Hmuingilna Chanchin Tha Pathiante (The Gods of the Prosperity Gospel) – Dieudonné Tamfu*

“Hmuingilna (‘prosperity’/hausakna) hi Pathian thu a ni a, Pathian chu i tán a ṭha ber.”

“Isua inpêkna hriat reng nan a thisen man ka chèn mek a ni.”

Khing thu te khi kan veng inkhâwm pakhat fak nana thuziak an tarlan a ni a, an thupui chu “Prosperity Conference: Hausakna hlan chhàwn,” tih a ni. Facebook-a mi a nih avangin comments ka en thla den den a, mi eng emaw zatin, ‘Amen,’ an lo pe a, a ṭhenin, ‘He inkhâwmah hian Isua hmingin tel dawn lo mah ila inzawmna thûk tak nen ka rawn tel ve e,” te an lo ti a, mi tam takin an ‘like,’ a, ‘heart,’ an pe bawk.

Cameroon rama awm ka ni a, hetah hi chuan Prosperity Gospel ‘Hausakna Chanchin Ṭha,’ hi a tlanchhiatsan theih loh. Hmanni deuh lawk khan Baptist Kohhran inkhawmpuiah ‘Chhandamnaa Pathian thuneihna sànzia,’ thu ka sawi a. Pulpit aṭanga ka chhuk rual deuh thawin ka dawta thuhriltu tur chu, “Hlawhtlinna hi Pathianin i tán a ruat!” tiin a rawn au nghal ngawt a, a intuha lohzia chu mite khan an hmu em ang chu maw.

Tun hnai mai pawh khan Chanchin Ṭha hril turin chhungkaw pakhat ka tlawh a. Ka khua a sik thu leh ka awm rei theih loh thu ka hrilh chuan an zavaiin, “Pathian mi a dam lo maw?” tiin mak an tih hmél hle. Chawlhkar eng emaw zat hnuah nu pakhatin United States aṭanga Cameroon-a ka kir lehna chhan mi zawt a, kei chuan Chanchin Ṭha dang hriltu an tam avanga Isua Chanchin Ṭha hlui leh dik zawk hril ka tum thuin ka chhang. Chung Chanchin Ṭha dik hlel ka tihte chu a hre châk hle a, a awm a nuam zàn lo tih ka hre nghal naa fimkhur leh chiang takin Chanchin Ṭha dik hlel chuan hausakna, hriselna leh nawmna min tiamin Isua hi chutiang neihna kawng a nihzia min zirtir tiin ka chhang. Chumi ah chuan a thiam ang tâwkin heti hian min hnial nghal: “Isua chu kan lo hausak theih nan retheiin a awm a, tuar tur kan ni tawh hlei nem. Pathian hian kan tan hian hausakna leh hriselna bâk ruat a nei tawh lo. Tuarna, natna leh retheihna te chu ringtu dik tak chanvo a ni tawh hlei nem, Isuan a man min pêksak vek tawh alawm,” tiin.

Chutiang chanchin chu sawi tur ka nei nual mai. Hriat pawh ka hre seng lo mah zawk, a chhan chu West Africa ram vêlah hian American-ho pathian lem (American idols) – hausakna leh hriselna – te hi bihruksak theih an ni tak tak lo va, kohhran hlun berte pawh an luhchilh tawh. Chanchin Ṭha dik hriltute chuan an mi leh sate in chhúnga va lûtin damna leh thilmak crusade an lo thlirna TV te chu an va hmeh mihsak thei tawh tlat lo a ni.

Pathian Thu a kaihlek avang leh inbumna leh beiseina dik lo infahna a nih avangin Prosperity Gospel hmaikawr phawh thlâk hi ka thiltum chu a ni a, Pathianin hêng ka thute hmang hian he zirtirna ṭihbaiawm tak ata mite la kiangin kawngká zím lam a hawitir ka beisei a ni. Khawthlang pathian lem – hausakna leh hriselnate lalna ram ata kan him theih nan Africa hian tihdam kan mamawh.

Eng nge a nih?

Collins English Dictionary chuan Prosperity Gospel hi, ‘Tunlai deuh zawk chanchin ṭha a ni a, ṭhenkhat tan chuan chanchin ṭha kaihlek a ni; Prosperity Gospel sawi danah chuan, rinna leh thuawihna nena Pathian pantu te tan chuan malsawmna chhiar sen loh – hausakna, hriselna leh thiltihtheihnate hi a luang reng a ni,” tiin a inziak.

Collins dictionary sawi fiah dan hi a ṭha hle naa ka’n belh hlek ang e. Rinna leh thuawihna nena Pathian pantu te chuan a malsawmna an dawng tiin a inziak mah se Africa rama kan Prosperity Gospel neih te hi chuan thuawihna an sawi ri lo khawp mai. Heng thuhriltute hian sual chungchang an sawi a nih pawhin an sawi khât hle. Rin lohna erawh an sawi chamchi, a chhan chu an thil tiam hausakna, hriselna, thilmak leh thiltihtheihna a lan lohvin ‘i ring tawk lo,’ tih chu inrahkhalhna leh chhuanlam ṭha ber petu a ni tlat. Tui pai lo chhüm (Juda 1:12) anga an thusawi a thlen dik loh chuan rinna tlakchhamah an puh zaih zel. Chuvangin, rinna chu an thiltihtheih loh chhuanlam a lo ni ṭhin. Prosperity zirtirtute leh a thu pawmtute ka kawm chinah chuan Collins Dictionary-in a ziah dan hi ka’n thlâk hlek teh ang:

Prosperity Gospel chu Chanchin Ṭha pawngsualna, milem biakna hmanrua a ni. Hausakna, hriselna leh thiltihtheihnaa Pathian malsawmna pumhlum dawnna kalkawng chu Isua a ni a, chung malsawmnate dawng tur chuan Pathian mi bîkin rinna thu a duh zawng bik a thlan chhuah kan lo rin a, kan lo awih a ngai.

A zawmtute hian Chanchin Ṭha pawngsual tih hi chu pawm chiah lo mah se, Prosperity thu hi Bible thu nen a inperhsan hle tih hre turin theology degree a ngai lo. Uluk taka Bible thu zir leh a chhehvêl kan en chuan hêng thuhriltute dik lohna hi kan man chat chat thei ang. Pathian Thu dik hlel taka an sawi chhawn dan kan en hmain an tih dik lohna chhan hi i’n en ho phawt teh ang.

Eng vang nge a nih?

Prosperity Gospel hripui hlauhawmna ber pakhat chu Pathian Thu a lam dan ki hi a ni. Anmahni zuituten an dik lohna an hmuh loh nan Prosperity zirtirtu te chuan an thute chu Pathian Thu hmanga mawi taka an chei a ngai. Iraneus-a’n ‘dik hlel,’ a sawifiah dan kha an nunpui chiang khawp mai:

Dik lohna hi a saruakna nena pholan a ni ngai lo, chuti lo chu a lan rual rualin man chhuah a ni dawn. Thuam mawi taka thuam a ni phawt a, chuti chuan a lan danah (tawnhriat la ngah lo te tan) thutak ai mahin a lang tak zawk ta ṭhin a ni.

Prosperity zirtirtu te hian Pathian Thu tho an hmang a, an duh zawng tihpuitlin nan an hmang ṭhin. Zirtirna an dawn ṭhat loh vang emaw anmahni thu ngeia thutak an hnâwl emaw avangin Pathian Thu chu midangte bual ât nan an kuai rem ṭhin.

Heng thuhriltu te hian Pathian Thu chu kherhin anmahni zuitute bán an kherh bawk a, chu chu an sum hnar ber a ni. Mihring sum chhuhsak turin Pathian thutak an chhuhsak hmasa. Chutiang thuhriltute chu tuin nge bengkhawn duh ang a, tuin nge chutiang chuan rawng bawl duh ang kan lo ti mai thei. Duhamna avangin. Prosperity zirtirtute chuan mipuite duhamna sualah an thlèm lût a, an bum thlûk hmain an kherh ṭhin. Mihringin thilneih, hriselna leh thiltihtheihnate hi kan duh huam huam tih an hria a, anni ngei pawhin an duh. Chu tak chu mite an kawhhmuh a, chu ngei chuan an inhaivùr a, anmahni zuituten chuan chu bawk chu chil thli far purin an thlir ṭhin a ni.

Chu thutiam chu khawvel hmun tam zâwka mipuite tan a îtawm rëng a, eng emaw zat chu retheihna sala tang mékte an ni. Chutih rualin khawthlang ram mi hausa te pawh thlemin an awm tho. Hausak, hrisel, ropui te chu tuin nge duh lo ang? Emaw khawthlangho tan chuan hausak zual, hrisel zual, ropui leh zual. Kan zavaiin chung thil duhnate chu kan pianpui a, kan ngai hlu reng a ni. Eng vangin nge kan ngaih hlut lohvang? Himna min pe miau si alawm. Chuvangin Isuan chung thilte chu min pe thei a nih chuan Ani pawh chu ka pawm thei ang.

Kan zavai hian eng emaw chenah chuan Prosperity Gospel ngainatu kan ni. Gordon Fee-a chuan Prosperity Gospel hi, “Pathian thu tak hlauhawm taka kaihlek, a tàwpkhäwkah chuan mihring tlu tawh chauh thlèm theitu a ni,” tiin a sawi. Tlûkna? Chu chu kan zavaiah a awm si a. Pathianin kan nunah tuarna thlen a phal a, kan duh zawngte a lâk bovin kan thinurkhum thuai a. Awhna hi mihring harsatna lian tak a ni a, kan zavaiin eng emaw chenah chuan buanah ka nei vek avangin buma lo awm tawhte chu zaidam takin kan zilh tur a ni.

Chutih rualin Tirhkoh Paula chuan ringtute chu ‘Duhamna,’ chu khawvel thil, “milem biakna,” (Kol 3:5) a nih avangin tibo turin min ti. Duhamna chuan thinlung lalṭhutthleng ata Pathian leh Krista a hnâwl a, khawvel lam thilte lallukhum a khumtir avangin milem biakna a ni. Pathian ai chu ‘thil’-in a awh. Hausakna te, hriselna te leh ropuina te chu pathiana an lo chan hunah chuan Pathian chu chung pathiante kan biakna hmanrua maiah a lo chang a, chu chu Prosperity zirtirna bulpui a ni. Amaherawhchu, hriselna ûm chuan thihna a thlen a, hausakna ûm chuan pachhiatna a thlen a, ropuina ûm chuan lungngaihna a thlen.

Thuthlung Tharah chuan duhàmna hi, “Mihring huamhauhna vang vek niin midangte pawngnêk a thlen ṭhin bawk.”

“Kan mite zingah zawlnei der an awm ṭhin ang khan nangni zingah pawh zirtirtu dik lo an lo awm dawn; mi tichhe thei zirtirna dik lo an rawn pu lût ru ang a; an Lalber, anmahni Tlantu chu phatsanin mahni chhiatna rang takin an thlentir ang. An awm dan tenawm tak chu miten an ching ve ang a, anmahni avang chuan thutak kawng hi sawichhiat a ni ang. Sum an hmuh theih nan duhàm takin an thu phuah chawp chuan sumdawnna atan an hmang ang che u; nimahsela, an chunga rorel tawh sa chu a awm mai mai lo vang, chhiatna chuan muhil lovin a chäng reng a ni,” (2 Petera 2:1-3).

“An mitin uire tur an melh reng a, sual tih an kham thei lo. Mi rilru nghet lote an bum a, duhàm dan an thiam hle, anchhe dawng an ni. Kawng dik chu an pènsan a, an bo ta. Bosora fapa Balaama kawng an zawh ta. Ani chuan thil sual tih hlawk bering a ring a,” (2 Petera 2:14-15)

Khawvel thil duh huam huamna chu pathianah a lo chan meuh chuan Pathian chu a hmanrua maiah a lo chang tawh ṭhin. He zirtirna hian Isua chu lalṭhutthleng ata hnâwlin a thusawite chu Mammona kawhhmuhna, rangkachak kalkawng, taksa hriselna kawng, ropuina kailawnah a lo chang ta ṭhin a ni. Rawngbawlna chu sumdawnnaah a lo chang a, thuhriltute chuan an thuhril chu inhlawhnaah an ngai. A nihna takah chuan Grik ṭawng aṭanga, ‘hlêp ṭeuh,” tiha lehlin hi thil lei leh hralh chungchang thu a ni a, Jakoba 4:13 ah khan kan hmu bawk. Zirtirtu derte tan chuan rawngbawlna hi thil lei leh hralha a tam thei ang ber hlep theihna kawng ang mai a lo ni a, chu chuan an duhàmna vang chauh a ni. Thilsiamte hmangaih uchuak leh pathian ang maia biakna chuan Pathian Thu duh dan dana kaihlek a thlen a, entirna hrang hrang hmangin kan sawi fiah ang:

Dik hlel 1: A thu hmanna awmze piah lama hman

Bible thu awmzia zirnaa min kaihruaitu thuthlung kan zir hmasak ber pawl chu ‘context is king’ tih hi a ni a, chumi awmzia chu Bible thuin a sawi awmzia hrefiah turin a sawina hun leh hmun dinhmun kha a lal ber tur a ni tihna a ni. Thu reng reng, a chhehvêl thu tel lovin a awmzia dik tak hriat theih a ni lo va, a awmzia ‘ni theia ngaih,’ bâk kan hre thei tak tak lo. Chu chu zirtirtu der tan lei ṭha a ni, a chhan chu chumi ‘chiang lo ruai,’ ah chuan anmahni zuitute ngaihthlak duh zawng hmangin an duh duh an zirtir thei tihna a ni. Zirtirna dik lo hmelma lian ber chu ‘a chhehvêl thu,’ hi a ni. Andy Naselli chuan hemi chungchangah hian, “A chhehvêl thu thuah hrang hrang hriatna chuan puitling takin thu chu a hrilh fiahtir ang che. Chuti lo chu ‘eisegesis’ nuihzatthlâk takah i tlu sual der ang,” a lo ti a. Eisegesis chu thu a nihna ang anga lâk tihna ani a, Prosperity hriltute tána thilpêk làwmawm ber chu a ni. Entirna tlema zawng i lo tarlang teh ang:

“Pathian hnenah in thlen loh avangin in duh zawng chu in nei lo va,” (Jak. 4:2). Prosperity zirtirtute chuan he thu hi hmangin an zirtirte hnenah chuan, “Lam la, hauh rawh,” an ti thla ve ngawt zel. He thu hi a chhehvêl thu nena uluk taka kan zir chuan, Jakoba hian ṭawngṭaia thil dil dan min zirtir ni lovin kan duhamzia a hai lang zawk a ni tih kan hmu ang (Jak. 4:1-4).

“Bumin awm suh u, Pathian chu ngaihnep rual a ni lo ve. Miin a tuh chu a seng leh ngei dawn a ni,” (Gal. 6:7). Prosperity zirtirtute chuan he thu hmang hian sum tam zawk thawhtu chuan awmman tam zawk an hmu ang tih intiam nan an hmang ṭhin. A dawt leh chiah thu kan en chuan, ‘tuh,’ a tih hi ‘thil ṭha tih,’ niin, ‘seng,’ a tih chu, ‘Chatuan nunna,’ a nihzia kan hmu (Gal. 6:8-9). He thu hi sum leh pai sawina a ni awzáwng lo.

“Krista chuan… min chhanchhuak ta a… Abrahama mal a sawmna chu Jentail-te hnenah Kristaah chuan a lo thleng ta,” (Gal. 3:13,14). Prosperity zirtirtute chuan he thu hmang hian Pathian chuan Abrahama hnena a khawvel malsawmna tiam te min pe dawn tih inzirtir nan an hmang. Amaherawhchu, a pumpuia kan chhiar chuan Tirhkoh Paula khan Abrahama mal a sàwmna tih chu, ‘Thlarau pêk tiam,’ a nihzia chiang takin a sawi leh lawi si (Gal. 3:14).

“A retheihna avanga in lo hausak theih nan, hausa hle mah se, nangmahni avang ngeiin a lo retheih tâk kha,” (2 Kor. 8:9). Prosperity zirtirtute chuan mathei lovin he thu hi sum leh pai an kawhtir leh daih. Mahse Paula khan eng nge a sawi tak? A hma chiah kha han chhiar leh ila, Makedonia kohhran te chu an ‘pachhe hle,’ a ti. An hausa lo, amaherawhchu, Paula chuan ‘an thilphal em em a ni,’ a ti (2 Kor. 8:2).

Entirna sawi tur tam tak a la awm, a chhan chu Prosperity zirtirte te hian an thuhrilah a chhehvel thu hi an haider tlangpui. Ṭum khat chu Prosperity kohhran inkhâwm ka va chhim ve a, an thuhriltu thupui chu, “I Ropuina hloh tâk,” tih a lo ni. An zawlneinu chuan Luka 15:8 thu kha a sawi a, chutah chuan heti hian a inziak: “Tin, hmeichhia tu pawh duli sawm neiin pakhat chu hloh ta se, khàwnvàr hála hmun phiatin, a hmuh leh hma chu tu nge ngun taka zawng lo vang?” Mak ka tih tur tak maiin dawhsanah chuan hmuhphiah a rawn vai ang thuak thuak a, kan thlarau inte chu phiat a, kan ropuina hloh tâk chu hmu leh turin min la ti zui. Ropuina hloh tâk tihah chuan inneihna te, zirna te, VISA te thlengin a rin lût. Chuti khawpa Pathian Thu pawngsual chu mak ka tih viau rualin a aia mak chu mipui kha a ni- an phusa em em a, an zawlneinu hriak thihah chuan an tlu deuh dual dual a. He thu hi a chhehvêl thu mila kan zir chuan Isuan misual pakhat sim avanga Vanram lawmzia a sawina a nih kha maw (Luka 5:10). Vanduaithlak takin khami tlaia thuhril khan Vanramah lawmna a thlen lo; tu mah sual sim tura fuih an ni lo va, duhàm tur chauhva nawr an ni.

Chutiang zirtirna dik lo laka inhumhim dan ṭha ber chu a chhehvêl thu chhiar kim kha a ni mai. A bung pumpui kha chhiar la, a bu pumpui kha chhiar mai rawh. Awlsam lutuka buma i awm loh nan a ziaktuin min zirtir a tum kha hmuh tum rawh.

Dik hlel 2: A ngial a ngan

Prosperity zirtirnaa dik hlel dang leh chu Pathian Thu zawng zawng a ngial a ngana lak hi a ni. Entir nan mi ṭhenkhat chuan, “Isua chu nun tam kan neih theih nan a thi,” an ti ṭhin. Ni e, Isua khan, “Nun tam taka an neih theih nan lo kal ka ni,” (Johana 10:10) chu a ti ngei alawm. Amaherawhchu, a chhehvêl thu nena en chuan Isua khan zirtirtu der te laka a danglamzia a sawi zawk a ni, anni chu rûkru, ru tur, that tur leh tichhe tur chauhva lo kal an ni. Chu chu a ngial a ngana kan lak chuan Isua khan kan in leh zem te aṭanga la lovin tam takin a chhung khat zawk dawn a ti a ang hle mai. Chutianga chhiar tur chu a ni dawn em ni? Isua khan tehkhin thu hmangin thlarau thu tak a sawi zawk a ni lo maw?

Kha thu a sawi hma chiah khan chang 9-naah Isua chuan, “Kei kawngka chu ka ni; tu pawh keimaha lût chu a him ang a, a lûtin a chhuak ang a, tlatna ṭha a hmu bawk ang,” a ti a, tehkhin thu chu a hmang chiang alawm, Isua kha thinga siam kawngka tak tak a ni hlei nem. Chang 9-naa tehkhin thu ṭawngkam aṭang khan a dangte pawh chutiang bawka chhiar tur a nihzia a chiang mai a, ‘rukru,’ tih te, ‘nun tam,’ tih te pawh chu tehkhinna a ni tihna a nih chu. Chu chu a ziaktu Johana ngei khan a sawi alawm: “Chu tehkhin thu chu Isuan an hnenah a sawi a; nimahsela, a thu sawi awmzia chu an hre si lo,” (Johana 10:6). Chuvang chuan, “nun tam,” tih hi a ngial a ngana lak tur a ni lo kan ti thei ang. Chuti a nih si chuan, “Nun tam taka an neih theih nan lo kal ka ni,” a tih awmzia chu eng nge ni ta ang?

A chhehvêl thu kan tih hian a bul lawka thu te chauh kan sawi lova, a bu pumpui pawh kan sawi tel bawk a ni. Johana khan ‘nun,’ tih thumal hi a Chanchin Ṭha ziakah engtin nge a hman deuh ber? Johana bu ah hian, ‘nun,’ tih hi Chatuan nun sawi nana hman a ni deuh zel. Chuvang chuan Isuan ‘nun,’ a tih kha tuna mihring nun ni lovin Chatuan nun lo awm tur a sawina a ni kan ti thei ang. Johana 10:10-a ‘nun tam,’ tih pawh kha Pathian Thu hmun dang (Isaia 35:1-10; 55:12-13; 65:17-25; Mika 4:1-5; Zakaria 14:1-21) ang bawkin Chatuan lal ram nun sawina a ni. Bruce Milne-a chuan he ‘nun tam,’ hi, “Eden huanah khan kan hmu zuai a, Thupuan inlàrnaah Pathian aṭanga khawpui rawn chhuk angin kan hmu leh a, chu chu Pathian leh a mite chènna hmun thianghlim a ni a, siam kan nihna chhan ‘nun,’ chu a ni,” a ti.

Dik hlel 3: Nakin hun tunah

‘I nun ṭha ber- tunah,’ (‘Your Best Life Now’) tih lehkhabu ang te hi a maktaduai tel teh meuh an hralh a, chu chuan zirtirna dik hlel dang a lantir. Prosperity zirtirtute chuan, “Tunah ni rih lo,” tih hi an hrethiam hlawl lo va, an tan chuan hmathlir nei thutiam hian awmzia a nei lo. Vanram chu a ropui zawng zawng nen a lo thleng tawh a, hriselna famkim i nei thei tawh, tuarna tel lovin tunah hian nun kan chèn thei te an ti a, prosperity zirtirtu ṭhenkhat phei chuan rinna neite chu an thi lovang tih thlengin an zirtir. “Thihna hi in chanvo a ni lo,” tiin an au thler a, anmahni an thih phei chuan a zahthlâk rum rum zel.

Thuthlung Hlui zawlneite khan Krista lo kal huna thutiam hlen tur tam tak an sawi lâwk a. Thuthlung Thara Isua lo kal vawi khatnaah khan chung thutiam zinga eng emaw zat chu hlenin a awm rualin a dang te chu a rawn kal leh huna thleng turte a ni hlawm. Prosperity hriltute chuan he thu hi an hrethiam thei lo va, nakin hun zawng zawng pawh tun hunah an sáwr khâwm vek zel.

Dik hlel 4: Nunpui dan dik hlel

Pathian Thu awmzia kan hriatthiam hnuah chuan kan nunpui ṭhin tur a ni. Prosperity zirtirtu chuan Pathian Thu awmzia dik hmél deuhva a lo hrilhfiah palh a nih pawhin a nunpui lamah nasa takin a hlawhchham ang a, chu chuan a lo hrilhfiah dik tak tak lo a ni tih a tilang ang.

Entirna ṭha deuh chu, “Ka hriak thih hi khawih suh ula,” (1 Chron. 16:22; Sam 105:15) tih thu kha a ni. Prosperity hriltute chuan, “Pathian mi,” an ni a, Pathianin, ‘Ka hriak thih hi khawih suh ula,’ a tih avangin hnial thiang lo, sawisel thiang lo angin an inchhal a ṭhin. Chu chu an Pathian Thu nunpui dan, an inchawisan dan chu a ni. ‘Pathian mi,’ chu Krista ai pawhin a lo ropui ta a nih chu! Hei vang hian lung ina dah theih pawh an ni lo. Nigeria rama prosperity thuhriltu pakhat chuan a hote hnenah uirena suala a tluk thu a inpuang a, chu chu a nupuiin a lo uiresan hmasak avang a ni a ti. Chu chuan kohhranah emaw dan hmaah emaw thiam loh a chantír thu a lang lo, ‘Pathian hriak thih,’ a nih avangin. Chutiang kohhranah chuan ‘Pathian mi,’ ni-a inchhal sawisel aiin Krista sawisel a thlanawm zawk. ‘Hriak thih’ chu khawih theih loh, rinhlelh theih loh a nih avangin anmahni zuituten zawhna tak ngial pawh an zawt ngai lo.

Robert Bowman chuan he thu, ‘Ka hriak thih hi khawih suh ula,’ tih hi a zir chiang a, hriak thih-ho nun leh an zirtirna sawisel leh zir chian a khap ni lovin anmahni tihhlum a khap zawk thu a sawi. Prosperity zirtirtute chuan an mite thunun nan he thu hi dik lo takin an hmang a ni. An nunpui dan a dik lo chiang a ni tih lanna chu Pathian Thu hian thlarau apiang leh zirtirna apiang chu fiah zel turin min ti zawk (1 Johana 4:1).

A laiah Krista

American milem biak- hausakna te, hriselna te, thiltihtheihna te, Prosperity Gospel kan tihmaite hi Pathian Thu hrilhfiah dik lohna zara ṭhang lian an nih avangin a do dan awm chhun chu Krista bulfûka neia Pathian Thu zir hi a ni. Prosperity zirtirtuten Pathian Thu thuneihzia hi an chhàl ve tho avangin Pathian Thu hman dik lohna chu Pathian Thu chauhvin a do thei a ni. He zirtirna dik lo do tur chuan a laiah Krista a awm a ngai a, chumi ṭangkaina chu kawng thumin kan sawi ang.

Pakhatna, a laiah Krista kan dah chuan Pathian Thu hi a hmasa berah keimahni chungchang ni lovin Krista chungchang a ni tih a chiang ang. Pathian Thu hi Ama chungchang a nih si chuan (Johana 5:39; Luka 24:44) a Thu kan zirnaah te, kan hrilna leh zirtirnaah te a lai lum a chang tur a ni. Chutah chuan Chanchin Ṭha laimu hi hriselna, hausakna, ropuina ni lovin Krista a ni zawk tih kan hrethiam ang. Isua khan a thihna hmangin Pathian hnen min hruai thleng a ni.

Pahnihna, a laiah Krista kan dah chuan kan khawvel thlir dan a inthlâk danglam ang a, hriselna, hausakna, thiltihtheihnate kan lo duh a nih pawhin Kristaa kan lawmna atan leh a Lalram zauh nan chauh a ni tawh ang. Krista leh a Thu hriatna kawnga kan lo ṭhan len chuan Pathian ropui nan leh midang te sawt nan dawh thei taka tuar dan min zirtir zawk dawn a ni.

Pathumna, a laiah Krista kan dah chuan hriselna, hausakna leh ropuina te hi ropuinaah chuan kan rochan a ni tih kan hrethiam ang a, chutah chuan a malsawmna ni lovin a malsawmtu Pathian zawk chu a pawimawh ber ang. Pathian chu kan engkim a lo nih hunah Ani chuan engkim chu min pe mai dawn a ni.

Cameroon ramah hman deuh lawk khan ‘Pathian Lalram,’ tih thupuia hmangin kan inkhawmpui a, Bible pumpui hian Genesis aṭanga Thupuan thlengin Pathian Lalram chungchang a sawi a ni tiin kan inzirtir. Inkhawmpui ṭin hnuah chuan mi pakhatin a hlâwkpuizia mi rawn hrilh ve a, prosperity zirtirna a zui ve aṭangin a inlam lêt a, an kohhranah zirtirna dik lo a lo pawm ṭhinzia a puang chhuak bawk. Chutiang ualau taka sual puan chu kan tunlai zahna khawvelah hian a tam lo khawp mai, amaherawhchu a Bible zirnaah a laiah Krista a awm avangin tunlai khawvel do turin chakna a lo nei ta a ni.

Zirtirna dik lovin a nuai mékte ṭanpui kan tumna kawngah hian lainatna leh dawhtheihna nen kan zilh tur a ni (2 Tim. 2:24-25). Zirtirna dik lo hi i do ang u. Bible pumpui hi an hmaah keu hawng ila, a zavai mai hian Krista chungchang leh Pathian chhandamna hna ropui tak chungchang a nihzia i hmuhtir ang u. Keini pawh inveng ila, chuti lo chu an tlûkna ruamah kan tlu ve dah ang e. Isua chuan, “Fimkhur ula, awhna reng reng lakah inveng rawh u; mihring nunna hi a hausaknaah a innghat lo ve,” a tih kha (Luka 12:15).

---

* Dieudonné Tamfu hi Bethlehem College and Seminary, Cameroon ah Assistant Professor of Bible and Theology hna chelh mek ani e. He article hi saptawngin hetah hian a chhiar theih: https://www.desiringgod.org/articles/the-gods-of-the-prosperity-gospel#fn10