk inneihna

He natna hi chu hetiang hian a lang chhuak ve thung a: An nupa khan an inhmangaih niin an inhria. Nupa nun pawh pangngai takin an hmang ṭhin. Mahse dan ang thlapa innei an la ni lo.

‘Hei hi kan tunlai huna thlemna lian ber pakhat chu a ni: dan ang thlapa inneihna chu tihdan phung pangngai ang leka ngaihna, lehkha pawimawh tak pawh ni lo, engtik emawa lak ve mai tur, duh lem loh phei chuan lak loh tawp tura ngaihna hi. Hmangaihna angle leh nupa nun angle te hian inneihna tak tak an tifiah phaa ngaih tlatna rilru a ni.

‘Mi ṭhenkhat chuan tihtakzetin inneih chhin te zuk han sawi a maw le. Mipa leh hmeichhia hi an inmil tak tak dawn em tih hriatna turin hun eng emaw chhung chu cheng dun chhin se an ti. Chutianga an tiha inmil lova an inhriat chuan nupa inṭhen ngai lovin an inṭhaṭhen mai thei dawn niin an hria. Nupa nun leh hmangaihna angle te hian inneihna chu an tifiah famkim nia ngaihna dik lovah he ruahmanna hi a innghat tlat a ni. 

‘Inlaichinna chu a dam lova. A natna lan chhuah dan chu hetiangin a ni: thinlung kehchhia leh nun chhe vek, a bik takin hmeichhiaah. Eng nge in ngaihdan chu ka hre chiah lova, mahse ram tam takah chuan a thianghlimna hloh tawh hmeichhia chuan pasal a hmu mawh lutuk. Kan ramah te pawh sawn pawm hmeichhia chu dinhmun chhe takah a ding a ni. Hmeichhia in nau a pai a ni tih a han inhriat khan hmanhmawh takin loh theih lohvin an inneihtir chuk chuk a. He’ng inneihna tam berte chu a hnu lamah an inṭhen leh nge nge ṭhin.

He’ng nupa inkara fanau lo piangte dinhmun pawh hi kan ngaihtuah a ngai khawp mai. Inneihnain a ken tel tawm hulna kha an tlachham tlangpui. An puan in chung kha a bo a. Ruah a surin a lo far a. Inneihna puan in pum kha an nei lo a ni mai lova, pa pawh an nei lo a ni. Hei hian naupang nuna nghawng a neih dan chu sawi luat a awm thei lo. Chu vangin puan in chung, dan anga inneihna chu a pawimawh em em a ni.’

Hemi ka sawi lai hian amah insawi duh si lova min rawn betu kha ka hre chhuak lo thei lo. Zaninah hian mipui zingah hian a awm ve leh ang em le? He ngaihtuahna avang hian heti han ka han sawi belh leh a:

‘Puan in chung hlep thla a, “hmangaihna zalen” emaw “inneih chhinna” emaw ti ṭhinte hian invenna hmanrua (condom ldt.) hman zel a ngai tih hi an sawi tel theihnghilh tlangpui. A hmangtu emaw, an inlaichinnaah emaw chu chuan nghawng a nei lo ang mai hian an awm a. Hei hi lem channa mai a ni. Inneih hmaa sex hmanah ngat phei chuan he’ng invenna hmanraw ṭhenkhatte hian hmangaihna takna leh zahawmna an dal zawk thei a ni.’

Hetah hian ka tim deuh a. Eng china thukin nge ka sawi ang tih ka hre thiam lo a ni. Ka note-a ‘a chhunga tihtlak loh,’ ‘inkhalh nasat lutuk,’ ‘condom’ tih inziakte chu ka han kawk a. Daniel-a chuan a rawn bih thuak a, a lu a thing zauh a. Hetianga pulpit-a thawh hona hi ka tan chuan tawnhriat danglam tak a ni. A thu chu zawmin chu’ngte tel lo chuan ka sawi chhunzawm leh a:

‘Ka’n sawi nawn leh ang e: Hmangaihna daltu a ni. A hmaa inneihna kawrawng kan sawi laia kan hmuh chhuah ang tho kha kan hmu chhuak leh thei a ni. Triangle-a angle pakhat pawh a dam loh chuan a dang pahnihte pawhin an kai thuai a, an dam lo ve nghal ṭhin. An pathum chuan an inhnial ta hluai a ni ber e.

‘Hmangaihna a awm loh chuan inneihna chu a keh chhe mai a. Dan anga inneihna tak a awm loh chuan hmangaihna leh nupa nun chu an inhmelmak thuai mai ṭhin.

‘Nupa nun chu hmanhmawh leh hmuh hlau reng rengin, hun leh hmun zahawm lo takah hman a lo ni a. Chu chuan hmangaihna chu par chhuanga vul chhuak theiin a siam lo hrim hrim, a par a tichuai zawk ṭhin.

‘He harsatna hi Europe leh America-ah chuan kan nei deuh reng mai a ni. Tun hnai deuha chhuak German film, film ṭha tlem te zing ami chuan rukruk inneih natna chungchang hi fiah takin a tar lang a. Film-ah chuan nupa tuak thar la naupang ve tak, hlim taka an cheng dun hi a lo lang a. Minute sawmhnih vel a han liam chuan entute chuan chu nupa tuakte chu dan angin an innei lo a ni tih an hre ta a. An ṭhiante leh an chhungte pawhin innei ṭha ve mai turin an thlem ṭhin a. An duh tlat bawk si lo. A tirah chuan engkim a fel vek tho. Mahse hmeichhia chu a lo rai ta a. A rai tih a “pasal” hnena hrilh turin an inkara hmangaihna leh inrintawkna chu a lo thuk tawk tlat lo. A kalsan mai ang tih a hlau tlat. Tichuan a ruka tihtlak a lo tum ta a.

‘A tawp berah chuan nau a tihtlak tawh hnua chau taka an ṭhutthlenga a tluzal lai a lo lang ta a. A mipa chu a hna bang a lo haw a, thil awm dan a rawn hre thiam vek mai. An inkara dawhkan lian tak awm lehlamah chuan a va ṭhu a. A reh tlawk tlawk mai. A tu zawk mah an ṭawng lo. An inkarah sawi tur engmah a awm tawh lo. Dan anga inneihna angle a awm loh avangin hmangaihna chuan a takna leh a chhelna tihlanna hun tur a nei ta lo. Sex chuan hmangaihna a lo tihlum ta a nih chu.’

Ka han chawlh leh det chuan a ṭhalai lam deuhte awm dan chu a danglamin ka hria a. An mit aṭang chuan he film hi an khawpuiah ngei pawh siam ni se, thil mak danglam takah an ngai dawn lo tih ka va hmuin ka hria.

Kan inneihna damdawi ina damlo dang hi i en leh ang hmiang. Inneih natnaah hian hlawm thumna a la awm a. Triangle-a angle dinglam kil amite hi an ni. He angle pawh hi a lo dam lo thei reng a. He natna hi hetiangin a hming ka phuah a

Khamkhawp hmu lo inneihna

‘A hmasa berah chuan a dinhmun ka han sawi ang e: Nupa chu innei an ni, dan ang thlapa innei an ni, kum sawm emaw sawmhnih emaw dawn lai an innei tawh. An inhmangaih em em a, inṭhen te chu an ngaihtuah duh teuh lo mai. Amaherawhchu inhmangaih teh mah se an nupa nun chuan a tihlim lova, khamkhawp an hmu lo a ni.

‘Pasal zawk ka hnenah a lo kal a, heti hian a rawn ti a: “Ka nupui hi a zei lo lutuk. Awmphung pangngai pawhin a awm ve ngai lo. Nupa nun hi a pal tlang ve mai mai niin ka hria, a sawm pawh min sawm ngai lo. A nawmna pawh hi a tem ve lo a ni.”

‘Nupui zawk ka hnenah a lo kal ve leh a, heti hian a rawn ti ve leh a: “Ka pasal hi a hmanhmawh leh lutuk a. Min nawr lui a, min tilui a ni ber ṭhinin ka hria. A duhkhawp pawh hi a ngah ṭhin lo tawp ang.” A nih loh pawhin a letling hlauhin a sawi thei ang: “A chau reng mai a. Ka thlakhlelh ve deuh pawhin min hnungchhawn a, min mutsan daih zel a. A pa thei lo a nih ka ring.”

Ka rin loh deuh maiin an nui ta hluah hluah mai a. Africa ramah chuan pa theih loh hian hmuhsit a hlawh hle tih khatih lai tak khan ka lo theihnghilh palh a ni. Mipa pa thei lo chu mihring pawh tluk lovah an ngai a. African pate hi chuan pa theih loh hi thih ai pawhin an hlau awm e.

‘Inneihnaa a tisa lam natna ber hian nupaah tawrhna nasa tak a thlen thei a ni. An inhmangaih em avang leh intihhlim tawn an duh em avangin an tawrhna chu a nasa zual sauh zawk a. He natna hi khawi aṭanga lo kal nge ni?

‘A tlangpuiin khamkhawp hmu lo inneihna hi rukruk inneihnain a hrin chhuah a ni duh khawp mai. He thil ka sawi hian inpawlna aṭanga inkaichhawn theih natna lam ngawt ka ngaihtuah hran lo. Khamkhawp hmu lo inneihna hi a ruka inneihna hrin chhuah a ni duh khawp mai ka tih hian kawppui rilru hmin zan lo, hmanhmawh em em leh a ruk a rala chet ngai nena inpawlna ka sawi zawk a ni. Hetiang inpawlnaah hian taksa chauh a tel a, thinlung leh rilru tak tak a tel mawh em em.

‘He natnain angle dang pahnihte a nghawng dan chu kan hmu thei ang. Tisa inpumkhatna chu hrehawm a lo chan tawh meuh hi chuan pakhat zawk zawk emaw, an pahnih emaw khan lungawi lohna an nei thuai a, inhmangaih zawk leh zawk loh chungchangah inhnial buaina a chhuak thuai ṭhin. Ninawm a lo ni chho a. Nupa inkungkaihna thuk tak ni tur chu rilru tak tak pe lova ngai neih thilah a lo chang a. Hmangaihna a lo dai a. Hetiang a thleng tawh a nih chuan inneihna pawn lama midang zei deuh zawk emaw, dawhthei deuh zawk emaw nena tisa chakna lo inhrithla mai tura thlemna hi a sosang duh khawp mai. Chu chuan dan anga innei nihna lai kha dinhmun derthawngah a dah ve leh a. A tawpah chuan uire leh inṭhen a ni tawh mai. He natna pawh hi a hun taka enkawl a nih loh chuan inneihna tihlumtu a ni thei a ni.’

Hemi ka sawi zo hi chu ka chhungrilah ka thaw huai mai. Ka thusawi chinah chuan a ngaihthlak hrehawm lai ber an ni a, mahse Daniel-a chuan ihe lovin a lo letling mawlh mawlh a, a upa lam deuhte pawhin huatah an la lem lo niin ka hria.

Ka’n sawi zawm leh a:

‘Inneih tum mekte tan zawhna pawimawh tak pakhat a lo awm ta a: Inneihna triangle hi a eng angle ber aṭangin nge kan luh ang?

‘A tlangpuiin he zawhna hi chhanna a pathum a awm thei: hnam kalphung chhanna, tunlai khawvel chhanna leh Bible chhanna. Pakhat te tein i han en hlawm teh ang.

Hnam kalphung chhanna chuan triangle hi a chung aṭanga luh tur a ti a. Hei hi hetiangin a hming ka phuah a Mo Lawm Kawngka … (chhunzawmtur)