Tiam Tlat E (I Married You) V — Walter Trobisch*

chhunzawmna

V

Bung 2

Bible-ah hian inneihna chungchang hi hriatthiam awlsam taka ziakin a awm a. A thu a tluangtlamin a fiah a, a ril hle bawk.

‘Tuichhunchhuah thuk tak, tui fim tak awmna ang a ni. I dam chhung zawngin tui chu han chawi mah la a kang ngai reng reng lovang. Tui fim tharlam tak i chawi reng thei ang.’

‘He thu hi thinlung inhawnga kan dawnsawn chuan Pathianin kan hnenah thu a sawi a ni tih kan hre thei ang. Min ṭanpui duhtu angin min bia a. Kawng min kawhhmuha min cho chhuaktu angin min bia a ni. Chu’ng zawng ai chuan, thilpek min pek duhtu angin min bia a ni.’

‘Bible-a inneihna chungchangah chuan vawi li lai sawi nawn awm chhun a ni a. Bible hian inneihna chungchang hi a sawi tam lo khawp mai. Chu vang chuan he thu hi vawi li lai mai hmun pawimawh tak takah a lang hi a mak a ni. A hmasa berah chuan Genesis bung hnihnaa thilsiam chungchang tlangkawmnaah hman a ni a. Tin, Isuan he thu hi Matthaia 19 leh Marka 10 ah nupa inṭhen chungchang zawhna a dawn khan a sawi ve ve a. A tawp berah Tirhkoh Paula khan Ephesi 5:31 ah Isua Krista kawhna atan a hmang bawk.’

‘He’ng thute hi inneihna chungchanga Pathian thiltum tarlan nan ziak an ni. Vawiina kan khawtlanga kan tawn, thil danglam nasa tak tawng vetu mite hnena pek a ni…’

Hemi thleng hi chuan Daniel-a khan ka thusawi chu ngaihtuah pawh ngaihtuah mang lovin a lo letling zung zung zel a. Keimah leh keimahin ṭawng danga ka thusawi ka ngaithla te pawh a ang zawk. Mahse ‘khawtlanga thil danglam nasa tak’ tih ka han sawi chuan a vawi khatna atan a han chawl deuh a, thui deuh zawkin a hrilhfiah a. Sawi chhunzawm lehin Davida leh Solomona hunlai hmangin chuti ang hun chu sawi fiah ka han tum a.

‘Sumdawnna kawng thar a inhawng zel a. Hnam nunphung inang lo tak takte an inkal pawh chho a. Ngaihdan tharin mite a tidanglam a. An tihdan hluite chu an kalsan zel a. Nunphunga an lo neih tawh thil tam takte chu an ṭhing ta deuh tlat a. Hnamte tihdarhin an awm a. An thil serh ṭhinte pawh tih hleih theih a ni ta lo. A dik leh dik lo pawh chhut thiam a har ta. Tunlai ang mai hian engkim chu chin darh a ni vek mai. He thu, khatih hunlaia inneih chungchanga Pathian duh dan ni reng ṭhin entirtu hi, kan tan pawh kan hma hun atana kan kawng hruaitu a ni theiin ka hria. Tunah chuan Genesis 2:24 thu han chhiar ka duh a.’

Hemi ka sawi thleng hi chuan mipui lamin thawmvang engmah an nei lo. Mahse tunah chuan an mal chunga an dah an Bible te chu an han keu hlawm a. Rei lo te ka nghah zet hnuin ka chhiar ta a:

‘Chuvangin, mipain a nu leh a pa a kalsan ang a, a nupui a vuan ang; tichuan, tisa pumkhat an lo ni tawh ang.’

Ka chhiar zawng chuan he chang hriatthiam awlsamzia leh fiahzia chuan min hneh thar leh a. Ka kutah chuan eng emaw rawn dahin a awmin ka hria, midangte hlan chhawn tur thil. Ka sawi zawm leh a:

‘He chang hi hmun thumah a ṭhen theih a. Inneihna atana thil pawimawh pathum a sawi a ni: kalsan tur, vuan tur leh tisa pumkhat ni tur. A indawt tetein sawi dawn teh ang.

chhunzawm tur

---

Walter Trobisch (1923-1979) leh a nupui Ingrid (Hult) Trobisch (1926-2007) te hi Cameroon (Africa)-ah missionary hna an thawk ṭhin a, chhungkaw nun chungchang counsellor an ni bawk. Kum 1952 khan an innei a, kum 1953 ah Cameroon hmar lama Tchollire khuaah rawngbawlna bul an ṭan a ni. Kum 1957 ah Libamba khuaa Cameroon Christian College-ah sawn an ni a, hetah hian Walter Trobisch chuan German ṭawng bakah Bible a zirtir a, campus pastor hna a chelh pah bawk. Zirlai upa lamte tan sex leh inneihna chungchang zirna class a pe bawk ṭhin a, kum 1962 khan I Loved a Girl tih lehkhabu a tichhuak ta nghe nghe a, he lehkhabu hi African Kristian tleirawl pahnih thuk taka lo inngaizawngte nen lehkha an inthawnna behchhana a ziak a ni. He lehkhabu hi hralh a tla viau a, lehkhabu dang pawh a ziak ta zel a. Chhungkaw nun chungchanga thurawn dilna an dawn tam tak em avangin Trobisch te chhungkua chuan kum 1963 khan Cameroon chhuahsanin Austria lamah an pem a. Hetah hian Family Life Mission chu dinin khawvel pumah seminar te neiin rawng an bawl a, hei bakah hian lehkhathawn hmangin counselling an kalpui reng bawk. Walter Trobisch-a hi 1979 khan a boral a, a nupui Ingrid-i pawh 2007 khan chatuan ram a lo pan tawh.