LAM THIAM KAN MAMAWH – Lalchuangliana

Moghul lal Akbar-a khawnbawl fing Birbal-a chanchin hi a tam hle a. Tum khat chu Akbara hian a ro leh sum enkawltu tur mi rinawm a mamawh thu Birbala chu a hrilh a. Birbala chuan, “Lalpa, chutiang mi chu kan hmu mai ang, a duh apiangin he hna hi dil turin kan ti ang a, nang leh i khawnbawlte hian kan interview ang a, i duh ang mi chu kan hmu ngei ang,” a ti a. Birbala chuan ‘advertisement’ a chhuah ta a, “Lalberin a ro leh sum enkawltu a duh a, chutiang  tur chuan lam thiam a ngai a, lam thiam ber chu thlan a ni ang,” tiin an tlangau ta mauh mai a.

An ni tiamah chuan mi tam tak an lo lang a. Akbara leh a khawnbawlte chu Hall  lian takah hian an lo thu a, sum enkawl hna diltute chu pindan pakhatah hian an in nghak khawm a. Akbara leh a khawnbawlte hmaa lam tur chuan pakhat khatin an ko va. An lo chhuak tur chuan pindan pakhat hi kaltlang a ngai a. An koh apiang chu an rawn lam chhuak a, thiam taka lam tumin an bei theuh va, mahse an puankaih chu a tla ang tih hlau ni awm tak hian an kut khing lehlamin an dawm deuh tut tut zel a. A lam zo apiang chu pindan dangah an innghahkhawmtir a. A hnuhnung berah chuan mi pakhat hi kut pharin a rawn lam chhuak a, a kut leh ke, a taksa te tisawi velin nuam tiawm tak leh thiam tak hian a rawn lam a. Chutah
Birbala chuan, “Lalpa, hei hi a ni i sum enkawl tura i lak tur chu,” a ti ta a.

Akbara chuan, “Engtinnge a tha ang tih i hriat? Mi dang pawh kha an lam tha viau si a,” a ti a. Birbala chuan, “Lalpa, lam tura an lo chhuah dawn khan pindan pakhat an rawn paltlang a. Chutah chuan rangkachak leh lunghlua siam thi leh banbun chi hrang hrang ka dah a. Rawn lam chhuakte khan a engemaw ber kha an rawn puanhnuai a, an lam khan a tla ang tih hlauin an dawm tut tut a, an lam tha thei lo a nih kha. A hnuhnung bera mi erawh kha chuan engmah a rawn puanhnuai lo va, tichuan zalen takin a rawn lam haih haih a nih kha. A ruka thiltih tum lo, mi rinawm, i sum pawh ama tana hai ru ngai lo tur a ni. Mi dangte kha han ko la, an puan ven kha han hlih tir teh,” a ti a. An han koh chhuah leh chuan thil hlu tha deuh deuh kha an lo puanhnuai vek a lo ni a, rukhmang tiin tan in lamah an thawn ta zawk a.

Kan ram leh Kohhrante pawh hian ‘lam thiam’ kan va mamawh em!  Mi dangin an hmuh loh hlek chuan mahni tanghma tura chheprelh mai duh, midang pawhin an ti alawm tia dik lo tih hrereng pawh ti ve zel duh, zakzeh nei khiau chunga sawrkar leh Kohran, kan hlawh min petute tana hna thawk thin kan ni em? Mizoram a damna tur leh kam ramri chinfel a nihna tur hian Aizawl khawpui chhung ringawt pawha kan LSC inbawhthuah tam lutukte hi chinfel hmasak a tul hmel ka ti. Pathian formula: inngaihtlawm+ tawngtai+Pathian zawn+ awmdan sual hawisan = sual ngaihdamna+ ram damna (2 Chro. 7:14)
Rawngbawl leh hnathawk turin ‘lam thiam’ kan mamawh a ni.