Tiam Tlat E (I Married You) IX– Walter Trobisch

chhunzawmna

Full stop

Bul ka’n ṭan leh a:

‘Ka sawi tum hi man hram rawh u. Fanaute hi Pathian malsawmna chu an ni ngei e. Bible pawhin hei hi vawi tam a sawi nawn. Kei ngei pawhin fa panga ka nei a, an zavai mai avang hian ka lawm em em vek a ni. Kan chunga Pathian ṭhatna tarlanna atana kan dawn an ni a, kan nupa kara malsawmna tak tak an ni. Fanaute hi inneihna malsawmna an ni a, mahse malsawmna dawn belhte an ni. Pathianin Adama leh Evi a siam khan mal a sawm a, Pathian vekin an hnenah: “Chi tam tak thlaha lo pungin…leilung hi luah khat ula…” a ti a ni. Hebrai ṭawnga kan chhiar chuan he thupek hi malsawmna piah lama Pathian thiltih a ni.

‘Chu vangin Bible-in inneihna chungchanga thil pawimawh a sawi hian fanaute hi a lam tel hranpa lo tih hi hriat a pawimawh. Chhungte kalsan, invawn leh tisa pumkhat nih kha a tawk. Full stop. Fanaute chu lo awm ta lo pawh ni se tisa pumkhat nihna kha awmze awm lo tawp a ni chuang lo. Fanaute hi inneihna ti-inneihna-tu an ni hran lo tih hi full stop hian a tichiang a ni. Fanau awm lohna inneihna pawh hi inneihna tak tak, a thuin a kawh tum ang tak bawk hi a ni. Nau pai theih loh hi inṭhenna chhan tur a ni lo tih full stop hian a tichiang. Tu mahin, “He nu hian fa min paisak thei lo. Chu vangin innei tak tak pawh kan ni lo,” tiin a ma mai tur a ni lo. Nupa karah chuan fanau lo awm lo pawh ni se an invawnna kha pawh ṭhen tur tihna a ni lo va, an inneihna kha dan ang a nih loh phah chuang lo bawk.’

Daniel-a chuan he’ng a thu tawp lamte hi uar lehzualin a letling a, a awkaah chuan a vei a ni tih a lang bawk a. Hei hian nau neih theih loh avanga inṭhenna hi an ramah a hluar riau a ni tih a tilang awm e.

Chu vang chuan, hun chep deuh tawh mah se he thu bik hi han sawi belh ka duh ta tlat a. Daniel-a chu minute sawm vel la sawi belh chi a ni em tih ka zawt a. Ani chuan: ‘An beng an chhi kar tawh mai, i duh chen chen i sawi thei ang,’ a ti a. Tichuan ka chhunzawm leh a:

chhunzamtur

Walter Trobisch (1923-1979) leh a nupui Ingrid (Hult) Trobisch (1926-2007) te hi Cameroon (Africa)-ah missionary hna an thawk ṭhin a, chhungkaw nun chungchang counsellor an ni bawk. Kum 1952 khan an innei a, kum 1953 ah Cameroon hmar lama Tchollire khuaah rawngbawlna bul an ṭan a ni. Kum 1957 ah Libamba khuaa Cameroon Christian College-ah sawn an ni a, hetah hian Walter Trobisch chuan German ṭawng bakah Bible a zirtir a, campus pastor hna a chelh pah bawk. Zirlai upa lamte tan sex leh inneihna chungchang zirna class a pe bawk ṭhin a, kum 1962 khan I Loved a Girl tih lehkhabu a tichhuak ta nghe nghe a, he lehkhabu hi African Kristian tleirawl pahnih thuk taka lo inngaizawngte nen lehkha an inthawnna behchhana a ziak a ni. He lehkhabu hi hralh a tla viau a, lehkhabu dang pawh a ziak ta zel a. Chhungkaw nun chungchanga thurawn dilna an dawn tam tak em avangin Trobisch te chhungkua chuan kum 1963 khan Cameroon chhuahsanin Austria lamah an pem a. Hetah hian Family Life Mission chu dinin khawvel pumah seminar te neiin rawng an bawl a, hei bakah hian lehkhathawn hmangin counselling an kalpui reng bawk. Walter Trobisch-a hi 1979 khan a boral a, a nupui Ingrid-i pawh 2007 khan chatuan ram a lo pan tawh.