Editorial – Hnam leh Sakhua

India danpui ziaktuten India ram hi secular ram ni tura an lo duang hi a lawmawm khawp mai, a bik takin Hindu ni lote tan a lawmawm lehzual. India ramin zalenna a hmuh laia ram hruaitute kha sakhaw mi tak tak ni hlawm mah se India hi secular rama puan a ṭulzia kha an lo hmu fiah hle. A awmzia chu sakhua leh politics inkara inkaihnawihna awm lo turin an duang. India ram bikah chuan secular han tih hian ram sorkarin sakhaw tih bik a nei lo tihna lam a kawk lo va; eng sakhua mah hi sakhaw dangte aia dah pawimawh bik tur a ni lo tihna lam a ni zawk. Chu vang chuan, kum tam tak chhung chu, India ramah hian sorkar rorelnaah sakhuana hi dah pawimawh hmasak berah an nei ngai lo. Tunah erawh, kan hriat ṭheuh angin thil a danglam chho a, Centre lama roreltuten India danpui chu tihdanglama, India ram hi Hindu rama puan an tum ta tlat mai. Heti anga ram mite nihna leh an sakhaw vawn kaihkawp tumna hi religious nationalism an ti a. Chuti ang dinhmunah chuan sakhaw dang vuante chu khua leh tui ro rovah dah hniam bik niin an diknate rahbehin an awm a, sorkar laka an chan ve tur ang pawhin an hnen a thleng phak lo ṭhin. Religious nationalism hi khawvel hmun hrang hrangah a lo kir/hluar leh ṭan mek tlat. A chhan tam tak a awm thei ang a, ro sum leh thiltihtheihna umtuten globalization avanga mite rilrua hlauhna lo piang an lo hman ṭangkai vang a ni thei ang a, khawl changkang tak tak avanga hna chan an tam tak em em vang a ni thei ang a, hausa leh rethei inkar a zau zel vang a ni thei bawk ang. He’ng lo pawh hi chhan tam tak a awm awm e.

He religious nationalism hi khawvelah hian thil thar erawh a ni hran lo va, India ram chauhva thil thleng pawh a ni hran lo. Isua hunlaiah pawh khan mi tam tak chuan Messia kha anmahni awptu Rom sorkar laka Judate chhanchhuaktu turah an ngai a, an sakhua kha politics lama an duhthusam thlentir nan hman an lo tum daih tawh. Entirna pek tur tam tak a awm thei ang a, mahse a langsar ta ber chu kum zabi 11 leh 13 inkara Crusade hote kha an ni awm e. Khatih hunlai khan Europe rama Kristiante chuan Mosolman awpna lak ata Ram Thianghlim lak let kha ngaih pawimawh berah an nei a, kum tam tak chhungin sipai rual eng emaw zat Palestina ram la turin an intir a, nunna chan phah mi tam tak an awm bakah chhiatna zakhua a thleng bawk a nih kha. A hnuah phei chuan an tumna chu an bansan ta a, Europe mite kha a tlawm zawkah an ṭang a ni ber e. Hemi ṭum pawh hian sakhua kha politics-a duhthusam ram thlenna tura mite fuihpawrh nan an hmang a ni. Crusade chanchin leh a chhuah chhante hi uluk taka kan chhui chuan sakhua vanga bul ṭan anga ngaih theih tur chu a ni a, mahse a phenah chuan thil tam tak an awm a ni. Mosolman ho khan an ram chu an zauh ngei e, mahse hei hi chu kum za tam an lo tih tawh thil a ni. A nih chuan eng vangin nge heti ang hi a lo thlen tak si? A sakhaw thil piah lamah roreltuten an engto ei bar dapna lam thil te, politics thil te leh khawtlang nghawng thil te hi a chhan tak an ni zawk fo. Chu vang chuan kan hriat ṭheuh tawh angin politics lama an duhthusam thlentir nan sakhaw rilru an han chawk tho a, chu chu mipui rilru lak nana hmanraw ṭha tak a lo ni bawk a. Heti anga politics hmanrua atana sakhaw hman, religious nationalism kan tih ang hi kan ṭhenawm ram Nagaland ah pawh hmuh turin a awm a, ‘Nagaland for Christ’ (Krista tan Nagaland) an ti. He’ngte hi thil sual a nih a rinawm loh viau mai ṭhin a. Thil nihphung pangngai ve maia ngaih te hi a awlsam viau a, Isua hun laia mi tam takin an lo tihsual tawh, thlarauva Pathian lalram leh a taka khawvel lalram an lo ngaih pawlh ang tho khan tihsual ve mai awl tak a ni.

Chuti ang a lo nih chuan Kristiante tana zawhna lo awm ta chu, ‘Religious nationalism hi Bible in kan laka a beisei a ni em?’ tih hi a ni. Hun laihawla Europe rama Charlemagne leh midangte rorel laia an lo beisei ṭhin Kristian lalram ang kha keini Kristiante hian kan beisei ve tur a ni ang em? Thuthlung Hluiah chuan Pathian rorelna ram chu kan hmu ngei e. Amaherawhchu lal neih kha Pathianin a mite tana a duhthusam ruahmanna chu a ni lo chiang tih kan hriat a ṭul a ni. A duhthusam chu zawlneite kal tlanga Pathian aw hriaa zawmtu mipui awmna ram, dikna leh felnaa nung a, midangte tana malsawmna ni ṭhin mipuite awmna ram zawk a ni. Kha’ngte kha Pathianin a beisei chu an ni a, mahse mihringte hian Pathian duh dan hi lo lak kawih daih kan ching riau.

Sakhua leh politics chungchangah Thuthlung Thar zirtirnate eng nge ni ta ang? Kristiante chu dikna leh felna ngai pawimawh mi ni tura koh kan ni a, chumiin a kawh chu kan politics kal tlangin diknain ro a relna khawtlang kan din tur a ni. Ṭawngkam dangin sawi dawn ta ila, Kristianna hi kan politics tihdana ṭha kan tehna hmanrua a ni tur a ni. Kan lalram chu he khawvel ami a ni lo va, chutih rualin kan politics chu rinawm takin kan nung chhuak tur a ni. Chuti ang a nih laiin tunlaiah politician tam takte chuan an mimal leh politics duhthusam ram thleng turin kan rinna hi min hmansak ta fo mai. Chu vangin Kristiante chuan Kristian nia inchhalte leh politics khelhna atana Kristianna hmangtute hi kan hriat hran a ṭul khawp mai. He harsatna hi Mizoramah chauh awm a ni lo. Khawthlang ramah, a bik takin America ramah khuan, Kristianna hi hmatheha hmangin mimal politics duhthusam ram thlenna kawng atan an hmang nasa. Mizoram aṭanga kan lo thlir chuan America rama Kristian rinna changchawitute hi mi dik leh ṭha angin an lang mai thei awm e. Islam sakhua a vung riau tih thu te kan hria a, chu vang chuan Kristianna chu dinhmun derthawng takah a dingin kan ring a, US hi Kristian ram atana lak let leh sawi mawitute thu chu kan lem ta duak duak mai ṭhin a ni. Kan chanchinthar hmuh leh ngaihthlak te hi a sir lehlam chauhte an ni ṭhin tih erawh kan hriat a ṭha, kil tin aṭanga thlirna kan hmu ve tawh si lo nen. Chu bakah Mizoram kil khat aṭanga kan lo mitthla ve ngawt ang ai daihin America khawtlang chu a chingchivet zawk bawk. Mizoram ang thovin Khawthlang ramah khuan mi rilru tluangtlam tak takte rilru suk nana sakhuana hmang hreh lo an awm a. Bible chuan rul anga fing, ṭhuro anga nunnem ni turin min ti a, hei hi politics huangah hian a dik chho ta riau mai. Chuti ang kan nih theih nan chuan Mizoram a ni emaw, India a ni emaw, khawvel hmun dang a ni emaw, thlirna thar leh hriatthiamna thar neih zel theih hi chu kan mamawh a ni. He website-a article te hi chuti ang kawng min kawhhmuh theitu an nih kan beisei a ni.