Bible a rorelna dik (Justice in the Bible) VIII- Tim Keller* (chhunzawmna)

2. Khawvela hna thawh.

Abraham Kuyper chuan kohhran hna chu khawtlang tihdanglam ni lo vin zirtira siam a ni a ti a, amaherawhchu he’ng zirtira a siamte hi khawvelah kal chhuaka rorelna dik a awm theihna tura hna thawk theia siam tur a ni a ti thung. Inanna lai pawimawh tak tak nei tho mah se hriat hran hrim hrim hi a ṭha viauin ka hria.

A tak taka han tih dawn chuan kohhran hruaitute hian politics thila thuchhuah han siam te, chenna hmun tlawm zawk a awmna tura rorel te, khawtlang ṭhanlenna tur thil leh zirna in han enkawl te hi an thiam vek kher lo. Kohhran ṭhenkhat, rorelna dik a awm theih nana rim taka thawk, chumi lama rilru an pek lutuk avanga kohhran thisen ber – Thu leh Sacrament hmanga Chanchin Ṭha puan darh leh zirtira siamte thlauh thla hlauh hi ka hmu tawh ṭhin.

Harsatna dang awm thei leh chu party ruihchilh hi a ni (hnuai lamah en la). Kohhranin a pawng a puia politics lam hawi thuchhuah a neih fo hi chuan, “Kan politics hi min ṭawmpui loh chuan Chanchin Ṭha rawn ngaithla ve turin kan duh lem lo che” tihna tluk a ni. Chu vangin, a tlangpuiin kohhrante tan chuan an mite chu khawtlanga inhmang a, hruaitu dinhmun te chelh a, rorelna dik a awm theih nana hma la tura fuih hi a ṭha ber a ni.

Nakina Pathian lalram lo la awm tur atana thlai chi hmasa kan ni a, Isua lalna leh rorelna hnuaia mihringte awm dan tur khawvelin a lo hmuh lawk theihna hmun kan ni.

Chutih rualin mi retheite leh endawngte awmna kohhranho hi chu “rinna leh politics lama hmalakna han dah hrang thei dinhmunah an ding lo” a ni. Entir nan, Jim Crow (vun ngo leh vun hang thliar hranna dan) hun laia mipuiin mi an tihhlum ngawt ṭhin lai khan Black kohhrante kha politics-ah inrawlh lo vin an khawtlang hruaitute rorelna dik lo kha an ngawihsan ringawt dawn em ni ang? A chung lama kan hmuh tawh angin Isua leh Daniela te pawhin an ram hruaitute kha an sawisel mai. A khaikhawm nan, kohhran hna pui ber chu Pathian Thu hmanga Chanchin Ṭha puan leh zirtira siam tih a nih lai mekin, chu zirtira siamna chuan Kristiante chu rorelna dik a awm theih nana bei turin a fuihin a thuam chak ang, chuti ang a nih loh chuan Pathian Thu mil a ni thei lo.

chhunzawm tur

*Tim Keller (1950-2023) was an American Presbyterian pastor, preacher, theologian, and Christian apologist. He was the chairman and co-founder of Redeemer City to City, which trains pastors for service around the world.  He was also the founding pastor of Redeemer Presbyterian Church in New York City and the author of several best selling books. This article can be found here: https://gospelinlife.com/article/justice-in-the-bible/