SIPAI PAHNIH- Lalchuangliana

Indo Cinema hmuhnawm leh lar em em pakhat chu, “The Bridge on the River Kwai” tih hi a ni a. He leilawn satute zinga sipai pakhat chu Captain Ernest Gordon a ni a. Amah hian lehkhabu “Through the Valley of the Kwai”  tih a ziak a, chu mi behchhan chuan 2001 khan cinema “To End All Wars” tih an siam nghe nghe. Kum thum Japanese POW Camp ah a tang a, 6’2″ a sang kha malnutrition vangin a rihna kg 50
ah a tla. Natna chitin malaria, beriberi, tropical ulcer, appendicitis a vei a, thi turin mortuary ah an dah a. Mahse mak takin a dam chhuak leh a. Indo zawhah Theology a zir a, Church of Scotland ah Minister a ni a. US ah a pem thla a, Princeton University ah Presbyterian Chaplain niin a kum leh ah Dean of the Chapel a ni bawk. Mi ropui tak niin 16 January 2002 khan a thi ta a ni.

Sipai dang pakhat “Dusty” Miller erawh chu a dam rei lo hle. Lehkhathiam lem lo huanpu thin a ni a, mahse Krista sipai rinawm a ni thung. Captain Ernest Gordon te nen hian POW Camp ah hian an tang ho va, Japan sipaiten lung in tang an nghaisak leh an tihduhdah dan  hi sawiin a siak lo a ni. Ani pawhin tihduhdahna leh natna tam tak a tuar a, mahse Isua Krista ring tlattu a ni a, a thin a rim ngai lo va, a vui vai ngai lo va, hrehawm ti angin a awm ngai lo va, mi dang tan a inpe tawp a ni. Captain Gordon thi mai tur chu a thianpa “Dinty” Moore nen an enkawl a, an ei tur chan ai an eitir a, tui lumin a pan te an dep a, nileng zankhuain an vil thin. Chu sipai chuan Pathian thu ngaihsak ngai miah lo Gordon-a chu amah a enkawl pahin Pathian thu a hrilh thin a. “Dusty” inpekna leh a nungchang chuan amah a khawih em em a,
Pathian a hmuh phah a. Gordon-a dam leh an hmuh chuan lung in tang dangte pawh an rinna leh beiseina a sawh nghehsak nasa em em a. Gordon chuan chu sipai chu a theih nghilh thei lo. Amah avanga ringtu lo  niin thil dang aiin Pathian rawngbawl a thlang ta a ni.

Indo a lo reh chuan Captain Gordon chuan amah enkawl damtu sipai chu zawn chhuah leh tumin a chhui chiam a. Amah khawngaihtu leh enkawl damtu “Dusty” chu hmuh leh a chak em em a. Mahse  indo  reh hma lawk kar hnih-ah Japan Guard pakhatin “Dusty” chu a lo khaihlum tih a hre ta a. A khaihlum chhan an sawi chu – chu  Krista sipai,  harsatna leh hremna, tihduhna chitin hnuaiah phunnawi ngai lo, lungawi taka  tuar zel thin chu tihngaihna a hre lo va, chu Guard chuan  a khaihlum ta ringawt a ni an ti. Chu Krista sipai “Dusty” Miller-a  hming chu  Nunna Bu-ah rangkachak hawrawpin an ziak ngei ang. Captain Gordon tanpuitu dang “Dinty” Moore erawh a vanduai a, transport lawnga an chuang anmahni pawlten haiin chu lawng chu  an kap chhia a, tah chuan a lo thi ve ta bawk a ni.