Editorial – 21/09/25 – Major Lalrinpuia Hrahsel SA*

SOCIAL MEDIA LEH KAN TAWNGKAM

Charlie Kirk thihna avanga inhnialna chuan nghawng a nei chhunzawm zel a. Amah ṭantu leh ṭan lem lo tute inkara thu inchuh chuan hlet a chhuah zel a. Charlie ui em em tu leh ṭan em em tu, khawvel pa hausa Elon Musk chuan a hnuaia thawk mi engemawzatte chu social media a an thu post avangin a ban phah nia sawi a ni.

Elon Musk-a chetdan hian khawvel a deng chhuak nghal a. Social Media lamah inhnialna a awm zui leh nghal zat a.Tun ang huna ṭawngkam mawilo an lo hmang zui hi chu an dik bik lo ti pawl an awm a; an mimal ngaihdan a nia, duh duh an sawi ve ang chu ti pawl an awm bawk a. An hna erawh an chan phah lawi si.

Social Media hi hman thiam a ngai viau mai. Duh duh a sawi theih rualin, duh duh sawi erawh a ṭha kher lo. Social Media awm hma daih khan, kan pi leh pu te khan kamtam chu an lo thinhrik daih tawh a lo nia. Tin, upa in tawngkam tha in sial a man an lo ti bawk a. Kan pi leh pute hunlai kha chuan midang rilru tihnat hlau takin an tawng chhuak thin a, tunlai hunah erawh chuan a taka tawngka a kan sawi chhuah ngam lohte social media lamah kan puang chhuak ta thin a, chu chuan mi tam tak thinlung a tina in roreltute hma a inkhinnna hial a thlen phah ta fo anih hi.

Facebook, whatsapp, instagram etc a mi thil post kan comment na tam tak te hi kei chuan ka chhiar ngamloh hi a va tam ta em. Hmanlai chuan hmeichhe tihawm tawk a lawm an tih thin kha tunlaiah chuan mipa in an ti ta a, mipa an phunchiar em em a, hmeichhia zawk an dawhthei ta zawk mah niin a lang tlat mai. Kan rilrua awm leh kan ngaihdan te hi sawi chhuah vek a tul lem lova, sawi awm tak sawi loh pawh a ṭha kher chuang lo thei bawk. Social Media hi ṭangkai tak leh thiam taka hman i zir zel ang u khai.

A tawp berah chuan Kolossa 4:6b ah chuan heti hian kan hmu a “In tawngka chhuak chu, chia al, khawngaihna tel ni fo rawh se” tiin. Keini ringtute chuan hei hi kan vawng reng tur a ni ang. Kan tawngka chhuak chuan ringlo mite tidam sela, Thlarau a tuihal ten lo dam phah sela; kan laka lungawilo ten lo lungawi phah sela. Doctor/Nurse kan nih pawhin kan tawngka chhuak chu damlote tan damna lo ni rawh se. Tin, Thufingte 12:14 ah chuan heti hian kan hmu bawk a “Miin a tawngkam chhuak rah chu a seng ang a, Ama kut thiltih ngei chu a hnena hlan a ni ang” tiin. Tin, Thufingte 15:1 ah heti hian kan hmu leh a “Chhanna nemin thinur a tikiang thin a, tawng huatthlala erawh chuan thinur a chawktho thin”. Hawh u, Social Media a kan tawngkam hman te hi I fimkhur thar leh I la, mite tana malsawmna nih tum zawk ang u. Tin, social media mai nilo, nitin a kan vela chengte nen a kan inkawmna tinrengah pawh fimkhur I la, midang tana natna thlentu ni lovin damna thlen tu nih I tum tlat zawk ang u.

*Major Lalrinpuia Hrahsel, S.A., Liaison Officer, The Salvation Army, Delhi.