DMI BIBLE STUDY 2026 – ZIRLAI 1-NA

THUHMA LEH KAMKEUNA – Rom 1:1-17

1. Thuhma

          Rom hi khawvela lehkhathawn nghawng nei nasa ber a ni hial âwm e. A thute hi Bible thu ziak zînga zir leh chai nasat ber pâwl a ni. ‘Thuthlung Thara Kristiante tâna thuchah puan chhuahna kimchang ber a ni,’ ti hialin an sawi thîn. Bible, tawng hrang hranga lettu lâr tak William Tyndale chuan, ‘Rom hi chhiar zin lutuk emaw, zir nasat lutuk emaw a awm thei lo vang; zir nasat zawh poh leh hriat a nuam tual tual a, thial nasat poh leh a hang tui tulh tulh mai a ni. Kan haileh zin poh leh thlarau thil inphûm kan hmu hnem mai a ni,’ tiin a sawi a. Kum zabi 19-na hun laia Pathian Thu zirtu, Swiss mi Frederik L. Godet chuan, ‘Thlarau harhna, revival a thlen apiangin Rom-a thu ziak thûk zâwka hriatfiahna a thleng zêl thin,’ a ti a. John Calvin pawhin, ‘Rom Lehkhathawn hi a nihna ang taka kan hriat thiam chuan Bible, rohlu dah khâwmna kawngkhâr kan hawng tihna a ni,’ a lo ti hial bawk. Mi tam tak nun khawihtu leh hruaitu, Pathian an hriat dân thlâk danglam vektu, an piantharna lehkhabu a lo ni tawh thin a, a ni mêk zêl bawk.