Editorial: Kan Beisei Chhan – 05 October 2025

KAN BEISEI CHHAN

          Tirhkoh Petera chuan, “…in thinlungah Krista chu lalah ruat rawh u, nangmahnia awm in beisei chhan zawt apiang che u chhang turin inpeih sa fo vang che u; nimahsela, thuhnu­rawlh leh ṭih dek chungin” tiin ringtute a fuih a (1 Petera 3:15).  Tunlai huna Isua Krista zirtir, a hnungzuitute hian eng nge kan beisei ber le? Kan beiseina innghahna, ­kan thurin hi midangte hnênah kan sawi chiang thei em? Sawi turin kan inpeih reng em?

          Pathian awm ringlomi hmelhriat ṭha tak pakhat hi ka nei ṭhin a. Nasa taka Pathian a zawn ṭhin thu leh an ram hruaitu hmasa Chairman Mao-a thlalâkte a hmaah hûngin, a hnênah a ‘ṭawngṭai’ ṭhin thute a sawi a. Eng emaw chen kan inhriat a, kan innêl hnu chuan kan Bible zirnaah a lo tel ve ta a. A hnuah chuan Isua a rin thu leh amah zuitu nih a duh thute a sawi ta a. Mahse, kan inkawmna leh Pathian thu kan zir zêlnaah ringtute beiseina, thih hnu piahlam te kan han sawi kai chuan, ‘vanram leh thihhnu piah lam ram hi ka ring lo va, chutiang chu ka duh lo rêng rêng,” a ti ta tlat mai a. Chumi hnu aṭang chuan mi a hlat ta tlat a, kan inkâwm ta meuh lo a ni. Ka ṭhianpa kha ‘engtin awm ta zel ang maw?’ tiin ka ngaihtuah zui fo ṭhin.

          Sakhaw dang zuitute leh Pathian awm ringlotute tân kan beiseina neih hi thil îtawm leh neih ve châkawm tak a ni em? Hêngte hi zawhna pawimawh tak, kan chhân theih ngei turte an ni. Eng beiseina nge kan neih? Khawi lam nge kan pan? Kan chiang em? I han ngaihtuah chhunzawm dâwn teh ang.

          Isua hunlaia Sadukai hote kha Juda Kulmûk ho niin, Torah bu-a inziak thu chauh an ring a. Vantirhkohte, Pathianin mihringte a enkawl zêlna te leh mitthite thawhlehna hi an ring lo va. Khatih hunlai vêl thova pâwl pakhat Gnostic ho chuan ‘mihring taksa hi engmah lo mai, chhe lailet dêr a ni a, mahse he taksa chhûngah hian ‘pathian meisi’ a tâng a. Chu meisi tâng chu hriatna thurûk (secret knowledge/gnosis) hmanga chhuah zalen theih a ni’ an ti a. He zirtirna hian kum zabi pakhatnaa ringtute kha a tibuai ve hle.

          Ringtu tam takte beiseina leh thurin, rindan tlânglâwn tak hi hetihian mâwlmang takin (caricature) a khai khâwm theih maiin i hria em?

1. Evi leh Adama bawhchhiatna avangin mihringte hi sualnaah kan tlu a, sual saa piang kan ni.
2. Pathianin min chhanchhuahna turin Israel hnam a thlang a.
3. Juda hnamah Isua a lo piang.
4. A ni chu kan thih aiin a thi a, ka sual man min tlâk sak.
5. Amah kan rin chuan ka thih hnuah ka thlarau khitah, Vanramah a thlâwk kai ang.

          He rinna formula hi ringtu tamberte innghahna leh beiseina khaikhâwmna tlângpui a ni theiin i hria em? Hei hi Isua’n khawvela a lokal chhan a sawi leh Genesis aṭanga Thupuan thlenga Pathian thuchah laimu ber, Bible-a kan hmuh hi a niin i hria em? A fûn kim meuh em? Nge, thih hnu piahlam chauh min thlir tir a, khawvela Isua zuina kawng min kawhhmuh lo lutuk?

          Tunlaia Mizo Kristian tam berte beisei ber hi eng nge ni ang? Kristian râltlân, chênna, in leh lo nei lo, himna zawnga vâkvai mêkte beiseina leh America rama Mingo Kristiante beiseinate hi thil thuhmun a ni ang em? Thil nihna leh thlirna awlsam leh ­mâwlmang thei ang ber sawifiahna’n hetihian chhawp chhuak ta ila, eng nge i ngaihdan?  

1. Tunlaiin khawvel hmun hrang hranga Kristiante hian dodalna leh ­beihna hrang hrang an tâwk mêk.
2. Pathianin heng rinna avanga tuar mekte chhanchhuak tur hian America ram hi a buatsaih a. Kristian ram hruaitu thar tung dingin, a siam thara, a tichak mêk a ni.
3. America rama Mingo Kristian hnamte hi an harh thar leh chuan khawvel hmun danga sakhaw dang betute hian Kristiante Pathian chakzia leh ropuizia an hmu ang a, Kristian sakhuaah lo inpêk ve an chak phah dawn a ni.
4. He Kristian hnam hian Pathian hnam thlan leh thutiam ram Israel chu chhanchhuakin, a venghim zel dawn a ni.
5. Ralthuam ṭha ber neitu, ram ropui leh hausa ber America ram Mingo Kristian ram hruaitute hian khawvel ram danga Kristian tihduhdah mekte thlavang hauhin, an chhanchhuak zel dawn a. A thlamuan thlâk êm êm a ni.

          Hei hi tunlaia Kristian tam takte beiseina sawifiahna a ni thei maiin i hria em? Lo ni ta se, Bible-in Genesis aṭanga Thupuan thlenga min hriattir a tum, Pathian thuchah laimu ber, kan beisei chhan, kan innghahna ber chu chu eng nge ni ta ang?  Tunlai khawvela ringtute, leh Mizo Kristian tam berte hian kan tum leh kan beisei chhan hi kan ngaihtuah chiang ngai em?

          Pathianin van leh khawvel leh thilsiam zawng zawng, sual avanga tihhmelhem leh tihchhiata awm tawh chhanchhuak tura a fapa Isua Krista a lo tirhna te, a thihna leh thawhlehna avanga Good Friday/Easter aṭanga a Lalram a rawn din ṭan lehna leh chumi avanga Lei thar leh Van tharah taksa thar neia min kaihthawh lehna turte hi Bible-a Pathian thuchah chiang tak kan hmuh chu a ni a. Chutah chuan Bible thuchah ruangâm chu hetihian kan hmu thei âwm e:

1. Pathianin lei leh van leh thil engkim­, a duh ang leh ṭha a tih ang takin a siam a.
2. Chu a thil siam chu Hmêlmapa – Hêktupa-in tihchhiat tumin a bei reng a. Mihring thlahtu bulte chu thlêm tluin, anmahni avâng chuan khawvelah ânchhia leh thihna a lo lût ta a.
3. Thilsiam dang leh mihringte chhanchhuahna leh siam thar lehna tûrin Pathianin amah leh amah inchhâlin thu a thlung a.
4. A thuthlun ang ngeiin Amah ngei chu mihring – Isua Krista-ah lo changin, a thihnaa sual leh bawhchhiatna man pe tlâkin, thihna ata taksa thawhlehna hmahruaitu ni turin Pathianin a kai tho va. Chumi aṭang chuan Pathian Lalram chu khawvelah din tharin a lo awm leh ta a ni.
5. Pathian Lalram lo thleng ta chu he khawvelah hian hneh chung zêlin a darh zau zêl a. Krista tlansa Kohhranhote hi chu Lalram Chanchin Ṭha chu pu darh zêl turin thuneihna nên min min tîrchhuak a ni.
6. Isua Krista chu Roreltu Lalber niin, engkim a ke hnuaiah a dah dâwn a. Khawvêlah lokal lehin, diknain ro a rêl dawn a. Vân thar mai bakah Lei thar pawh siamin, thil engkim a siam thar vek dâwn a. Thawhlehna hmahruaitu a nih angin taksa thar nen amah ringtute chu min kai tho leh dawn a; a Lalram, engkim famkimna leh anchhia rêng rêng awm tawh lohnaah chuan Amah nên chatuana chêngin, ro kan rel dawn a ni.

           ‘Kan innghahna, kan beisei chhan’ hian kan ngaihtuahna lo luah thar leh se – kan thurin leh beiseina inghahna hi ‘Pathian thu ang zel’ (1 Korinth 15:3-4) lo ni mawlh rawh se. Tirhkoh Paula’n a sawi angin, thil siam zawng zawngte chu thil lawi lo thû thûin an awm a, tûn thlengin rûm leh nau vei na tuarin an awm a. Chuvangin, thil siam zawng zawngte chuan beisei êm êmin Pathian fate lo lanna chu an nghâkhlel em em a. Mahse, nakinah chuan keimahni ang tho hian thilsiam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a (Rom 8:19-22).

          Tirhkoh Paula vêkin, “Chutichuan, unau duh takte u, tihchêt rual lohvin ding nghet ula, in ­thawhrimna chu a thlâwn dâwn lo tih­ hriain Lalpa hna ṭhahnemngai takin thawk rawh u,” (1 Korinth 15:58, thu uarna ‘italics’ hi ka dah belh) tiin Korinth khuaa ringtute a fuih a. He khawvela kan thiltih zawng zawng – taksaa kan thiltihte, thil ṭha leh thil ṭha lo zawng zawngte pawh hian chatuan lukhâwng a la neih tûrzia min hrilh a. Isua hminga mi chanhai zâwkte hnênah tuisik no khat ka lo pêk ringawtte, thilsiamte duat taka kan lo enkawlna te, leh hrelote hnêna Isua Lalram Chanchin Ṭha kan hrilh a, beiseina nung an lo neih ve theihna tura ṭan ka lo lâk ve na zawng zawng, a tê emaw a lian emaw pawh hian awmzia a la nei dâwn a, a thlâwn dâwn hauh lo a ni. Chu beiseina chu nghet taka vuanin, Lal rawng i bâwl ho zêl ang u.

– Rema Chhakchhuak