Editorial: Hmel hriat loh hmel thar. Rev. Dr. Lalchungnunga

Nikum kum tawp dawn lam atang khan Aizawl khawpuiah hmelhriat loh hmel thar hmuh tur an pung nasa hle. India ram hmun danga mi an ni deuh ber awm e. Ramdang mite pawh an awm nual mai. Aizawl veng lailiah te phei chuan Kristmas Kumthar lawmna hmunah te an lo tel ve a, zaikhawmnaa han lam ve ta lawp lawp pawh an awm nawk mai. Thenkhatte chuan ruai te an theh ve a, an in lama an ei ngai lem loh sa chi hrang hrang te pawh an ei ve hawng hawng mai.  Tui an tih thu te an sawi ve nual. Lo kawm chian deuhin lehkhathiam tak tak leh hnathawh lai nei te an ni nawk tih a hriat theih. Chhungkuaa lo kal pawh an awm nual. Heng mite hi Sairang rel station-a lo thleng an tam ber a, thlawhtheihnaa lo thleng pawh an awm bawk. Sakhua leh hnam hrang hrang mi an ni tih a hriat theih a.

Heng khualzin min rawn tlawhtute hi mi fel leh tha tak tak te pawh an nih hmel. An vengvain thil pawh an thlir ngun viau niin a lang. Kan ram leh kan nun a tha zawngin an sawi tlangpui. Chung zinga an sawi lar thenkhatte chu, motor horn ri lo va kan tlan del del te, traffic buai lo va kan inthununna tha te, mihring hawihhawm nun te, hmeichhiaten hna an thawh nasat zia te, Pathiannia Biak In lam pan an tam zia te, khawlai fai leh thil dangte. Chung zinga Odisha mi haw lam train-a kan chuan puite chu kan titi pui nual a. Nuam an tih thu an sawi a. Mizoram mawi an tih thu te pawh an sawi. Mizo hmeichhe thenkhatin coffee an siam chhuah ve a tui an tih thu leh a hum (hersawm hma) tam tak an lei sak thu an sawi. An zinga pakhat chu hotel lian taka eisiam (chef) a ni a.

Train leh thlawhnaa zin a lo awlsamin kan ram, hung hnan deuh tlat leh mite tlawh pawh vak loh ang mai thin kha heng zin velna awlsam ta hian a sat tet ta. Hemi kawngah hian keini Zofate hi engtin nge kan inbuatsaih a, tan kan lak ve zel dawn tih hi ngaihtuah tham a ni. Station leh Airport-a an lo thlen phat atang  leh Hotel leh Homestay-a an lo thlen chiah hian engtin nge kan lo dawnsawn a, kal man leh thlen man chungchang, ei leh in kan buatsaih sak dan leh hmun hrang hranga kan hruai kual velnaah te, kan biak lumlam danah te hian engtin nge kan tih thin? Sum hmuhna hnar thar chu an ni ngei mai a. Mahse kan ram leh hnam hmel tih lanna remchang a ni em em a ni. Chuvangin kan taxi khalhtute, an thlenna hmun enkawltute leh dawrkaite hi an pawimawh hle. Kan Mizo Kristian ze tha kan lo entir tawk em? Chanchin Tha nena inmawi nun kan lo entir em?  Tunlaiin Mizoram pawnah Chanchin Tha hril a harsain a buaithlak ta hle. Kan ramah Chanchin Tha hre lo an lo lut ta dul dul hi remchanga lak dan kan thiam a pawimawh hle awm e. Pathianni an cham te hian an tan bika inkhawmna hlimawm leh nelawm kan siam thiam te a ngai ta hlein a hriat. Kan Biak Ina an lo kalve te hian lo dawnsawn dan tur tha ngaihtuah chhuah a tul khawp mai. Khawvel hmun danga thil ropui tak tak ang kan nei meuh lo. Mahse kan ram pianphunga thil mawi (natural beauty) hi cheibawl vak lo va kan kawh hmuh thiam pawh a tha viau thei ang.

Ngaihtuah ngai tak erawh chu khualzin veivak pungin a ken tel fo, ruih theih thil leh tisa nawmchenna lamah hian kan kal vak ang tih chu a hlauhawm hle. Chu chuan hrin tha lo thil tam tak a nei thei si a. Khualzinte rilru, taksa leh thlarau lama an hahdamna leh thil hlu an chhar tharna tur hmun te kan buatsaih thiam ang em? India ram sumdawng pakhat lo zin fo thin chu English service-ah a rawn inkhawm ve thin a, ringtu a lo nih ve phah ta. A ropui khawp mai. Chutianga thil thleng chu awm fo ta se, kan ram khualzin lo kal thinte hi “ramthar” field tha takah kan chan tir tihna a va ni mai awm ve? Chuti lo zawnga, thil sual thar kan zir thiamna a nih mai chuan ram tih chhiatna a ni hlauh thei si a. Aizawl-Sairang kawngpui dunga kan chet tlat dan mawlh mai hi a vei awm. Hman deuhah khualzin pakhat phei chuan a chhuan chhe zawngin min ziah vak phah nghe nghe kha. Zofate hian midangte nena in chukhana kawngah hian hnam nun mawi humhim chunga tan lak dan hi i zir thiam deuh deuh ang u.